भांगरभूंय | प्रतिनिधी
रस्त्या वेली वाडटी येरादारी कोंयडी ही सद्याची व्हड समस्या जाल्या. भारतांतलीं सगलींच शारां चड करून पुणें, मुंबय, दिल्ली, चेन्नय, बंगळुरू येरादारीचे कोंयडेन त्रास्त आसात. येरादारी कोंयडी ही समस्या दिसानदीस वाडत आसा. परबो, सुवाळे, मंत्र्यांच्यो भोंवड्यो, मोर्चे हे कोंयडेंत आनीक भर घालतात. दीस आसूं वा रात वेळ खंयचोय आसूं रस्तो खंयचोय आसूं सगली कडेन येरादारीची कोंयडी दिसून येता. पूण हें चित्र शेनवार, आयतार वा जोडून सुटयो आयिल्ल्या दिसाच जाताली. पूण आतां ही सदचीच गजाल जाल्या. हे येरादारीचे कोंयडेन रस्त्यार वाहनांच्यो रांगो लागिल्ल्यो आसतात. ताका लागून लोकांक सुमारा भायर त्रास सोंसचो पडटा. जो प्रवास पयली एक ते देड वरां भितर जातालो तोच प्रवास करपाक आतां लोकांक दोन ते तीन वरां लागतात. सकाळ, सांजवेळ ह्या सारक्या पीक आवरांत जाल्यार वाहनां सामकी कांसवा गतीन धांवतात.
वाडटे वाहन कोंयडीक लागून शारांतले नागरीक त्रास्त आसात. ही कोंयडी टाळपा खातीर शारांनी उड्डाणपूल बांदले. पूण आतां त्याच उड्डाणपुलार वाहनांची कोंयडी जातना दिसून येता. साबार यत्न करून लेगीत येरादारीची कोंयडी उणी करपाक सरकाराक येस येना. वाडटे येरादारी कोंयडेक खूबशीं कारणां आसात. तातूंतले मुखेल कारण म्हणल्यार वाहनांची वाडटी संख्या. वाडटे येरादारी कोंयडेक वाहनांची सुमारा भायर वाडिल्ली संख्या जापसालदार आसा. आयज लोकसंख्ये परस वाहनांची संख्या चड आसा. दर वर्सां तातूंत हजारांनी वाहनांची भर पडटा. वाडट्या वाहनांक लागून शारांतले रस्ते उणे पडूंक लागल्यात. वाडट्या वाहनांक लागून येरादारी कोंयडेची समस्या निर्माण जाल्या तशीच पार्किंगेचीय व्हड समस्या निर्माण जाल्या. मुंबय सारक्या शारांत वाहनां पार्क करपा खातीर जी वाहनतळां आसात. तातूंत सादारणपणान सुमार धा हजार वाहनां पार्क करूं येतात. हाचो परिणाम अवैध पार्किंगेची संख्या वाडल्या. पार्किंगेक सुवात नाशिल्ल्यान लोक रस्त्याचे कुशीक आपलीं वाहनां पार्क करतात. ताका लागून येरादारीची कोंयडी जाता. कांय जाणांच्या मतान खाजगी वाहनां वापरप हें शक्य ना. कोणूय म्हणटलो. आमी भाजी, दूद हाडपा खातीर लेगीत बशीचो वापर करप? जर तशें आसत जाल्यार बस आमच्या दारा मेरेन हाडात. पूण तें शक्य ना. जर तें शक्य ना जाल्यार कमी अंतराचो प्रवास कसो करप?
फाटल्या कांय दसका सावन आमची धोरणां, येवजण्यो, कार्यावळी ह्यो चुकीचे दिकेन वतात. रस्ते रुंद केल्ल्यान येरादारी कोंयडेची समस्या सुट्टली. उड्डाणपूल, भुंयारा बांदिल्ल्यान येरादारीची कोंयडी सुटावी जातली अशी मानसीकता बाळगून आमी स्वताच फटीचें समाधान करून घेतात. सपनां दाखोवप, ती पुराय करचे पयलींच त्या सपनांचेर कांयच उलय नासतना नव्या सपनांच्या झुल्यार लोकांक झुलयत दवरप हो राजकारणी लोकांचो धंदो जाला. बरें, हातूंतल्या एकूय उपाय येवजणेक लागून मात लेगीत अपेक्षीत परिणाम घडनासतना समस्या दिसानदीस भिरांकूळ जायत आसा. हाका मुखेलपणान कारण खाजगी वाहनांक प्राधान्य आनी भौशीक येरादारी वेवस्था नश्ट करपाची प्रथा आमचे मुजोरी राजकारणी आनी सरकारी अधिकारी करीत आसात. येरादारीची कोंयडी खाजगी वाहनान जाता हें कोणूच मान्य करिना आनी जांकां कळटा ताची दांतखिळी बसल्या. 72 खाजगी वाहनां चड रस्तो व्यापतात काय 72 जाणांक आस्पावन घेवन वचपी बस चड रस्तो व्यापता हें भौतीक शास्त्र अडाणी राजकारण्यांक केन्ना कळटले? बस सेवेक लागून जावपी विवीध फायदे भ्रश्ट अधिकाऱ्यांक केन्ना कळटले? सुरक्षीत वाहन खंयचें बस काय खाजगी वाहन हें सामान्य लोकांक केन्ना कळटलें?
येरादारी कोंयडी उणी करपा खातीर शासन, प्रशासना कडल्यान लोकांक भौशीक येरादारी वेवस्थेचो वापर करपाच्यो सुचोवण्यो दितात. पूण लोकांचो भौशीक येरादारी वेवस्थे वेलो विस्वास उडून गेला. मुंबयतली बेस्ट, पुण्याची पीएमपीएल हे सारक्यो भौशीक येरादारी वेवस्था लोकांक सक्षम सेवा दिवपाक अपेशी थारल्यात. म्हणून जो तो नवें वाहन घेता. नवें वाहन विकतें घेवन लोक आपल्या खाजगी वाहनांनी प्रवास करता. भौशीक येरादारी वेवस्थेन आपलो कारभार सुदारून लोकांक बरी सेवा दिवची. सरकारान जर ह्यो भौशीक येरादारी वेवस्था सक्षम करीत जाल्यार लोक स्वताच्या वाहनांनी प्रवास करिनासतना भौशीक येरादारी वेवस्थेचोच वापर करतले. ताका लागून रस्त्या वेल्या वाहनांची संख्या उणी जातली, आनी वाहनांची संख्या उणी जायत जाल्यार येरादारी कोंयडी लेगीत उणी जातली. जर रस्त्या वेली कोंयडी उणी करपा खातीर सरकाराची मना पसून इत्सा आसत जाल्यार तांणी पयलीं भौशीक येरादारी वेवस्था सक्षम करची. भौशीक येरादारी वेवस्था सक्षम करूनच येरादारी कोंयडी राखूं येतली.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
