भांगरभूंय | प्रतिनिधी
पणजी: चिंबला प्रस्तावीत आशिल्ल्या ‘युनिटी मॉल’ प्रकल्पा आड थळाव्या ग्रामस्थांनी आपलो लढो अदीक खर केलो. आयज आंदोलनाचो ४४वो दीस आशिल्ल्यान चिंबलकरांनी पणजेच्या आझाद मैदानार धडक मोर्चा काडीत सरकाराक एका दिवसाचो अल्टिमेटम दिलो. प्रकल्प स्थलांतरणा विशीं प्रशासना कडल्यान फकत तोंडान आस्वासनां मेळटात, अधिकृत पद्धतीन कितेंच मेळनाशिल्ल्यान आंदोलकांमदीं संभ्रम आनी खर असंतोश पातळिल्ल्याचें गोविंद शिरोडकार हांणी म्हणलें.
प्रशासकीय कळावाचेर ग्रामस्थांची तिडक
फाटल्या देड म्हयन्या सावन चिंबला सुरू आशिल्लें हें आंदोलन आतां निर्णायक टप्प्यार पावलां. आयतारा आंदोलकांनी आआंदोलकांनी घोशणा दित आनी हातांत तक्टो धरून सरकाराचो निशेध केलो. जो मेरेन सामान्य प्रशासन विभाग वा पर्यटन विभागा कडल्यान प्रकल्प स्थलांतरणाविशीं अधिकृत लेखी आस्वासन मेळना तो मेरेन आझाद मैदानांतल्यान फाटीं सरचे ना, अशी शिटकावणी तांणी दिली.
आंदोलक अजय खोलकार हांणी मिडिया कडेन उलयतना सांगलें, ‘सरकार तुमच्या दारार’ सारकिल्ल्यो कार्यावळी राबोवन सरकार मंत्रिमंडळ निर्णयांची जाहीर घोशणा करता. मात, चिंबलाच्या प्रकल्पाविशीं आजूनय कसलीच अधिकृत भुमिका घेवपाक तयार ना. आमकां सेगीत आस्वासनां दिलीं. मात प्रत्यक्षांत प्रकल्प हालोवपाची कसलीच कायदेशीर प्रक्रिया सुरू जाल्ल्याचें दिसना. जो मेरेन आमकां ह्या प्रकल्पाचो सविस्तर प्रकल्प अहवाल आनी स्थलांतरणाचें अधिकृत पत्र मेळना, तो मेरेन आमचो प्रशासनाचेर विस्वास बसचो ना, अशें खोलकार हांणी नमूद केलें.
उदरगतीक विरोध ना, मात विनाश नाका!
चिंबलकारांनी आपले भुमिकेचो पुनरुच्चार करतना सांगलें, ते राज्याचे उदरगती आड येना. मात, थळाव्या समुदायाच्या हिताचो विचार करिनासतना आनी पर्यावरणाचें लुकसाण करून लादिल्ले प्रकल्प मान्य नात. युनिटी मॉलाक लागून गांवची शांतता आनी मूळ स्वरूप धोक्यांत येतलें, असो भंय ग्रामस्थांक दिसता. जर सरकारान २४ वरांनी ठोस पावलां उखलूंक नात, जर हें आंदोलन पुराय राज्यांत अदीक खर स्वरूपांत पातळटलें आनी उपोशणाची पद्धतूय बदलतले, अशी खर शिटकावणी ग्रामस्थांनी दिली.
ग्रामस्थांच्या मतान, सरकार फकत वेळ काडून जनतेची दिकाभूल करतात. कॅबिनेटचे बसकेंत ह्या विशयाचेर स्पश्ट निर्णय जातलो अशी सगल्यांक अपेक्षा आशिल्ली, मात तशें घडूंक ना. हाका लागून आतां लोकशायेच्या मार्गान पणजेच्या आझाद मैदानावेल्यान सरकाराक जाब विचारपाचो निर्णय चिंबलकरांनी घेतला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
