भांगरभूंय | प्रतिनिधी
हुस्क्याची वास्तवताय आयच्या डिजिटल युगांत सोशल मिडियाचो वापर सामान्य मनशाच्या जिवितांत अत्यंत म्हत्वाचो जाला. फेसबूक, यूट्युब, इंस्टाग्राम, ट्विटर ह्या प्लॅटफॉर्मांनी वैयक्तीक स्वातंत्र्याचो नवो आयाम उक्तो केला. जायते जाण ह्या प्लॅटफॉर्मांचो सकारात्मक वापर करून म्हायती दिवपाक, शिक्षण दिवपाक, मनरिजवण करपाक आनी जागृताय करतात ही बरी गजाल. पूण, कांय जाण अर्थीक फायद्या खातीर स्वता ‘युट्युब पत्रकार’ अशी वळख तयार करून हेरांक ब्लॅकमेल करपा खातीर ह्याच माध्यमांचो गैरवापर करतात. कांय गट यूट्युब सारक्या व्हिडियो प्लॅटफॉर्माचेर स्वताचे चॅनल सुरू करतात आनी समाजीक प्रस्न, राजकी घडामोडी, थळाव्या कार्यावळींचेर व्हिडियो तयार करतात. कांय जाण खऱ्यांनीच बरें काम करतात, पूण पत्रकारितेचें कसलेंच शिक्षण नासतना फकत खबरांचो घुस्पागोंदळ करून उजवाडांत येवन, मतां, व्हिवज आनी पयशे मेळोवपा खातीर लोकांचोय एक वर्ग आसा.
हे यूट्यूबर स्वताक “पत्रकार” म्हणटात, पूण ते खंयच्याच अधिकृत संघटने कडेन संबंदीत नात, तशेंच तांचें लागीं अधिकृत प्रमाणपत्रां नासता. आपल्याक पत्रकार म्हणपी ह्या यू ट्युबरांची एक खाशेली मोडस ऑपरेंडी आसता. हे लोक मुखेलपणान थळाव्या वेवसायीक, राजकी कार्यकर्ते, सरकारी कर्मचारी, दोतोर, बिल्डर आदी कार्यालयांनी कामांत दोश सोदून काडपाचें निमित्त करून वतात.ते गुप्तपणान व्हिडियो रेकॉर्ड करतात आनी मागीर “आमी ही गजाल आमच्या यूट्युब चॅनलाचेर घालतले, जाका लागून तुमची बदनामी जातली” अशीं धमक्यो दिवन पयशे घेतात. केन्ना केन्ना ते फटीच्यो कागाळी लेगीत करतात आनी पुलिशेंत कागाळ करतात आनि चड त्रास दितात. कांय प्रकरणांनी हे लोक फेसबूक लायव्ह वरवीं खंयच्याय मनशाचेर थेट आरोप करतात आनी तांचें मत विचारनासतना समाजा मुखार ताचेर आरोप करतात. ही कृती संबंदीत मनशाची प्रतिमा कलंकीत करता आनी मानसीक त्रासूय निर्माण करता. आरोपी खऱ्या अर्थान गुन्यांवकार आसा काय ना हें थारावचे पयलीं लेगीत ताची समाजांत पुराय बदनामी जाता.
पत्रकारिता हें एक जापसालदारकेचें क्षेत्र. खरी आनी तटस्थ म्हायती समाजा मेरेन पावोवपाचें काम पत्रकारां कडेन आसता. ते खातीर तांकां खर प्रशिक्षण घेवचें पडटा, नैतीक मुल्यां मान्य करचीं पडटात आनी कायदेशीर जापसालदारक्यो घेवच्यो पडटात. अधिकृत माध्यम संस्थांनी काम करपी पत्रकार कायद्याची बंधना आसतात. पूण युट्युबाचेर “पत्रकार” म्हूण मिरोवपी लोकांक कायदे, तशेंच तांकां कसलेंच बंधना ना. देखून हे पंगड चड करून मनमानी पद्दतीन, कसलेंच सत्यापन करिनासतना, फकत आड रस्त्यान पयशे मेळोवपाच्या हेतान लोकांचें जिवीत नश्ट करतात. हाका लागून पत्रकारितेचेर लोकांचो विस्वास उणो जावपाक लागला. खंयचो पत्रकार खरी म्हायती दिता आनी खंयचो फटयता हें नागरिकांल्या आकलना भायलें जालां. तशेंच ह्या नकलामी पत्रकारांनी खऱ्या पत्रकारांच्या वावराचेर दुबाव हाडला. दुसरे वटेन सामान्य नागरीक ह्या ब्लॅकमेलिंगाचे भिरांतेन आपल्या हक्का खातीर आवाज उबारचे बदला ओगी रावता. भारतीय दंड संहिते प्रमाण कोणाकूय धमकावप, खोटे आरोप करून तांचो बदनामी करप, जबरदस्तीन पयशे घेवप हे गंभीर गुन्यांव.अशा फटींग पत्रकारां आड कागाळ करूं येता. पूण जायते फावटीं तांचे भकिक पडपी लोक कलंकाच्या भंयान अहवाल दिवपाक संकोच करतात. अशा प्रकरणांत प्रशासन आनी पुलीस वेवस्थेन चड सादूर रावपाची गरज आसा.
थळाव्या पुलीस स्टेशनांनी युट्युबर वा सोशल मिडियाचेर काम करपी लोकांची नोंद दवरची, तांचे वळखपत्र तपासचे, आनी कसलीच कागाळ मेळ्ळी जाल्यार बेगोबेग कारवाय करची.एक नागरीक म्हूण सगल्यांनी सोशल मिडियाचेर विस्वास दवरचे पयलीं म्हायती सत्यापीत करप म्हत्वाचें. फकत व्हायरल जाता म्हणून व्हिडियोंतली म्हायती खरी अशें मानप चुकीचें.प्रसार माध्यम संस्थांनीय हे बाबतींत भुमिका घेवपाची गरज आसा. खऱ्या अर्थान पत्रकारिता करपी लोकांनी अशा बनावट यूट्युबरां कडल्यान आपलीं मर्यादा स्पश्टपणान थारावचीं, पत्रकारितेची संहिता पाळची आनी नागरिकां मदीं जागृताय निर्माण करची. सोशल मिडियाचेर अभिव्यक्ती स्वातंत्र्य आसा, पूण ताचो गैरवापर करून दुसऱ्यांक ब्लॅकमेल करप ही गंभीर आनी निंदनीय गजाल. दुसऱ्याचेर आरोप करून, समाजांत गैसमज पातळावन, कायद्याचो गैरवापर करून पयशे घेवपाक “युट्युब पत्रकार” म्हूण आपली वळख निर्माण करप समाजाक धोक्याचे आसा. ते खातीर आयचे घडीक कायदेशीर कारवाये वांगडाच समाजीक जागृताय आनी माध्यमांची जापसालदारकी गरजेची अशें म्हजें स्पश्ट मत.
सुदिन वि. कुर्डीकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
