भांगरभूंय | प्रतिनिधी
दैवज्ञ ब्राह्मण युवा संघटनेक 15 वर्सां जालीं. ते निमतान…..
सामाजीक बदल घडोवपाचे नदरेन प्रत्येक समाजांत युवा संघटन सक्रिय आसप गरजेचें. अ. गों. दैवज्ञ ब्राह्मण युथ असोसिएशन हाचें एक बरें उदाहरण. हें अशें असोसिएशन जें समाजांतले युवा पिळगेक, तांच्या सुप्त गुणांक वाव दिवपाच्या नजरेन एक माची दिता. ताणें फाटलीं पंदरा वर्सां सातत्यान काम केलां. दैवज्ञांचें युवा अस्तित्व राखून समाज बांधणीचें बरें काम करपी हे संघटणेक परबीं फावतात. ताका हालींच 15 वर्सां जालीं.
दैवज्ञ समाज हो कला, कारागिरीन नटिल्लो. शिंगाराचो, भांगरांच्या मनशांचो हो समाज. पूण आयच्या जगात वावुरतना सुवर्णकलेच्या बसकेक हेर समाज देंविल्ल्यान ह्या समाजाची अवस्था खालावल्या. फकत शिक्षणूच तांकां आतां वाटाव पाक शकता, अशें म्हणपाची पाळी आयल्या. म्हूण दैवज्ञ ब्राह्मण युवा संघटना शिक्षणांत अर्थीक मदत दिवन आपल्या भावंडांक आधार आनी उर्बा दिता. रोजगाराची संद मेळोवन दिवपाक नव्या- नव्या करियराची वळख समाजाक दिता. दैवज्ञ युवकांक करियर गायडन्स दिवन जागृत दवरता. अर्थीक बळगें दिवपाचे नदरेन फावो तो वावर करता.
नव्या युगा प्रमाण दैवज्ञ युवकांचींय परिमाणां बदल्ल्यांत. जिवितांत करियर करताना दैवज्ञ समाजाच्या युवकांक स्वताची वळख करून दिवपाचो हे युवा संघटणेचो वावर आपले परीन चालू आसा. जांका स्वताची वळख जाल्या ते तरणाटे समाजा भितर आनी जगांत खंयूय काम करूंक शकतात. समाजां भितर काम करतना जो आनंद मेळटा तो सगळ्या आनंदा परस व्हडलो हेंच युवा संघटणेन दाखोवन दिलां.
गोंयांत कितल्योशोच जाती-जमातीच्यो युवा संघटणा आसात. थोड्यो कार्यरत आसात तर थोड्यांचें कार्य सरलां. कांय जाणांचे कार्यक्रम जातात तर कार्यकर्ते जायनात. दैवज्ञ समाजाची ही युवा संघटना फाटलीं पंदरा वर्सां आपलें संघटन वाडयत आसा. गोंयभर कार्यक्रम घेवन आपले परीन अर्थीक बळगें उखलून हो वावर करता हें तोखणायेचें. आपल्या समाजभावांक तशेंच हेर समाजांतल्या लोकां खातीरूय ते वावुरतात. गरीब, गरजू भुरग्यांची शिक्षणीक भूक भागोवपा खातीर, तांकां शिक्षणीक साहित्याची पुरवण करप, शाळांनी करियर गायडन्साचे सेमिनार आयोजीत करप, बालदिन साजरे करप.
हे संघटनेन कोविड काळांत केल्लो वावर खूबच तोखणायेचो. जिवाची पर्वा करिनासतना युवा वांगड्यांनी घरा-घरांनी वचून रेशन दिवपाचो वावर केला. सरकारानूय हाची दखल घेतल्या. हे संघटनेचो प्रत्येक कार्यकर्तो म्हणल्यार एक स्वयंसेवक जावन आसा. कलाक्षेत्रा वांगडा भलायकी सुविधा, तशेंच सातत्यान जावपी क्रिकेट आनी कॅरम सर्ती हांचें वेवसायीक पद्धतीन आयोजन करपी अशी ही संस्था पुराय गोंयचो अभिमान जागयता. पिकॅन नरकासूर ही संकल्पना तांणी साकारली. पुराय गोंयाक दिली.
सर्तींत आनी उत्सवांत घरांतल्या मनशांक सामावन घेवन सामाजीक बांधीलकी कशी सांबाळप हें युवा संघटनेन समाजाक दाखोवन दिलां. संस्थेतले अश्टपैलू व्यक्तिमत्व, अध्यक्ष प्रशील साळकार हे आपल्या कार्यकाळांत कार्यकारिणीक घेवन संस्था पंदरा वर्सांचे पावंडे हुपता ताचे साक्षीदार आसात. ताच्या संघटन वावराची आनी फुडारपणाची तोखणाय करप गरजेची. संस्थेचे सचीव रोहित वेर्णेकार, भांडारी भूषण शिरोडकार तशेंच पवन रांगणेकार, वृंदावन रायकार, बबिता लोटलीकार, गौरिश लोटलीकार, ऋषभ रायकार, आलेख लोटलीकार अशा कितल्याशाच नांवांचे खांबे ही संघटना उबारून आपल्या भुजांचेर घेवन आसात. पंदरा वर्सांची पुर्ती जाता. सगल्यांक परबीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
