येरादारी तुंबची न्हय

भांगरभूंय | प्रतिनिधी

पणजे वचपी, येवपी प्रवाशांक फाटलें देड वर्स जे त्रास त्रास सोंसचे पडटात, ताका शीम- मेर ना. पुला लागसार पालसणां पडलीं, म्हामार्गाचें बांदकाम जालें, आतां देड वर्स उड्डाण पुलाचें काम चलता. शुक्राराच्यान पर्वरे- पणजी म्हामार्गाचो कांय वांटो दोन म्हयने (2 मार्च) बंद दवरतले. ओडीपी रस्तो ते दामियान दी गोवा आनी कदंब हॉटेल ते ओ कोकेरो जंक्शना मेरेनचो हो रस्तो. काम पुराय जालें ना जाल्यार घडये 2 मे मेरेन ही मुजत वाडूं शकता. दोन म्हयने अॅम्ब्युलन्स, गरजेचें सामान व्हरपी गाडयो आनी अवजड ट्रकांकूच येरादारी करपाची परवानगी आसतली. अर्थांत व्हीआयपींच्या गाडयांकूय कोण आडावचो ना.
वयले स्पॅन (सेगमेंट) बसोवपा वांगडा सकयलीं हेर कामांय ह्या दोन म्हयन्यांत पुराय जावंक जाय. प्रवाशांक कसलोच त्रास, मनस्ताप जावचो न्हय, म्हूण येरादारी दुसऱ्या मार्गान वळोवपाचो, भितरले जोड रस्ते सारके करपाचो, वाटे वयलीं झोपां, झिली कापपाचो, वयल्या वायरींची उंचाय वाडोवपाचो, येरादारी तुंबली जाल्यार जोड रस्त्यार वेगळे लेनीची वेवस्था करपाचो, गाडी बंद पडल्यार ती काडपाक क्रेन दवरपाचो, वाट दाखोवपी तक्टे लावपाचो, पुलीस वाडोवपाचो आदेश काडला. थारायलें प्रमाण सगलें चालीक लागतलें, हाची खात्री कोण दिवपाक शकनात. कारण ह्या मार्गाचेर दिसूयभर (सुटी सोडून) हजारांनी वाहनां यो- वच करीत आसतात.
सध्या सांजवेळार विधानसभे कडल्यान पर्वरी बाजारांत पावता म्हणसर 40 ते 45 मिनटां लागतात. मजा म्हणल्यार ह्या वेळार उड्डाण पुलाचें काम चालू आसताच अशें ना. कामूच जर बंद आसता जाल्यार, बॅरिकेड्स उबे करून एक गाडी वचपा पुरती (सिंगल लेन) वाट दवरतात ती तीन गाडयो सुट्टात इतली रुंद कित्याक करीनात? तशें केल्यार येरादारी ठप्प जावची ना. वयले सेगमेंट हाडपाचें, बसोवपाचें काम रातचें 9 ते सकाळीं 6 मेरेन करप शक्य ना? सध्या ते अर्द्या वयर बसोवन जाल्यात, तेंय बी येरादारी बंद दवरिनासतना. सेगमेंट दोन टन वजनाचो आसता, बसयतना तो पडपाक शकता. ताका लागून हीं कामां रातचींच जावंक जाय. तींय बी नेमान. शेनवार, आयतार, सुटयेच्या दिसा ह्या मार्गार व्हडलोसो त्रास जायना. येरादारी उणी आसता. कारण सरकारी कर्मचाऱ्यांक सुटी. शक्य आसा तांकां घरा कडल्यान काम करपाक सांगप, तांच्या कामाचो वेळ बदलप, अशे कांय उपाय घेतल्यार पर्वरे येरादारीचीं ल्हारां येवचीं नात. एकाच घरांतले तीगजाण पसून एकेक चार चाकी घेवन प्रवास करतात. देखून ही गर्दी.
रायबंदर- चोडण पूल जाल्लो वा बिठ्ठोण- कालवी- मयें रस्तो रुंद आशिल्लो जाल्यार ही समस्याच येवची नाशिल्ली. बेतींतल्यान पिळर्ण, साळगांव, म्हापसा बसी आसात, त्यो पणजे मेरेन हाडूं येतात. थिवेच्यान अस्नोडें, दिवचल, मयें, पोंबुर्फा, बिठ्ठोण, पणजी वचपाक- येवपाक सकाळीं, सांजवेळा 2- 2 बसी दवरीत जाल्यारुय शेंकड्यांनी प्रवाशांचो मनस्ताप उणो जातलो. पर्वरेंतल्या जोडरस्त्यांचेर पार्किंग केल्लें आसता, ताचें कितें करतले? पणजे कॅसिनों लागसार गाडयो उब्यो करून दवरतात, ताका लागून मार्केटांतल्यान दिवजां सर्कला कडेन पावता म्हणसर खाजगी मोटारीक अर्द वर लागता. ताचेरुय उपाय काडचे. उदरगती खातीर त्रास सोंसपाक जाय ही गजाल खरी, पूण कितलीं वर्सां?
पुलाचें काम चलता, तो मार्ग 1- 2 फावटी बंद करपाचें थारिल्लें. मात करूंक ना. मजा म्हणल्यार तरीय पुलाचे सेंगमेंट बसोवपा सयत हेर बरींच कामांक जालीं. सकयले रस्तेय गुळगुळीत करपाक जाय. ह्या आनी अटल सेतूचो लोकांक खऱ्या अर्थान फायदो, उपेग जातलो, तो 2050 उपरांत. कारण तो मेरेन येरादारी खूब वाडटली. गाडयो चलोवपाक मनीस मात उरल्यार पुरो!