भांगरभूंय | प्रतिनिधी
मुख्यमंत्रीः जीएसटी खातीर स्थापन जाल्ल्या मंत्रीगटाची दिल्लींत बसका
भांगरभूंय । प्रतिनिधी
पणजी : जीएसटी शुल्क आनी येणावळीची म्हायती राज्यां कडल्यान घेतल्या उपरांतूच बांदकाम मळा वयलो जीएसटी शुल्क आनी हेर समस्यांचेर निर्णय जातलो, अशें मुख्यमंत्री डॉ. प्रमोद सावंत हांणी स्पश्ट केलां. बांदकाम मळा वयल्या जीएसटी प्रस्नाचेर स्थापन जाल्ल्या मंत्रीगटाची बसका दिल्लींत जाली. मुख्यमंत्री डॉ. प्रमोद सावंत हांच्या फुडारपणा खाला ही बसका जाली.
हे बसके खातीर मुख्यमंत्री बुधवारा रातीं दिल्ली गेल्ले. बांदकाम मळाच्या प्रस्नाचेर जाल्ली बसका फलदायी थारली. उद्देगीक प्लॉट लीजार दिवपा खातीरचो जीएसटी उणो करपा विशीं चर्चा जाली. सामान्य मनशाक लाव जावपा खातीर घरनिर्माण संस्था खातीरचो जीएसटी उणो करपाचेर चर्चा जाली. बांदकाम मळाच्या मंत्रीगटाची फुडली बसका गोंयांत जातली, अशी म्हायती मुख्यमंत्र्यांनी दिली. गोंयांत बांदकाम उद्देगाचो (रियल इस्टेट) विस्तार नेटान जायत आसा. बांदकाम वेवसायिकांक इन्प्युट टॅक्स क्रॅडीट सवलत दिवची, अशी मागणी गोंयच्या बांदकाम उद्देजकांची आसा. इमारत बांदकाम आनी विक्री तशेंच घरनिर्माण मंडळाच्या फ्लॅटां विशीं कबलात करतना लागू जावपी जीएसटीचेर वाद आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
