भांगरभूंय | प्रतिनिधी
खबरां संस्था
पॅरीसः कॅप्टन म्हणून पयली मॅच खेळपी किलियन एम्बापेच्या दोन गोलांच्या नेटार फ्रान्सान युरोपियन चॅम्पियन फुटबॉल 2024चे पात्रतायेचे मॅचींत नेदरलँडाचेर 4-0 अशें व्हड जैत मेळयलें. पोरूच्या संवसारीक करंड सर्तींत सगल्यांत चड गोल करून ‘गोल्डन बूट’ पुरस्काराचो मानकरी थारल्ल्या एम्बापेन नव्या वर्सांतय गोल करपाची आपली भूक आसा तशी दवोरल्या.
पोरूं संवसारीक करंड सर्ती उपरांत ह्युगो लॉरिस निवृत्त जाल्या उपरांत एम्बापेची फ्रान्साचो कॅप्टन म्हणून निवड केल्ली. कॅप्टन म्हणून आपले पयलेच मॅचींत ताणे अप्रतीम खेळ केलो, हे मॅचींत फ्रान्सान सुरवेक सावन खेळार आपलें वर्चस्व दवोरलें. खेळाच्या दुसऱ्याच मिनटाक एम्बापेच्या पालवान अॅन्टोन ग्रीझमनान फ्रान्सा खातीर पयलो गोल केलो.
आठव्या मिनटाक दायोत उपामेकानो जाल्यार 21व्या मिनटाक एम्बापेन केल्ल्या गोलांन पयल्या सत्रांत फ्रान्सा कडेन 3-0 अशी आघाडी आशिल्ली. दुसऱ्या सत्रांत नेदरलॅडाच्या बचाव फळयेन फ्रान्साचें आक्रमण कांय प्रमाणांत आडायलें. मात 88व्या मिनटाक एम्बापेन आपलो दुसरो गोल करून फ्रान्साक 4-0 अशें जैत मेळोवन दिले.
लुकाकूची हॅट्ट्रीक
स्टार फॉरवर्ड रोमेलू लुकाकूचे हॅट्ट्रिकेच्या नेटार बेल्जियमान युरो पात्रतातेच्या मॅचींत स्वीडनकाल 3-0 अशें हारयलें. लुकाकून पयल्या सत्रांत 35 व्या आनी दुसऱ्या सत्रांत 49 आनी 82 व्या मिनटाक गोल केले. हे मॅचींत स्वीडनाच्या 41 वर्सा पिरायेच्या इलाटान इब्राहिमोव्हिचाचो बदली खेळगडो म्हणून खेळचें पडलें. युरो पात्रतायेच्या मॅचींत खेळपी इब्राहिमोव्हीच दुसरो सगल्यांत जाण्टो खेळगडो थारलो.. दुसरे एके मॅचीत झेक प्रजासत्ताकान पोलंडाक 3-1 अशें हारयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
