भांगरभूंय | प्रतिनिधी
पणजीः बार्देसांतल्या सीआरझॅड (कोस्टल रेग्युलेशन झोन) वाठारांतलीं बेकायदो बांदकामां उडोवपा संबंदी उच्च न्यायालयाच्या आदेशांची अंमलबजावणी करपाक कळाव केल्ले प्रकरणांत महसूल खात्यान राज्यांतल्या 14 अधिकार्यांक समन्स दिला. ह्या अधिकार्यां मदीं उपजिल्लोधिकारी, मामलेदार हांचो आस्पाव आसा.
महसूल आयुक्त तशेंच सचीव संदीप जॅकीस (आयएएस) हांणी हे समन्स दिल्या. हें पावल बॉम्बे उच्च न्यायालयाच्या गोंय खंडपीठांत दाखल केल्ल्या अवमान याचिका क्रमांक 14/2024 (जनहित याचिका क्र. 869/2021 (फ)) फाटभूंयेर उबारलां.
ह्या प्रकरणांत, तारीख 15 सप्टेंबर 2021 दिसा न्यायालयान गोवा कोस्टल झोन मॅनेजमेंट अथॉरिटीच्या (जीसीझेडएमए) शिफारशी प्रमाण बेकायदो बांदकामां मोडून शासकीय जमिनीक आदले स्थितींत हाडपाचे आदेश दिल्ले. जीसीझेडएमएनान हे आदेश ३० नोव्हेंबर २०२० दिसा उत्तर गोंयच्या जिल्लोधिकार्यांक दिल्ले. मात सुमार दोन वर्सां उपरांतूय ह्या आदेशाची अंमलबजावणी जावंक ना.
समन्स दिल्ल्या अधिकार्यांचीं नांवां:
मामलेदार पदावेले अधिकारी:
1. लक्ष्मीकांत बी. कुट्टीकार, 2. राहुल सी. देसाय, 3. कृष्णा गांवस, 4. दशरथ गांवस, 5. प्रविंद गांवस, 6. धीरेन बाणावलीकार, 7. प्रतापराव गांवकार, 8. अनंत मळीक,
उपजिल्लोधिकारी पदावेले अधिकारी:
9. अक्षय जी. पोटेकार, 10. कपिल फडते, 11. राजेश आजगांवकार, 12. गुरुदास देसाय, 13. उदय प्रभुदेसाय आनी हेर 14. सुभाष बेळगांवकार- कार्यकारी अभियंतो, भौशीक बांदकाम खातें (पीडब्ल्यूडी), म्हापशें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
