भांगरभूंय | प्रतिनिधी
एसएचे पश्चिमे वटेन आशिल्ल्या राज्यांचो आसपाव ‘वॅस्टर्न युनायटेड स्टेट्स’ वा पश्चिमी युनायटेड स्टेट्सांत जाता. ह्या राज्यांक ‘अमेरिकन वॅस्ट’ अशेंय म्हणटात. अलास्का, एरिझोना, कॅलिफोर्निया, कोलराडो, हवाई, आयडहो, मॉण्टाना, नेवाडा, न्यू मॅक्सिको, ऑरेगन, युटा, वॉशिंग्टन आनी वाओमींग ह्या राज्यांचो समावेश पश्चिमी यूएसएंत जाता. ह्या राज्यांची एकूण लोकसंख्या सुमार 78,588,572 आसा. हातूंतलीं कांय राज्यां दोंगरा वाठारांत आनी कांय राज्यां दर्यादेग वाठारांत आसात. दर्यादेगे लागसार आशिल्ल्या सॅन फ्रांसिस्को, लॉस एंजल्स आनी सॅन डियेगो ह्या शारांनी नोकरी आनी हेर वेवसाया खातीर जायते लोक स्थलांतर करतात. दोंगर, रानां, वन्यजीव, दर्यावेळो अशे वेग-वेगळे प्राकृतीक दृश्य पश्चिमी यूएसएंत पळोवंक मेळटात.
शेती – कॅलिफोर्निया राज्यांत शेती हो म्हत्वाचो वेवसाय. गरम आनी सुपीक जमीन तशेंच बरी शिंपणावळ वेवस्था ह्या राज्यांत आसा. कॅलिफोर्निया जगांतले 80 टक्के बदामाचें उत्पादन करता. नापा वॅली ह्या शारांत द्राक्षांचे जायते मळे आसात. द्राक्षां, स्ट्रॉबॅरी, अक्रोड, पिस्ता, चॅरी, जर्दाळू हाचे सयत हेर भाजयो आनी फळां ह्या राज्यांत रोयतात.
उद्देग – मॉण्टाना, वाओमींग, युटा आनी कोलराडो ह्या राज्यांतले लोक खण उद्देग आनी शेतकाम तशेंच फलोत्पादन उद्देगाचेर निंबून आसात. गोरवां आनी कुकडां पोसून लोक आपलें पोट भरतात. ह्या राज्यांनी गोरवां, घोडे पोसपी फार्म खूब प्रमाणांत मेळटात.
हवामान – पश्चिमे कडल्या राज्यांनी कांय प्रमाणांत रुक्ष आनी सुकें वातावरण आसता. पूण कांय भागांनी मोट्या प्रमाणांत पावस आनी बर्फ पडटा. पश्चिमी यूएसएंतलें हवामान अस्थीर आसता आनी जायते फावट हांगा दुश्काळ पडटा. वादळ आनी टॉर्नेडो सारकिल्यो सैमीक आपत्ती ह्या वाठारांनी येता.
भूंयकांप – कॅलिफोर्नियांतलें सेन फ्रांसिस्को शार सेन एण्ड्रियास फॉल्ट लायनीचेर आशिल्ल्यान ह्या वाठारांत परत परत भूंयकांप येता. 1906 वर्सा सेन फ्रांसिस्को शारांत सगळ्यांत मोटो भूंयकांप आयिल्लो. तातूंत सुमार 3000 लोकांक मरण आयिल्लें आनी सुमार 80 टक्के शार नश्ट जाल्लें. आतां आधुनीक तंत्राचे मजतीन इमारती बांदिल्ल्यान तशेंच प्रतिसाद यंत्रणा बरीच सुदारिल्ल्यान, भुंयकांपाक लागून तितलें लुकसाण जायना.
डॅथ वॅली – डॅथ वॅली हाका यूएसांतलो एक सुको सडो म्हणून वळखतात. कॅलिफोर्निया आनी नेवाडा शिमेर डॅथ वॅली आसा. गिमाळ्यांत सगळ्यांत चड गर्मी म्हणल्यार 56.7 डिग्री सेण्टीग्रेट ह्या डॅथ वॅलींत आसता. ते खातीर, ह्या वाठारांत मनशाक जगप कठीण जाता. तिम्बिशा जमातीचे मूळ अमेरिकी निवासी ह्या डॅथ वॅलींत रावतात. सैमीक नदरेन कांय मनभुलवणें दृश्य ह्या वाठारांत पळोवंक मेळटात. कितलेशेच पर्यटक डॅथ वॅली नॅशनल पार्काक भेट दितात.
कोलराडो – पश्चिमी यूएमएंतल्या कोलराडो ह्या राज्याची लोकसंख्या सुमार 5,839,926 इतली आशिल्ली. तांबडे मातयेचो हो प्रदेश आशिल्ल्यान ‘coloured red’ हाचे वयल्यान कोलराडो हें नांव ह्या राज्याक पडलें. तेल, कोळसो आनी सैमीक वायू ह्या निसर्गीक संपत्तीचे उद्देग ह्या राज्यांत आसात. खण वेवसाया सयत, शेती, पर्यटन आनी संरक्षण संबंदीत उद्देग ह्या राज्यांत चलतात.
लॉस एंजल्स – युनायटेड स्टेट्सांत न्यूयॉर्क शारा उपरांत सगळ्यांत चड गजबजिल्लें शार म्हणल्यार लॉस एंजल्स. हॉलिवूड फिल्म उद्देग ह्या शारांत चलता. ह्या शारांत मनशां परस वाहनां चड दिश्टी पडटात. दर्यादेग आनी दोंगर हांचे मदीं आशिल्ल्या ह्या शारांत हवा प्रदुशणाची मोटी समस्या आसा.
स्नेहा सबनीस
9923633789
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
