भांगरभूंय | प्रतिनिधी
भारत आनी येजमान दक्षीण आफ्रिका ह्या पंगडां मदीं आयच्यान चार टी-20 मॅचींची माळ सुरू जाता. भारताचो क्रिकेट पंगड सध्या परिवर्तनाच्या टप्प्यांतल्यान वता, हे फाटभुंयेर संजू सॅमसन आनी अभिषेक शर्मा सारक्या दुसरे फळयेंतले खेळगडे घेवन गेल्लो पंगड माळ जिखपाच्या हावेसान मैदानांत देंवतलो.
स्वताचेर लागिल्लो दुसऱ्या दर्जाचे खेळगडे हो ठपको पुसून उडोवन स्वताक ह्या प्रकारा खातीर आमी पयली पसंती आसा हें सिद्ध करपाक चडशे खेळगडे इत्सूख आसतले.
हालींच बांगलादेशा आड जाल्ले टी-20 माळेंत सॅमसनाक सगल्या मॅचींनी डावाची सुरवात करपाची संद मेळिल्ली. ताणें 47 मॅचींनी 111 धांवड्यो करून मेळिल्ले संदीचें भांगर केल्लें.
आंतरराष्ट्रीय टी-20त रोहीत शर्मान निवृत्ती घेतिल्ल्यान, ओपनराची एक सुवात रिती जाल्या, ताचेर सॅमसनाची नदर आसतली. ते खातीर तो दक्षीण आफ्रिके आड बरें प्रदर्शन करून नियमीत ओपनराच्या रुपान आपली सुवात घटमूट करपाच्या यत्नांत आसतलो.
अभिषेका खातीर लेगीत ही भोंवडी म्हत्वाची आसा. दाव्या हातान खेळपी अभिषेकान जुलय म्हयन्यांत हरारेंत झिम्बाब्वे आड 47 बॉलांनी आक्रमक शेंकडो मारून आपली प्रतिभा दाखोवन दिल्ली. पूण, हेर मॅचींनी ताणें 0, 10, 14, 16, 15, 4 अशें निरशेणी हाडपी प्रदर्शन केल्लें. पंगडांतली आपली सुवात घटमूट करपाक अभिषेकाक आपल्या प्रदर्शनांत सातत्य हाडचें पडटलें. तशेंच स्पिन बॉलींग लेगीत पर्जळपाक सोदतलो.
तिलक वर्माची लेगीत काणी अभिषेका भशेनूच आसा. ऑगस्ट 2023त वॅस्ट इंडिजा आडचे टी-20 मॅचींत ताणें जबरदस्त प्रदर्शन करून आपले कारकिर्दीक सुरवात केल्ली. पूण, ते उपरांत ताका म्हणपा सारकें प्रदर्शन करपाक जमूंक ना. पदार्पणाचे मॅची उपरांत तो 12 मॅचींनी खेळ्ळा. पूण, ताका फकत एकूच अर्द शेंकडो मारपाक शक्य जाला. जानेवारींत अफगाणिस्ताना आड जाल्ले टी-20 माळे उपरांत तो पंगडांत दिसूंक ना. दक्षीण आफ्रिके आड बरें प्रदर्शन करून निवड समितीचें लक्ष आपले वटेन ओडपाचो ताचो यत्न आसतलो. तशेंच ताणें ऑफ स्पिन बॉलींग लेगीत नेमान करपाक सुरवात केल्या.
तशेंच विकेटकीपर बॅट्समन जितेश शर्मा आनी स्पिनर वरुण चक्रवर्ती हांचे खातीर ही माळ म्हत्वाची आसा.
नवीन फास्ट बॉलींग विभागाचेर लेगीत निवड समितीची नदर आसतली. अर्शदीप सिंग, आवेश खान, व्यशांक विजयकुमार आनी यश दयाल हे फास्ट बॉलींग विभागाचें प्रतिनिधित्व करतले.
अर्शदीप आनी आवेश खान हांणी आंतरराष्ट्रीय पांवड्यार बरें प्रदर्शन केलां. व्यशांक आनी दयाल हांणी आयपीएलांत बरें प्रदर्शन करून राष्ट्रीय पंगडांत सुवात मेळयल्या आनी आंतरराष्ट्रीय पांवड्यार लेगीत प्रदर्शनांत सातत्य राखपाचो तांचो यत्न आसतलो.
रमणदीप सिंगान अंदूंचे आयपीएलांत उत्कृश्ट प्रदर्शन केल्लें. तें सातत्य हे भोंवडेर लेगीत दवरपाक तो इत्सूक आसतलो. रमणदीप सकयले सुवातेर आक्रमक बॅटींग करता. तशेंच मध्यमगतीन बॉलींग लेगीत घालता आनी ताची फिल्डींग लेगीत उचेंल्या पांवड्याची आसा.
पंगडांतले वरिश्ठ खेळगडे जशे मुखेली सूर्यकुमार यादव, हार्दीक पांड्या आनी टॅस्ट पंगडाचो एकोडो वांगडी अक्षर पटेल हांच्या कडल्यान बऱ्या प्रदर्शनाची आस्त आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
