यूजीसी-नेट 2024 परिक्षे खातीर नव्यो तारखो जाहीर, नवे पद्दतीन जातली परिक्षा

भांगरभूंय | प्रतिनिधी

नवी दिल्ली, खबरां संस्था ः नॅशनल टेस्टिंग एजन्सीन (एनटीए) शुक्रारा यूजीसी-नेट 2024 परिक्षे खातीर नवी तारखां जाहीर केल्यांत. आतां ही परिक्षा 21 ऑगस्ट ते 4 सप्टेंबर मजगतीं परतून जातली अशें एनटीएन शुक्रारा जारी केल्ले अधिसुचोवणेंत सांगलां.
यूजीसी-नेट जून 2024 वर्साची परिक्षा हाचे पयलीं ऑफलायन पद्दतीन जाताली. पूण, आतां ती संगणक आदारीत चांचणी (CBT) पद्दतीन जातली अशें अधिसुचोवणेंत म्हणलां.
तशेंच एनसीईटी 2024 खातीर संगणक आदारीत चांचणी 10 जुलयाक जातली, जाल्यार संयुक्त सीएसआयआर-यूजीसी नेटाची (CSIR-UGC NET) परिक्षा 25 जुलय ते 27 जुलय मेरेन जातली. मजगतीं, अखिल भारतीय आयुष पदव्युत्तर प्रवेश परिक्षा (AIAPGET) 2024 आदल्या वेळापत्रका प्रमाण 6 जुलयाक जातली.
“डार्कनेटाचेर आशिल्लो यूजीसी-नेट प्रस्नपत्रिका यूजीसी-नेटाच्या मूळ प्रस्नपत्रका कडेन जुळटा हें स्पश्ट जाले उपरांत आमी परिक्षा रद्द करपाचें थारायलें. ह्या पेपर-लिकाची जापसालदारकी आमी घेतात आनी वेवस्था सुदारपाचो यत्न करतात”, अशें नव्यान वेंचून आयिल्ले शिक्षण मंत्री धर्मेंद्र प्रधान हांणी सांगलें.

ह्या पेपर लीकाचो परिणाम सीएसआयआर यूजीसी नेटाचेरूय जालो. ही परिक्षा 25 ते 27 जून मेरेन जावपाची आशिल्ली. हाचीय प्रस्नपत्रिका डार्क वेबचेर लीक जाल्ल्यान शिक्षण मंत्रालयानय ही परिक्षा फुडें धुकल्ली.
आतां विद्यापिठ अनुदान आयोगाच्या राष्ट्रीय पात्रताय चांचणेंत (यूजीसी नेट) एक नवो विशय जोडपाचो आसा. डिसेंबरांत जावपी परिक्षेंत आपत्ती वेवस्थापन विशयाचो आस्पाव करपाचो निर्णय घेतला. युजीसीचे सचीव प्रा. मनीष जोशी हांणी हे संबंदी एक परिपत्रक जारी केलें. संशोधन अभ्यासक्रमाच्या सहाय्यक प्राध्यापक पदा खातीर वर्साक दोन फावटीं जून आनी डिसेंबरांत युजीसी नेट परिक्षा जाता. ह्या वर्सा सावन पीएच.डी.च्या प्रवेशा खातीर ह्याच परिक्षेचे गूण ग्राह्य धरपाचो निर्णय युजीसीन घेतला. सध्या युजीसी नेट परिक्षेंत 83 विशय उपलब्ध आसात. आतां आपत्ती वेवस्थापनांचो तातूंत आस्पाव जातलो.