भांगरभूंय | प्रतिनिधी
मडगांव : विरोधी पक्ष बरें काम करता. गोवा फॉरवर्ड आनी रिव्हॉल्युशनरी गोवन्स हांचे वांगडा युती खातीर चर्चा सुरु आसा. जागे वांटपाचेर चर्चा जावन फुडल्या दोन दिसांनी युती विशीं निर्णय जातलो, अशें आमदार एल्टन डिकॉस्टा हांणी सांगलें. काँग्रेस चड जागे मेळोवपा खातीर आग्रही आशिल्ल्यान युतींतल्या घटकांक विस्वासांत घेवन निर्णय जातलो अशेंय तांणी सांगलें.
राज्यांतल्या जिल्लो पंचायत वेंचणुकां विशीं उलयतना काँग्रेसीचे केपेंचे आमदार एल्टन डिकॉस्टा हांणी मुखार म्हणलें, विरोधी पक्षा वतीन आपलें काम करता. विरोधी पक्षांचो एकवट उरचो आनी युती करुन वेंचणुको जावच्यो हाका लागून गोवा फॉरवर्ड पक्ष आनी रिव्हॉल्युशनरी पक्ष हांचे वांगडा चर्चा सुरु आसा. विरोधी पक्षांत जागे वाटपा वेल्यान कांय चर्चा सुरू आसा. फुडल्या दोन दिसांनी चर्चा करून युती विशींचो निर्णय जातलो. काँग्रेस हो खुबश्या वर्सां पसूनचो पक्ष. हाका लागून ताणें चडांत चड सुवातो लढच्यो अशें दिसता. विरोधी पक्षांक विस्वासांत घेवन काँग्रेसी कडल्यान बरे उमेदवार जिल्लो पंचायत वेंचणुके खातीर दिवचे अशें यत्न आसात. सत्ताधारी भाजपाक हारोवपाक काँग्रेस यत्न करता अशें तांणी सांगलें.
आचारसंहिता लागू जावन लेगीत बेतुल खेळां मंत्र्यांच्या हाजेरींत खेळाचें सामान वाटिल्ल्याची म्हायती मेळ्ळ्या. आतां २३ वर्सांनी जागे जावन आदले आमदार खेळाचें सामान वाट्टात. मात खेळपा खातीर तांणी इतल्या वर्सान एकूय मैदान करूंक ना. हांवें फुडाकार घेवन दोन मैदानां केल्यांत. खेळा वेळार मनरिजवणे खातीर खेळपी हाउझी बंद करपाक सर्त आडावपा खातीर कांय जाण कागाळी करून पुलीस धाडटात. वाडदिसा सोरो दवरूंक नाशिल्लो, ताचेंय राजकारण करपाचो यत्न जावप हें राजकारण न्हय? हाका लागून जिल्लो पंचायत वेंचणुकेंत मतदार योग्य तो निर्णय घेतले, अशेंय आमदार एल्टन हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
