भांगरभूंय | प्रतिनिधी
झेडपी वेचणूक : काँग्रेस – गोवा फॉरर्वडाचो सीट वाटप फॉर्मुला जाहीर
पणजी : कॉंग्रेस आनी गोवा फॉरवर्ड हांचें मदीं जिल्हो पंचायत वेंचणुके खातीर सीट वांटपाचो फॉर्मलुला निश्चीत जालो. उमेदवारी अर्ज भरपाच्या निमाण्या दिसा दोनूय पक्षान हो फॉर्मुला जाहीर केलो. कॉंग्रेस 36 मतदारसंघांत, जाल्यार गोवा फॉरवर्ड 9 मतदारसंघांत उमेदवार उबे करतात. खोर्ले आनी मोरजें ह्या 2 मतदारसंघांत इश्टागतीचें झूज जातलें. हेर 3 मतदारसंघांत दोनूय पक्ष अपक्षांक तेंको दितले. हें विशीं काँग्रेस आनी गोवा फॉरवर्डान एकठांय पत्रकार परिशद घेवन म्हायती दिली.
युती जाहीर करपा खातीर काँग्रेशीचो गोंय प्रदेशाध्यक्ष अमित पाटकार आनी गोवा फॉरर्वडचे अध्यक्ष विजय सरदेसाय हांणी वांगडा येवन पत्रकार परिशद घेतली. विरोधकांचो एकवट जावचो ही लोकांची भावना आसा, काँग्रेस आनी गोवा फॉरवर्ड कितें निर्णय घेता? हाचे कडेन सगल्यांची नदर आशिल्लीं, अशें काँग्रेस प्रदेश अध्यक्ष अमीत पाटकार हांणी म्हणलें.
काँग्रेस पक्ष उत्तर गोंयांत 19 आनी दक्षीण गोंयांत 17 उमेदवार, जाल्यार गोवा फॉरवर्ड उत्तर गोंयांत 4 आनी दक्षीण गोंयात 5 उमेदवार उबे करता. दोगांयनी मेळून 50सांतले 45 मतदारसंघांनी उमेदवार उबे केल्यात आनी उरिल्ल्या मतदारसंघात राजकी नदरेन बळीश्ट आशिल्ल्या अपक्ष उमेदवारांक आमी तेंकों दितात, अशीं म्हायतीय पाटकार हांणी दिली.
‘एकवटान भाजपाक उडोवया’ हें गोंयच्या जनतेचे भावनेक मान दिवन 2022ची युती आमी फुडे व्हेल्या, अशें गोवा फॉरर्वडचे अध्यक्ष विजय सरदेसाय हांणी सांगलें.
आमकां आमची युती ग्रँड करपाची आशिल्ली. पूण कांय कारणांक लागून ती जावंक ना.
दुसऱ्या पक्षांनी लोकांचो विचार करून आमच्या वांगडा येवपाक जाय आशिल्लें. इगो घेवन बसल्यार विस्वासघात जातलोच. तिनूय पक्ष एकठांय आयिल्लें जाल्यार स्ट्रायक रेट बरो आसपाचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
