भांगरभूंय | प्रतिनिधी
पणजी ः मुंडकार खटल्यांचे सुनावणे खातीर शेनवारा काम करपी येणावळ खात्याच्या कर्मचाऱ्यांक सुटयेंच्या दिसा काम केल्ल्यान भरपाय सुटी (कॉम्प ऑफ) मेळटली. उत्तर गोंय जिल्होधिकारी कार्यालयान हे संबंदी आदेश जारी केला. शेनवारा दर दोन वरांनी बायोमेट्रीक मशीनांत पंचिंग करुन कर्मचाऱ्यांक आपली हाजिरी नोंद करची पडटली. हाचे उपरांत मामलेदारांची परवानगी आनी नेमा प्रमाण कॉम्प ऑफ मेळटली अशें आदेशांत स्पश्ट केलां.
जिल्लोधिकारी कार्यालयाच्या पयल्या आदेशांत कॉम्प ऑफ दिवपाची न्हय संबंदीताचो भाग काडून उडोवपाची शिफारस मानवाधिकार आयोगान केल्ली. ते प्रमाण हो भाग वगळ्ळा. पूण कर्मचाऱ्यांक कॉम्प ऑफ मेळोवपा खातीर कांय अटी पाळच्यो पडटल्यो. शेनवारा कामाक येवपी कर्मचाऱ्यांक दर दोन वरांनी बायोमेट्रीक डिव्हायसाचेर पंचिंग करुन आपली हाजिरी नोंद करप गरजेचें आसा. मामलेदार वा संयुक्त मामलेदारांक हाची खात्री करची पडटली. हाचे उपरांतच पात्रताय आनी नेमा प्रमाण कॉम्प ऑफ दितले अशें आदेशांत म्हणलां.
हे विशीं चड म्हायती प्रमाण, राज्य सरकारान बेगीनांत बेगीन मुंडकार प्रकरणां सोडोवपा खातीर शेनवारा ह्या प्रकारणांची सुनावणी घेवपाचो निर्णय घेतिल्लो. ते प्रमाण उत्तर गोंय जिल्लो जिल्होधिकारी कार्यालयान 30 ऑक्टोबर 2024 दिसा आदेश जारी करून उपजिल्होधिकारी आनी मामेलदार कार्यालयाच्या कर्मचाऱ्यांक शेनवारा हाजीर रावपाचो आदेश काडिल्लो. ह्या आदोशांत शेनवारा काम करपा बदला कॉम्प ऑफ दिवचे नात अशें म्हणिल्ले.
बार्देश, पेडणें, तिसवाडी, दिवचल आनी सत्तरी तालुक्यांच्या मामेलदार कार्यालयांतल्या कर्मचाऱ्यांनी कॉम्प ऑफ दिवचे नात अशा आदेशा विशीं मानवाधिकार आयोगा कडेन कागाळ केल्ली. आयोगान केंद्रीय लोकसेवा सुटी नेम, केंद्रीय अर्थ खात्याचो आदेश हांचो दाखलो दिवन गॅझेटेड अधिकारी सोडल्यार सुटयेच्या दिसां काम करपी सरकारी कर्मचाऱ्यांक कॉम्प ऑफ दिवप गरजेचें आसा अशें स्पश्ट केल्लें. हे संबंदी राज्य सरकारान जारी केल्ल्या आदेशांत कॉम्प ऑफ दिवची न्हय अशें म्हणिल्लें ना अशेंय आयोगान सांगिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
