भांगरभूंय | प्रतिनिधी
भारत आड इंग्लंड हांच्या मदीं जाल्ली अँडरसन अँड तेंडुलकर क्रिकेट टॅस्ट माळ सामकींच हाय व्होल्टेज जाली. इतली की इंग्लीश क्रिकेट मोगी अॅशेस विसरतले. फुडल्या फावट भारता आड परत केन्ना टॅस्ट माळ जातली, हाची तांकां उमळशीक लागतली, अशी ही माळ जाली. निमाणें जो निकाल लागलो तो सारकोंच आसा अशें म्हणूं येता. दोनूय पंगडांनी जबरदस्त खेळ केलो. माळ बरोबरींत सुटली हो निकाल योग्यच म्हणपाचो. पांचूय टॅस्टी म्हणल्यार ब्रॅण्डन मॅक्कलमाचो बझबॉल आड गौतम गंभीराचो गमबॉल हांचें मदलें झूज. बझबॉल खेळांत आक्रमक बॅटींग ओव्हरी फाटल्यान उणेच उणें 5 धांवड्यांची सरासरी. बॉलरांक फोडून काडप आनी मॅचींत बॅटिंगेच्या नेटार फुडें सरप, धांव सरासरी प्रमाण 5 दिसांत 7 दिसांच्यो धांवड्यो उबारप. ह्या खेळान इंग्लंडाक बरेपैकी येस मेळ्ळा. जाल्यार गौतम गंभीराचो गमबॉल खेळ (गमबॉल हो शब्द हांवें तयार केला, फुडें तो रूढ जातलो) म्हणल्यार द्रविडी प्राणायाम खेळ. सुनील गावस्कर, राहुल द्रवीड, मुरली विजय, चेतेश्वर पुजारा आनी गौतम गंभीर खेळटालो तसलो खेळ. खेळपट्टेक दसून रावप. विकेट सोडप ना. कितलेंय बॉल फुकट गेल्यार जाता. धांवड्यो कितल्योय उण्यो आसूं, धीर सोडप ना. फुडल्यान बझबॉल खेळ चलूं वा आनीक खंयचो, शांत मनान खेळ करप. जाल्यार बझबॉल आड गमबॉल खेळां मदलें हें झूज निमाणें बरोबरींत सुटलें.
भारताची तोखणाय करपाक जाय कित्याक तर तांणी इंग्लंडाकूय अदींमदीं बझबॉल खेळ सोडून परंपरीक टॅस्ट क्रिकेट खेळपाक लायलें. भारताच्या बॉलरांनी सातत्यान इंग्लंडाच्या बॅट्समॅनांचेर शेक गाजयलो. बझबॉल खेळ आंगलट येता सो दिसल्या उपरांत इंग्लंडाच्या बॅट्समॅनांनीय बॅट सांबाळून धरून गमबॉल खेळ केलो. अदीं मदीं तांणी आक्रमक खेळ केलो. मात, ह्या खेळान तांकां जैत मेळोवप शक्य जालें ना. कित्याकतर भारतान तांच्या ह्या खेळाचेर उपाय सोदून काडिल्लो.
पयल्या टॅस्टींत भारतान बरी सुरवात केल्ली. मात, पाली भशेन शेपटी तुटपाची संवय भारताक म्हारग पडली. ह्या मॅचींत भारताचे सकयले बॅट्समॅन झटपट बाद जाले. दुसऱ्या डावांतूय तशेंच जालें. मात, ह्या डावांत एक व्हड खेळगडो नव्यान संवसारा मुखार येवपाची तयारी करता म्हूण दिश्टी पडलें. तो म्हणल्यार रवींद्र जडेजा. ताणें दुसऱ्या डावांत नाबाद 25 धांवड्यो काडल्यो. ही ताची इंग्लंड भोंवडी गाजोवपाची सुरवात आशिल्ली. ह्या नाबाद खेळाचें रुपांतर ताणें फुडल्या मॅचींनी व्हड धांवड्यांनी केलें आनी ताचो लाव भारतीय पंगडाक जालो. स्वता जडेजा एक परिपूर्ण बॅट्समॅन म्हूण संवसारा मुखार आयलो. ह्या सर्तींत ताणें 500 परस चड धांवड्यो काडपाचो विक्रम रचलो. बुमरान तो कित्याक संवसारांतलो उत्कृश्ट बॉलर हें दाखोवन दिलें.
दुसरी मॅच शुभमन गिलाची थारली. ताणें ह्या मॅचींत 400 परस चड धांवड्यो काडल्यो. हेर बॅट्समॅनांनी जबरदस्त खेळ केलो. जाल्यार आकाशदीपाच्या रूपान भारताक नवो स्टार बॉलर मेळ्ळो. आकाशदीप फुडाराक भारताचो सदचोच वांगडी जावपाक शकता. भारतान ही मॅच जिखून माळ बरोबरींत हाडली.
ह्या मॅचींनी खाशेली गजाल म्हणल्यार गंभीराच्या गमबॉल खेळाच्या आडोशाक रावन जैसवाल आनी ऋषभ पंतान आक्रमक खेळ करीत इंग्लंडाच्या बझबॉलाक तांच्याच पद्दतीन जाप दिवपाचेंय काम केलें. जैसवालाच्या खेळाक तर जसबॉल म्हूण नांव पडले. जाल्यार ऋषभ पंतान आपूण नवो 360 डिग्री बॅट्समॅन म्हूण दाखोवन दिलें.
तिसऱ्या मॅचींत भारत हारलो. मात, जिखपाची जिद्द दाखोवन गेलो. रवींद्र जडेजान आपल्या अणभवाच्या नेटार भारताक जिखोवन दिवपाचो यत्न केल्लो. मात, जालें ना. ही मॅच जडेजा, बुमरा आनी सिराज हांच्या जबरदस्त बेटिंगेक लागून सासणाक याद उरतली.
चवथ्या मॅचींत भारतान गमबॉलाचे जबरदस्त प्रदर्शन करतना इंग्लंडाच्या तोंडांतल्यान जैत ओडून व्हेलें. इतलें की इंग्लंडाचे खेळगडे निमाणे सामकेंच ज्याम जालें. मॅच सोंपपाक वरभर आसतना इंग्लंडाचो कॅप्टन स्टोक्सान भारता मुखार मॅच ड्रॉ सुटली आतां खेळ थांबोवया असो प्रस्ताव दवरलो. मात, भारतान तो न्हयकारलो, जडेजा आनी वॉशिंग्टन सुंदराक शेंकडें मारपाची संद दिली. भारताच्या निर्णयाचेर बेजार जावन स्टोक्सान जडेजा बरोबर वाद घालतना क्रावली, ब्रूक्साच्या बॉलिंगेचेर शेंकडो काडटलो काय असो प्रस्न केल्लो. ते वेळार ताचेर टिका जाल्ली. मात, पांचव्या मॅची पयली ताची अडचण लक्षांत आयली. ताचें सगलेंच बॉलर जखमी जाल्ल्यान निमाण्या मॅचींत खेळूंक ना. एकलो वोक्स खेळ्ळो, तोवूय पांचव्या मॅचीच्या पयल्याच दिसा जखमी जालो.
पांचव्या मॅचींत मोहम्मद सिराज आनी प्रसिध कृष्णान भारताक हारींतल्यान भायर काडीत विक्रमी जैत जोडलें. ह्या मॅचीन सिराजाक भारताचो अव्वल बॉलर म्हूण मुखार हाडलो. जसप्रीत बुमरा वर्कलोडा खातीर भायर बसलो, सिराजान पांचूय मॅची खेळून भारता खातीर मोलादीक कामगिरी केली. इंग्लंडाचे जखमी जाल्ले बॉलर, बुमराचो वर्कलोड पळयल्यार इंग्लंडान सेगीत 5 टॅस्ट मॅची खेळप कितलें कठीण ताचो अदमास सगल्यांकूच येतलो.
भारताच्या युवा पंगडान भारतीय क्रिकेटीचो फुडार पर्जळीत आसा हें दाखोवन दिलें. शुभमन गिल एक बरो फुडारी म्हूण मुखार येता. जडेजा, ऋषभ पंत, लोकेश राहुल हांचो अणभव पंगडाक बरो पडटा. जैसवाल, वॉशिंग्टन सुंदरान भारतीय पंगडांत आपली सुवात निश्चीत केली अशें म्हणूं येता. सिराज, प्रसिध आनी आकाशदीप हे भारताचे फुडले टॅस्ट हिरो आसतले हाचो दिश्टावोय ह्या सर्तींत जालो. जसप्रीत बुमरा फाटल्यान हें तिगूय भारताची बॉलींग येसस्वीपणान सांबाळूंक शकता म्हूण कळ्ळें. बुमराक आतां टी-20 वर्ल्ड कप आनी वन डे वर्ल्ड कपाचेर लक्ष केंद्रीत करपाक मेळटलें.
इंग्लंडाच्या खेळगड्यांनी भारतीय खेळगड्यांची खास करून सिराज, पंत, जडेजा हांची तोंड भरून तोखणाय केली. भारतान स्टोक्साक मॅच ड्रॉ सोडोवया म्हूण प्रस्ताव दितना जडेजा बरोबर घाल्लो वाद कुशीक दवरून इंग्लीश खेळगड्यांचीय तोखणाय केली. स्टोक्स एक म्हान खेळगडो म्हूण ताची तोखणाय केली. वोक्स, पंत जखमी जावनूय खेळ्ळे म्हूण तांचें नांव इतिहासांत उरतलें. वोक्स जखमी जालो तेन्ना करुण नायरान चवथी धांव घेवंक ना, तर वोक्सा कडेन लक्ष दिलें, ही खिलाडू वृत्तीय सगल्यांक याद उरतली. भारत आड इंग्लंड टॅस्ट माळ म्हणल्यार टॅस्ट क्रिकेटीक मेळिल्ली नवसंजीवनी थारली.
अमर पाटील
7507495151
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
