भांगरभूंय | प्रतिनिधी
भारताची आशिया करंड क्रिकेट सर्तीची सुरवात जबरदस्त जाली. हांगाच्या आंतरराष्ट्रीय क्रिकेट मैदानाचेर जाल्ले आपले पयले मॅचींत ताणें यूएईक 9 विकेटींनी हारायलो. यूएईन भारताक 58 धांवड्यांची सोंपी मोख दिल्ली. भारतान ती पावरप्लेंत मेळयली. भारताच्या दादल्यांच्या पंगडाचें हें सगल्यांत जलद जैत आसा.
टॉस जिखून भारताचो मुखेली सूर्यकुमार यादवान पयलीं बॉलींग करपाचो निर्णय घेतलो. ताचो यत्न सूर्यकुमाराक उण्या स्कोराचेर आडावपाचो आशिल्लो. भारताच्या बॉलरांनी आपल्या मुखेल्याचो निर्णय योग्य थारायतना यूएईचो डाव गडगडावन उडयलो. यूएईचो डाव फकत 13.1 ओव्हरींनी 57 धांवड्यांचेर सोंपलो.
पावरप्लेंतूच भारतान वेगळ्यावेगळ्या चार बॉलरांचो उपेग केलो. जसप्रीत बुमरान डावाचे चवथे ओव्हरींत आलिशान शराफूक बोल्ड करून भारताक पयलें येस मेळोवन दिलें. ते उपरांत फुडले ओव्हरींत वरुण चक्रवर्तीन आपले पयले ओव्हरींत मोहम्मद जोहैबाक तंबूंत धाडलो. कुलदीप यादवान पावर प्ले उपरांत बॉलींग घालपाक आयलो आनी आपले दुसरे ओव्हरींत तीन बॅट्समनांक बाद केले.
यूएईच्या ओपनराक सोडलो जाल्यार एकाय बॅट्समनाक दोट्टी आंकडो हुपपाक जमलो ना. कुलदीप यादवान यूएईची मदली फळी गडगडावन उडयली, जाल्यार शिवम दुबेन तीन विकेटी घेवन यूएईचो सकयलो क्रमाक तंबूंत धाडलो. निमाणे आठ बॅट्समन फकत 10 धांवड्यांच्या अंतरान बाद जाले.
58 धांवड्याचो फाटलाव करपाक देंवपी भारताक ओपनरांची नवी जोडी अभिषेक शर्मा आनी शुभमन गिल हांणी जलद सुरवात करून दिली. दोगांयनी पयल्या दोन ओव्हरींनी 25 धांवड्यांचो पावस घालो.
अभिषेक चड आक्रमक दिसलो. ताणें 16 बॉलांनी दोन चवके आनी तीन सक्यांचे मजतीन 30 धांवड्यो केल्यो. तो बाद जाल्लो त्या वेळार फकत औपचारीकताय बाकी आशिल्ली. ती मुखेली आनी उप मुखेल्यान सहज पूर्ण केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
