भांगरभूंय | प्रतिनिधी
मुख्यमंत्रीः दिवचले युवा महोत्सव उमेदीन
भागरभूंय । प्रतिनिधी
दिवचलः भारतांत युवा शक्ती व्हड प्रमाणांत आसा. तीच देशाची व्हड ताकद. भारताक संवसारीक म्हासत्ता आनी विश्वगुरू करचे खातीर प्रधानमंत्री नरेंद्र मोदी हांणी योग्य पद्दतीन देशा खातीर तिचो वापर करपाचो निश्चेव केला. देश पयलीं ही संकल्पना वाडोवन सक्षम भारत निर्मितीचें सपन पुराय करचे खातीर सगळ्यांनी एकवटीत यत्न करचे, असो उलो मुख्यमंत्री डॉ. प्रमोद सावंत हांणी मारलो.
नेहरू युवा केंद्र, खेळां आनी युवा वेव्हार खातें भारत सरकार हांणी दिवचलच्या झांट्ये म्हाविद्यालय हांच्या जोडपालवान आयोजीत एका दिसाच्या युवा महोत्सवांत मुख्यमंत्री डॉ. सावंत उलयताले. ह्या वेळार केंद्रीय मंत्री श्रीपाद नायक, नेहरू येवा केंद्राचे कालिदास घाटवळ, प्राचार्य राजेंद्र कुमारजुवेंकार, डॉ. नितीन सावंत, प्रकाश मनुरे हाजीर आशिल्ले.
फुडल्या 25 वर्सांतली भारताचे उदरगतीची वाटचाल कशी आसची, ते खातीर तरणाट्यांचो एकवट तिगोवन दवरप, गुलामगिरीची मानसिकता बदलून आमी स्वयंपूर्ण भारतीय आसात ही संकल्पना रुजोवप, विकसीत भारत तशेंच क्लीन इंडिया आनी सक्षम भारत ही पंचसुत्री आपणावन तरणाट्यांक योग्य दिशा दिवप, तांची शक्त विधायक वावरा खातीर उपलब्ध करून दिवप हे खातीर युवा महोत्सव राज्य आनी देश पांवड्याचेर जातात, अशें मुख्यमंत्री डॉ. सावंत हांणी सांगलें. राज्य पांवड्याचेर तरणाट्यां कडेन संबंदीत खूबश्या येवजण्यांक अर्थीक तजवीज करतले, अशीय घोशणा तांणी केली.
केंद्रीय मंत्री श्रीपाद नायक हांणी सांगलें, भारत आयज म्हासत्तेचे दिशेन वाटचाल करता. फुडारांत तरणाट्यांची शक्तीचो खूब उबेग जातलो. राष्ट्रीय एकात्मता आनी विविधतायेंतल्यान एकता हे खातीर युवा शक्तीन विधायक वावर करपाची गरज आसा.
भारतीय परंपरा, विचारधारा आनी गिरेस्त संस्कतीचें दायज फुडें व्हरपाची जापसालदारकी युवा शक्तीची आसा. संवसाराक संस्कृती आनी संस्कार दिवपाचें काम भारत करता. प्रधानमंत्री मोदी हांणी संवसारांत भारताची प्रतिमा म्हान केल्या. हे फुडें तरणाट्यांनी देशाची उदरगत कशी करची हे खातीर युवा शक्तीक संघटीत करतात, अशें केंद्रीय मंत्री नायक हांणी सांगलें.
प्राचार्य कुमारजुवेंकार हांणी सांगलें, युवा शक्तीच्या हातांत फुडलो भारत घडोवपाची तांक आसा. तिचो विधायक वावरा खातीर वापर जावचो आनी देश बळिश्ट जावचो, हो उद्देश आसा.
कालिदास घाटवळ हांणी येवकार दिलो. तांणी आपल्या उलोवपांत युवा महोत्सवाचो हेतू स्पश्ट केलो.
दीसभर साबार सर्ती आनी कार्यावळी जाल्यो. तांकां व्हड प्रतिसाद मेळ्ळो.
ह्या वेळार युवा पुरस्कार जैतिवंत गुणाजी मांद्रेंकार तशेंच श्रीपाद नायक, राजेंद्र कुमारजुवेंकार हांचो भोवमान केलो. मानेस्तां हस्तुकीं महोत्सवाचें उक्तावण जालें. कात्यायनी घाटवळ हांणी सुत्रसंचालन केलें. डॉ. प्रवीण सावंत हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
