भांगरभूंय | प्रतिनिधी
पणजी : अर्थसंकल्पीय अधिवेशनांत विरोधी पक्ष फुडारी युरी आलेमांव हांच्या बऱ्या कामगिरीक लागून सत्ताधाऱ्यां परस विरोधकांची कामगिरी प्रभावी थारली. उदकाचो उणाव, एनईपी, म्हादयचो प्रस्न तशेंच तरेकवार विधेयकांचेर सरकाराची कांय प्रमाणांत कोंयडी करपाक विरोधकांक येस आयलें.
गोवा फॉरवर्डाचे विजय सरदेसाय हे अधिवेशनांत सेगीत आक्रमक आसतात. ह्या अधिवेशनांत लेगीत तांणी सरकाराचेर आरोप करपा सयत कोंयडी करपाचे यत्न केले. युरी आलेमांव आनी कार्लोस फेरेरा हांणी मुद्याक धरून प्रस्न उपस्थीत केल्ल्यान विजया परस युरी आनी कार्लोसाचो प्रभाव जाणवलो. युरी, कार्लोसा उपरांत आपाचे वेंझी व्हिएगस हांणी प्रस्नोत्तरा सयत चर्चे वेळार लेगीत बरे मुद्दे मांडले. आरजीचे विरेश बोरकार हांकां बरेच खेपे सभापतीं कडल्यान तंबी मेळटा. हे खेपे मात सभाघराच्या नेमाक पाळो दितना तांणी मुद्देसूद विचार मांडले.
हे अधिवेशन तिनूच दिसांचें आशिल्लें. शुक्रार नाशील्ल्यान खाजगी प्रस्ताव नाशिल्ले. तिनूच दिसांक लागून वेळेचेर मर्यादा आशिल्ली. तरी लेगीत उदकाचो उणाव, पोरणें गोंय बेकायदाे बांदकामां, मदल्या सुटयेंतलें खाण ह्या विशयाचेर विरोधकांक सरकाराक धारेर धरपाक येस आयले. तशेंच ह्या अधिवेशनांत मंत्री वा सत्ताधारी आमदारां परस विरोधी आमदारांक उलोवपाची चड संद मेळ्ळी. सगळ्या आमदारांक उलोपाची संद दिवपांत सभापती रमेश तवडकार हांची लेगीत भुमिका म्हत्वाची थारली.
भोवमताच्या आदारान विधेयकांक मान्यताय घेवपाक सरकाराक येस आयले आसले तरी आवटडोअर जायरात विधेयकाचेर सरकाराक फाटीं सरचें पडलें. आमदार कार्लोस फेरेरा आनी व्हेंझी व्हिएगस हांणी ह्या विधेयकांतले उणाव निदर्शनाक हाडले. हाका लागून हें विधेयक चिकित्सा समिती कडेन धाडप सरकाराक भाग पाडले. ह्या वेळार सगळे विरोधक एक आशिल्ल्याचे जाणवले.
खाजगी विद्यापीठ दुरुस्ती विधेयक सरकारान संमत केले आसले तरी चर्चेत विरोधकांनी बाजी मारली. खाजगी विद्यापिठां स्थापन करतना थळाव्या लोकांंक रोजगार दिवपाची तजवीज आसपाक जाय. थळाव्या विद्यार्थ्यांक सवलती मेळपाक जाय. हे विशी विधेयकांत ठोस तजवीज नाशिल्ल्याचो मुद्दो युरी आलेमांव, एल्टन डिकॉस्टा हांणी मांडलो. खाजगी विद्यापिठांच्या दर्जाचो विचार जावपाक जाय. ऑक्सफर्ड, स्टॅनफोर्ड, एमआयटी सारक्या दर्जेदार विद्यापिठांचे कॅम्पस गोंयांत जावपाक जाय. गुणवत्ता नाशिल्ली आनी विद्यापिठाच्या मुखेल्या विशी दुबाव आशिल्ली विद्यापिठां लावकारी थारची ना, असो मुद्दो विजय सरदेसाय हांणी मांडलो.
प्रस्नोत्तर सत्राचो विचार केलो जाल्यार दर दिसा तीन ते चार तारांकीत प्रस्नाचेर चर्चा जाताली. विरोधकां वतीन बरेच प्रस्न एकठांय आशिल्ले.
पुराय अधिवेशनांत युरी आलेमांव हांचे 54, एल्टन डिकॉस्टा हांचे 48 जाल्यार कार्लोस फेरेरा हांचे 48 प्रस्न आशिल्ले. हातूत तारांकीत आनी अतारांकीत प्रस्नांचो आस्पाव आसा.
आम आदमी पक्षाचे व्हेंझी व्हिएगस हांचे 50 जाल्यार क्रुज सिल्वा हांचे 53 प्रस्न आशिल्ले. गोवा फॉरवर्डाचे विजय सरदेसाय हांचे 53 जाल्यार आरजीचे विरेश बोरकार हांचे 52 प्रस्न आशिल्ले. बरेच प्रस्न दोन वा दोन परस चड आमदारांचे आशिल्ल्यान प्रस्नांचो आकडो लागी लागी सारकोच आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
