भांगरभूंय | प्रतिनिधी
नवी दिल्ली, खबरां संस्था ः केंद्रीय लोकसेवा आयोगाचे अध्यक्ष मनोज सोनी हांणी पदाचो राजिनामो दिलो. सध्या लोकसेवा आयोग पूजा खेडकाराच्या बनावट प्रमाणपत्र प्रकरणाचेर चर्चेत आसा. जूनाच्या निमाण्या सप्तकांत तांणी आपलो राजिनामो राष्ट्रपती कडेन सादर केलो. वैयक्तीक कारणांक लागून तांणी पदाचो राजिनामो दिल्ल्याचे कळटा.
मेळिल्ले म्हायती प्रमाण मनोज हांचो कार्यकाळ पुराय जावपाक अजून पांच वर्सां उरल्यात. तांचो हो सध्याचो कार्यकाळ 2029 वर्सा सोंपपाचो आशिल्लो. सोनी 2017 वर्सा यूपीएससीचो वांगडी म्हणून कामाक लागलो. 16 मे 2023 दिसा तांची केंद्रीय लोकसेवा आयोगाचो अध्यक्ष म्हूण नेमणूक जाली. खबरां प्रमाण तांची प्रवृत्ती चड आध्यात्मिक मळा कडेन आसा आनी मनोज सोनी आतां गुजरातांतल्या स्वामीनारायण पंथाचो एक फांटो अनुपम मिशनाक चड वेळ दिवपाक सोदता.
59 वर्सां पिरायेचो मनोज सोनी हांका राजकी शास्त्राचो तज्ञ मानतात. आंतरराश्ट्रीय संबंदांतय तांचो अभ्यास आसा. सरदार पटेल विद्यापिठांत 1991 ते 2016 मेरेन आंतरराष्ट्रीय संबंद विशयाचे अध्यापन केलें. मनोज सोनी हांणी गुजरातांतले डॉ. बाबासाहेब आंबेडकर मुक्त विद्यापिठाचे 2009 ते 2015 मेरेन कुलगुरू म्हणून काम केलें. तशेंच 2005 ते 2008 मेरेन तांणी बडोदाच्या महाराजा सयाजीराज विद्यापीठाचे कुलगुरू म्हणून काम केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
