भांगरभूंय | प्रतिनिधी
मंत्री ढवळीकार: ‘अंत्रुज घुडियो’ आयोजीत ‘कला मेळ’ कार्यावळ उमेदीन
फोंडें: युवाकांनी येवपी खर आव्हानां स्विकारून आत्मविस्वासान काम केल्यार येस निश्चीतूच मेळटलें. मेळिल्ले येस तशेंच दवरपाचो यत्न तरणाट्यांनी करचो. तरणाट्यांक उर्बा दिवपा खातीर सतत उपक्रम आयोजीत करून बरी माची मेळोवन दिवपाचो यत्न जावपाक जाय अशें वीज मंत्री सुदिन ढवळीकार हांणी सांगलें.
फोंडेंच्या राजीव गांधी कला मंदीर सभाघरांत ‘अंत्रुज घुडियो’ वतीन राज्य सरकाराच्या कला आनी संस्कृती खात्याच्या सहकार्यान आयोजीत केल्ले ‘कला मेळ’ हे कार्यावळीच्या उक्तावणा वेळार मंत्री ढवळीकार उलयताले. ह्या वेळार माचयेर फोंडें पालिकेची नगरसेविका गीताली तळावलीकार, आमिना नायक, अंत्रुज घुडीयोचे अध्यक्ष साईदत्त कामत, शिवानी फडते, सुविधा नायक आनी युतिका सतरकार हाजीर आशिल्ले.
ह्या वेळार नगरसेविका गीताली तळावलीकार हांणी आपले विचार उक्तायले. साईदत्त कामत हांणी प्रास्तावीक आनी सगळ्यांक येवकार दिलो. कार्यावळीचें सुत्रसंचालन कन्या पावसे कामत हांणी केलें. सांजवेळार उसरां सगळ्या सर्तींचो निकाल जाहीर केलो.
फटलीं दोन वर्सां कोरोना महामारीक लागून कला तशेंच उद्देगीक मळार व्हड लुकसाण जालां. म्हामारीक लागून सदांच जावपी उलाढाल बंद जाली. पूण फुडाराक कला आनी उद्देगीक मळाची उदरगत करपा खातीर बर्या कामाची अपेक्षा आसा. तरणाट्यांनी बरे कलागूण आपणायतना कला मेळ सारक्या कार्यावळींनी वांटो घेवप गरजेचें. ताका लागून फुडाराक लेगीत गोंयचे भुंयेर कला आनी संस्कृती तशीच तिगून उरतली, अशें मंत्री सुदीन ढवळीकार हांणी सांगलें.
कला मेळ कार्यावळींत मंगेशी हांगच्या वी. डी. आनी एस. वी. वागळे हायस्कुलाच्या विद्यार्थी पंगडाक पयलें इनाम फावो जालें. दुसरें रवींद्र केळेकार ज्ञानमंदीर, मडगांव आनी तिसरें सर्वोदय शिक्षण संस्था, कुडचडें हांकां इनामां फावो जालीं. नाचुया तालार सर्तींत पयलें इनाम वी.डी. आनी एस. वी. वागळे हायस्कूल, मंगेशी, दुसरें आरपीआरएस हायस्कूल, बांदोडें आनी तिसरें रवींद्र केळेकार ज्ञानमंदीर, मडगांव, जाल्यार लोकगीत सर्तींत पयलें इनाम सरकारी हायस्कूल, सावयवेरें, दुसरें सर्वोदय शिक्षण संस्था, कुडचडें आनी तिसरें ए. जे. डी. अल्मेदा हायस्कूल, फोंडें, तशेंच टिवल्यो बावल्यो सर्तींत पयलें इनाम वी. डी. आनी एस. वी. वागळे, मंगेशी, दुसरें रवींद्र केळेकार ज्ञानमंदीर, मडगांव आनी तिसरें इनाम मनोविकास इंग्लीश स्कूल हांकां फावो जालें. तकल मकल सर्तींत पयलें इनाम रवींद्र केळेकार ज्ञानमंदीर, मडगांव, दुसरें वी. डी. आनी एस. वी. वागळे, मंगेशी आनी तिसरें सर्वोदय शिक्षण संस्था, कुडचडें, तशेंच आयकात आय कात सर्तींत पयलें इनाम रवींद्र केळेकार ज्ञानमंदी, मडगांव, दुसरें वी. डी. आनी एस. वी. वागळे, मंगेशी आनी तिसरें मनोविकास इंग्लीश स्कूल, तशेंच सवंग सर्तींत पयलें इनाम रवींद्र केळेकार ज्ञानमंदीर, दुसरें आरपीआरएस हायस्कूल आनी तिसरें इनाम सर्वोदय शिक्षण संस्थेक फावो जालें. रंगीत पोती सर्तींत पयलें इनाम सर्वोदय शिक्षण संस्था, दुसरें वी.डी.आनी एस.वी. वागळे आनी ए. जे. डी.अल्मेदा हायस्कूल हांकां तिसरें इनाम मेळ्ळें. कॉमीक सर्तींत पयलें इनाम ए. जे. डी. अल्मेदा हायस्कूल, आरपीआरएस हायस्कूल, बांदोडा दुसरें आनी तिसरें सरकारी हायस्कूल, सावयवेरें हांकां इनामां फावो जालीं. ह्या वेळार हाजीर आशिल्ल्या मानेस्तां हस्तुकीं इनामां भेटयलीं. माचयेर मिथील ढवळीकार आनी खेळगडो अनुरा प्रभूदेसाय हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
