भांगरभूंय | प्रतिनिधी
विधानसभेंत पयस करपाची केली मागणी
पणजी: येरादारी खात्याच्या चलन भरपाच्या पोर्टलांत कांय तंत्रीक त्रुटी आसात. पोर्टलाचेर स म्हयन्यां पयलींचें चलन ऑनलायन पद्दतीन भरूंक मेळना. हाका लागून प्रत्यक्ष पद्दतीन दंड भरपा खातीर पणजे आरटीओ कचेरेंत लोकांच्यो लायनी लागतात. ह्या पोर्टलांतल्यो त्रुटी पयस करच्यो अशी मागणी आमदार कार्लोस फेरेरा हांणी केली. सोमारा विधानसभेंत येरादारी खात्याच्या मागण्यांचेर ते उलयताले.
फेरेरा हांणी म्हणलें, कांय वेळार येरादारी खात्या वतीन एकाच वेळार खूबशा येरादरी उल्लंघनाचें चलन एकठांय दितात. एक मनशाक 13 हजार 500 रुपयांचें चलन आयलां. हातूंतलीं खुबशीं उल्लंघना खरेंच केल्यांत काय कितें हो प्रस्न आसा. हे विशीं एका येरादारी खात्याक विचारतकूच तांणी त्या मनशाक सगलीं कागदपत्रां घेवन कचेरेंत येवपाक सांगलें. हातूंत कितेंय उणाव आसल्यार तितलोच दंड करून उरिल्लो उणो करतले अशें तांणी सांगलें. पूण नेमा प्रमाण अशें करूंक येना.
गोंयांतल्या ग्रामीण वाठारांत केंद्रान जारी केल्ल्या येरादारी मर्यादेचे नेम लागू करिनासतना गोंय सरकारान स्वताचे नेम लागू करचे. चारचाकी वाहना फाटल्यान बशिल्ल्या प्रवाशांक लेगीत सीटबेल्ट लावप बंधनकारक करचें. कदंबान अशीर रस्त्यांचेर मिनी बशी सुरू करच्यो. बस थांब्यार बशीचें वेळापत्रक लावप गरजेचें आसा. थंय बसपाक हेर मुळाव्यो सुविधा निर्माण करप गरजेचें आसा. नियमीत अॅपा वरवीं पंचायत खात्यांतल्या कर्मचाऱ्यांक लक्ष्य करचे नात हाची खात्री करप गरजेचें आसा.
आयडीसी अधिकाऱ्यांची चवकशी करात
कॅगान आपल्या अहवालांत आयडीसीचेर ताशेरे ओडल्यात. हे विशींची जबाबदारी निश्चीत जावंक जाय. आयडीसीचे संचालक, अधिकाऱ्यांची चवकशी करची अशी मागणी कार्लोस फेरेरा हांणी केली. हाचेर वाणिज्य मंत्री मॉवीन गुदिन्हो हांणी हे विशीं कॅगान चुकीची आंकडेवारी घेतल्या आनी तांकां ती कुशीक काडपाची विनंती केल्ल्याचें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
