भांगरभूंय | प्रतिनिधी
पणजी: चिंबल हांगचो युनिटी मॉल प्रकल्प बेकायदाे आशिल्ल्यान तो रद्द करपा खातीर ग्रामस्थांचें आंदोलन सुरूच आसा. प्रकल्प रद्द जायना, तो मेरेन आंदोलन सुरूच उरतलें, अशें चिंबल जैवविविधताय समितीचे मुखेली गोविंद शिरोडकार हांणी सांगलें. आयतारा सावन हें आंदोलन सुरू आसा.
चिंबल कदंबा पठाराचेर जावपी युनिटी मॉलाक ग्रामस्थांचो विरोध आसा. जिल्हाे पंचायत वेंचणुकेची आचारसंहिता सोंपले उपरांत गोंय पर्यटन उदरगत म्हामंडळान युनिटी मॉलाच्या कामाक सुरवात केली. काँग्रेस आमदारां सयत आरजीचे आमदार विरेश बोरकार हांणी लेगीत आंदोलनाक तेंको दिला. युनिटी मॉला आड उच्च न्यायालयांत चिंबल जैवविविधताय समितीन याचिका दाखल केल्ली. हे याचिकेचो सोमारा उच्च न्यायालयांत उल्लेख जालो तेन्ना न्यायाधिशान प्रधान सत्र न्यायालयांत अर्ज सादर करपाचे निदेश दिले. हाका लागून चिंबल जैवविविधताय समितीन प्रधान सत्र न्यायालया मुखार स्थगितीची मागणी करपी अर्ज दाखल केला. ह्या अर्जाचेर आजून निर्णय जावंक ना.
युनिटी मॉल प्रकल्पाक लागून तोयार तळ्याक धोको निर्माण जातलो. ह्या प्रकल्पाचो चिंबलाच्या लोकांक कसलोच लाव ना. तरी लेगीत सरकार हो प्रकल्प जबरदस्तीन लादता, असो आरोप चिंबलचे ग्रामस्थ करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
