भांगरभूंय | प्रतिनिधी
खंयच्याय देशाचो फुडार ताच्या तरणाट्यांचेर अवलंबूनआसता, अशे जायते जाण म्हणटात. तातूंत सत्य आसा. युवा म्हणल्यार एक जागृत शक्त. ही उर्जा कोंड कशी एकेच कडेन सांचनासतना सतत व्हांवपाक जाय. तांकां सतत बरें काम करपाची संद मेळपाक जाय. तांणी केल्या दरेका बऱ्या- वायट कामाचेर देशाचो फुडार निंबून आसता, देखून तांचे मदीं बरी संस्कृताय, बरें आचार आनी विचार रुजोवन तांकां बरें वळण लावपाक जाय. ही जापसालदारकी आवय- बापायची, घरच्यांची, शिक्षकांची आनी समाजाचीय! तरणाट्या बळग्या कडेन आडनदर केली जाल्यार तें वायट मार्गार वता. वेगवेगळ्या व्यसना कडेन वचून तरणाटे आपली जीण वाट लायता. खूब व्यसनां आसात, पूण तातुंतलें एक व्यसन म्हणल्यार ड्रग्स.
प्रौढपणा कडेन वतना मनशाची मानसीक आनी भावनीक उदरगत जाता आनी ह्या काळाक किशोरावस्था अशें म्हण्टात. अशे किशोरावस्थेंत तरणाट्यांच्यो भावना संवेदनशील जातात. अशा वेळार ह्या वर्गाक मात्शे सुद्धा उलयल्यार तांच्या मनाक लागता. उलयल्लीं उतरां घेवन बसता. तांकां रोखडोच राग येता आनी ते दुख्खाक वेंग मारतात; आनी ह्याच कारणाक लागून चडशे तरणाटे ड्रग्सा कडेन वळटात. नात्यांत, करिअरांत वा हेर कारणांनी अपेस आयल्यार तरणाटे व्यसनांक लागतात. घराकडे आवय- बापायचें तापोवणी, शाळेत शिक्षकांच्यो उलोवण्यो, कामार गेल्यार बॉसाची कटकट ह्या सगळ्या त्रासाक लागून युवा आपलो आत्मविस्वास ल्हव ल्हव खंय तरी शेणयता आनी शांती मेळोवपा खातीर ह्या मार्गाचेर पावल दवरता. केन्ना- केन्ना इश्टांच्या वांगडा मजा म्हूण तर केन्ना आपूण कोण तरी धाडशी म्हूण दाखोवपा खातीर सुरवेक पिवपाक सुरवात करता आनी मागीर वेसन म्हणून संवय करून घेतात. तेन्ना इश्टां वांगडा सदांच हेडपी तरणाट्यांनी प्रत्येक गजाल विचार करून करपाक जाय.
आनीक एक कारण म्हणल्यार जायते नायक आनी नायिका हांचे कडल्यान सिरियल आनी सिनेमा वरवीं नकळतपणान ड्रग्साचो प्रचार जाता. कांय सिनेमा व्यसन, गुन्यांवांचेर आसतात. ताचो परिणाम म्हणल्यार भुरग्यांचे पांय वेसनांत आडकतात; कारण भुरग्यां खातीर हे नायक आनी नायिका आदर्श आसतात आनी तांचें अनुकरण करपाचे संवयीन खुबशे भुरगें आपली वाट लावन घेतात. अशा जायत्या कारणांक लागून जायत्या तरणाट्यांच्या जिविताक धोको निर्माण जाला. सिनेमा मळाचेर कांय व्यसनी मनीस आसात, पूण उरिल्ले बरे शिकिल्ले, उंचेल्या घराण्यांतले, पयशेकार आसात, हें आमी समजून घेवपाक जाय. सतत तांचें अनुकरण करप चुकीचें.
ह्या सगळ्या आडखळींचेर उपाय सोदून काडप खूब गरजेचें आसा. तुमच्या मुखार खंयच्याय प्रकारची मानसीक समस्या निर्माण जाल्यार त्यो एका विस्वासपात्र मनशा कडेन वा सल्लागारां कडेन वचून सोडोवपाक जाय. तांचे कडेन संवाद सादप आनी ताचेर योग्य उपाय सोदप गरजेचें. कारण हे समस्येंत घुटमळत रावचे परस तिचें मंथन जावन बरें तें विचार घेवपाचे आनी वायट तें सांडपाचे. पालक आनी शिक्षकांनी तरणाट्यांची वेदना समजून तांचेर फावो तें मलम लावपाक जाय. तांकां योग्य रितीन मार्गदर्शन करप हें तितलेंच म्हत्वाचें आनी तातूंत खर बदल घडोवन हाडप गरजेचें. तरणाट्यांनी सरभोंवतणच्यो घडणुको पळोवन, बरीं पुस्तकां वाचून, वेळ बरे तरेन पासार करून सदांच व्यसनां पसून पयस रावपाचो यत्न करपाक जाय. कितें बरें आनी कितें वायट हें चिंतून पळोवपाक जाय. भुल्लुसून वचप घातक थारूं येता.
आमची फुडली पिळगी वाटावपाची आसल्यार तांचे खातीर झगडचें पडटलें. तांकां समजून घेवन, तांकां बरो मार्ग आपणावपाक लावन आनी तांचें जिवीत उजवाडोवपाक जाय. काम कठीण आसलें, तरी यत्न केल्यार सोपें.
आकृती नायक
7218065944
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
