भांगरभूंय | प्रतिनिधी
मुख्यमंत्र्यांनी घेतली राज्यपालांची भेट
भांगरभूंय । प्रतिनिधी
पणजी : मंत्रीमंडळ फेरबदला विशीं नेटान हालचाली जायत आसतानाच मुख्यमंत्री डॉ. प्रमोद सावंत हांणी बिरेस्तारा दनपारां राज्यपाल पी. एस. श्रीधरन पिल्लई हांची राजभवनाचेर भेट घेतली. फार्मसी म्हाविद्यालया सयत चार म्हाविद्यालयां विद्यापीठ कॅम्पसांत स्थलांतरीत करपा विशीं भेटींत चर्चा जाली, अशी म्हायती गोपांनी दिली. मंत्रीमंडळ फेरबदलाची चर्चा चालू आसतना मुख्यमंत्र्यांनी राज्यपालांची भेट घेतिल्ल्यान चर्चे विशीं उमळशीक वाडल्या.
भारतीय जनता पक्षाचे कोर समितीक मगो सरकारांत नाका. मगोचें मंत्रीपद आनी म्हामंडळपद काडलें जाल्यार भाजपाच्या दोन आमदारांक पदां दिवप शक्य जातलें. भोवमतांतलें सरकार आसून लेगीत कांय भाजप आमदारां कडेन पद ना. कोर समितीच्या वांगड्यानी ही गजाल बसकेंत मांडली. भारतीय जनता पक्षाच्या संसदीय पंगडाचो विचार केलो जाल्यार खूबश्या आमदारांक लेगीत मगोक मंत्रीपद दिल्लें नाका. मंत्रीमंडळ फेररचणुकेचे प्रक्रियेंत मगोचें मंत्रीपद आडखळ थारता. मडकय आनी मांद्रें ह्या दोन मतदारसंघांत मगोचे आमदार आसले तरी प्रियोळ, फोंडें, शिरोडें मतदारसंघांत मगो पक्षा सावन भाजपाक धोको आसा. ह्या तिनूय मतदारसंघांतले आमदार मंत्री आसात. ह्या मंत्र्यांनी लेगीत ही गजाल पक्ष नेतृत्वाक ही गजाल सांगल्या. हाका लागून मगोचे आमदार सुदिन ढवळीकार हांचें मंत्रीपद उरता काय वता, हे विशीं दुबावाची स्थिती निर्माण जाल्या. हे फांटभुयेर दोन दिसां पयलीं मगोचे अध्यक्ष दीपक ढवळीकार आनी वीजमंत्री सुदिन ढवळीकार हांणी दिल्लींत भाजपाचे राष्ट्रीय सरचिटणीस बी. एल. संतोष हांची भेट घेवन युती विशीं चर्चा केली. दीपक आनी सुदिन हांचे दिल्ली भेटी उपरांत भाजप कोर समितीची बसका जाली. दिल्ली भेट तशेंच बसकांचें सत्र चालू आसतनाच मुख्यमंत्र्यांनी बिरेस्तारा अचकीत राज्यपालांची भेट घेतली. हे भेटीच्या तपशिला विशीं जाहीरपणान मुख्यमंत्र्यांनी म्हायती दिवंक ना.
भारतीय जनता पक्षाच्या मतदारसंघांत मेळावे चालू आसात. साळगांव मतदारसंघांत जाल्ल्या मेळाव्यांत आमदार केदार नायक हांचें ‘प्रमोशन’ जावपाची गरज आसा, अशें विधान मुख्यमंत्री डॉ. प्रमोद सावंत हांणी केलें. केदार नायक हे बरो वावर करतात. तांचें ‘प्रमोशन’ योग्य वेळार जातलें, अशें मुख्यमंत्र्यांनी म्हणलें. तशेंच कळंगूटे जाल्ल्या मेळाव्यांत मायकल लोबो हांकां योग्य पद दिवपाची गरज तांणी उक्तायली. मायकलाक मंत्रीपद दिवपा विशीं पक्ष निर्णय घेतलो, अशें तांणी सांगलें.
नव्या आमदारांचो मंत्रीमंडळांत आस्पाव करपाचो जालो जाल्यार कांय मंत्र्यांक काडचे पडटले. मगोचें मंत्रीपद काडून भाजपाच्या एका आमदाराक दिवचें, अशी मागणी नेट धरता.
चार म्हाविद्यालयां वतलीं विद्यापीठ कॅम्पसांत?
वास्तुशिल्पकला म्हाविद्यालया सयत संगीत, फार्मसी आनी फायन आर्टस म्हाविद्यालय विद्यापीठ कॅम्पसांत स्थलांतरीत करपाची घोशणा मुख्यमंत्री डॉ. प्रमोद सावंत हांणी अर्थसंकल्पी भाशणांत केल्ली. राज्यपाल हे विद्यापीठाचे कुलपती आसात. म्हाविद्यालयांच्या स्थलांतरणाचेर चर्चा जाली, अशी म्हायती गोपांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
