भांगरभूंय | प्रतिनिधी
मध्यपश्चीम वा ‘मीडवॅस्ट’ हाका ‘मिडल वॅस्ट’ वा ‘नॉर्थ सॅण्ट्रल स्टेट्स’ म्हणून वळखतात. युनायटेड स्टेट्साच्या उत्तर आनी मध्य राज्यांचो आसपाव ह्या वाठारांत जाता. इलिनॉय, इंडियाना, आयवा, कॅनसस, मिशिगन, मिनिसोटा, मजुरी, नब्रास्का, नॉर्थ डिकोटा, ओहायो, सावथ डिकोटा आनी विस्कॉन्सीन ह्या राज्यांचो आसपाव मध्यपश्चीम यूएसएंत जाता. शिकागो, कोलंबस, कॅनसस सिटी, डिट्रॉयट हीं ह्या भागांत येवपी कांय व्हडलीं शारां. ह्या राज्यांची एकूण लोकसंख्या सुमार 68,985,454 आसा. अमेरिकन इंडियन्साची ही मूळ सुवात. सावथ डिकोटा राज्यांत भांगराचो सोद लागिल्ल्यान ह्या राज्यांतली लोकसंख्या चड आसा. टॉर्नेडो (चक्रीवादळा वरी), बर्फाचें वादळ तशेंच गिमाळ्यांतली प्रचंड प्रमाणांतली गर्मी अशे हवामान ह्या वाठारांत आसता. पश्चिमे कडल्या वाठारांत गंव आनी मक्याची लागवड जाता. डिट्रॉयट, मिशिगन, ओहायो, इंडियाना सारकिल्या वाठारांनी उत्पादन उद्देग चलतात.
ग्रेट प्लेन्स – ‘ग्रेट प्लेन्स’ वा ‘ग्रेट अमेरिकन डॅजर्ट’ हो उत्तर अमेरिकेंतलो वाठार. सुमार 3,000 मैलांच्या वाठारांत 10 राज्यां आनी 3 प्रांतांच्या कांय भागाचो आसपाव जाता. ह्या ग्रेट प्लेन्साचेर सुमार 100 मिलियन अमेरिकन बफॅलो (गवो) चरपाक शकतात. अमेरिकन बफॅलोचो वापर थळावे अमेरिकन इंडियन्स खाणां-जेवणां खातीर आनी चामड्याचो वापर कपड्यां खातीर करताले. डिकोटाचे लोक तांच्या हाडां पसून शस्त्रां आनी आवतां तयार करताले. पूण आतां हीं जनावरां मारपाचेर बंदी हाडल्या.
शेती – मध्यपश्चिमी यूएसएंत शेती वेवसाय मोट्या प्रमाणांत चलता. एका तेंपार हो वाठार रान आनी उकत्या तणान धांपिल्लो आशिल्लो. पूण आतां हो वाठार पिकावळी खातीर सुपीक आसा. मध्यपश्चीम यूएसएंत कड्डणांची खूब पिकावळ जाल्ल्यान ह्या वाठाराक ‘ब्रॅडबास्केट’ अशें म्हणटाले. ह्या वाठारांत मको, गंव, सोयाबीन, ओट्स, जव ह्या धान्यांचें पीक जाता.
शिकागो – शिकागो हें यूएसएतलें तिसरें व्हड शार. सुमार 2.7 मिलियन लोक ह्या शारांत रावतात. ह्या शारांत रेल्वे येरादारीची बेस बरी सुविधा आसा आनी अमेरिकेंतल्या हेर प्रदेशांक जोडपाचें काम ही येरादारी सेवा करता. ते खातीर, शिकागो शाराक युनायटेड स्टेट्साची रेलरोड राजधानी म्हणटात. ग्रेट लेक्साचे देगेर हें शार वसलां. म्हणटकच, उदकां खेळाची आवड आशिल्ल्या पर्यटकां मदीं हें शार बरेंच लोकप्रिय आसा.
मावंट रशमोर नॅशनल मॅमोरियल – सावथ डिकोटाच्या ब्लॅक हिल्सांत मावंट रशमोर आसा. ही सुवात अमेरिकेच्या म्हान राष्ट्राध्यक्षांक ओंपल्या. ह्या संग्रहालयांत विशाल मुर्तीकला पळोवंक मेळटा. जॉर्ज वॉशिंगटन, थॉमस जॅफर्सन, थियोडोर रूजवॅल्ट आनी अब्राहम लिंकन ह्या चार राष्ट्राध्यक्षांची 18 मिटर लांब मुर्तीकला हे दोंगुल्लेचेर आसात. दोंगराच्या फातराचेर केल्ली ही मुर्तीकला पळोवंक हजारांनी पर्यटक ह्या नॅशनल मॅमोरियलाक भेट दितात.
टॉर्नेडो – ‘टॉर्नेडो’ वा ‘ट्विस्टर्स’ कॅनसस आनी ओखलामा ह्या राज्यांनी मोट्या प्रमाणांत येता. हें वादळ जमनीच्या पृश्ठभागाचेर येता. वारें वादळी वर्तुळांत फिरता आनी आपल्या मार्गांत येवपी प्रत्येक गजालीक उध्वस्त करीत वता. हें वादळ, चक्रीवादळा वरीच आसता. पूण चक्रीवादळ भारतांतल्या दर्यादेग प्रदेशांत येता. टॉर्नेडोंत वार्याचो वेग खूब आसता. आनी ताचो अदमास लावप कठीण थरता.
स्नेहा सबनीस
9923633789
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
