भांगरभूंय | प्रतिनिधी
विधानसभा अधिवेशनांत 19 जुलयाक येतले चर्चेक
भांगरभूंय । प्रतिनिधी
पणजीः विरोधी पक्ष फुडारी युरी आलेमांव हांणी बिरेस्तारा पक्षांतर बंदी कायदो, विधवा भेदभाव, जनमत कौल दीस आनी अनुसुचीत जमातीं खातीर राजकी आरक्षण ह्या विशयांचेर चार खाजगी वांगडी थाराव सादर केले. विधानसभेच्या कामकाजांत ते थाराव शुक्रारा 19 जुलयाक चर्चे खातीर येतले.
आपणे परतून एकदां गोंय आनी गोंयकारांच्या हिताचे मुद्दे उपस्थीत केल्यात. आपल्याक आस्त आसा, हे थाराव सुचीबद्ध जातले आनी गोंय विधानसभेचे सभापती रमेश तवडकार ते विधानसभा कामकाजांत दाखल करतले आनी ताचेर खोलायेन चर्चा करपाक दितले, अशें युरी आलेमांव हांणी म्हणलां.
भाजप सरकार सभाघरांत चर्चे खातीर आयिल्ल्या खाजगी वांगडी थारावांची गांभिर्यान दखल घेतलें आनी सभाघरांत दिल्ल्या आस्वासनांचेर गतीन कार्यवाही करतले. विधवा भेदभावाची अन्यायकारक प्रथा बंद करचे खातीर कायदो हाडपाक सरकारान आयज मेरेन कांयच करूंक ना, हाचें आपल्याक वायट दिसता, अशें आलेमांव हांणी म्हणलां.
पक्षांतर बंदी कायदो घटमूट करचे खातीर भारतीय राज्यघटनेच्या धाव्या अनुसुचीत सुदारणा करपाचो वेळ आयला. अनुसुचीत जमातींक राजकी आरक्षण दिवपाची गरज आसा. गोंय विधानसभेच्या सगळ्या 40 वांग्ड्यांनी ह्या दोनूय थारावांक तेंको दिवचो आनी एकवटींत गरजेचीं पावलां उखलचे खातीर केंद्र सरकाराचेर चेपण हाडपाक जाय, अशें आलेमांव हांणी सांगलें.
गोंय सरकार जनमत कौल दीस राज्य पांवड्याचेर सरकारी कार्यावळ म्हूण घोशीत करपाचें टाळटा. जनमत कौलान गोंयची वळख तिगोवन दवरल्या. इतिहासीक, म्हत्वाच्या ह्या दिसा दरेका आमदाराचें मत समजून घेवपाक आपलो थाराव निश्चीत मजत करतलो. अस्मिताय दिसाचो उगडास भव्य कार्यावळी वरवीं करप ही आमची लागणूक आसा, अशें आलेमांव हांणी म्हणलां. येता त्या विधानसभा अधिवेशनांत 19, आनी 26 जुलय तशेंच 2 ऑगस्टाक खाजगी वांगडी थाराव चर्चे खातीर येतले. दरेका शुक्रारा जो खाजगी वांगड्यांचो दीस आसा, 5 थाराव सभापती वरवीं दाखल करून ताचेर चर्चा करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
