युती थंय माती बी जायना मूं ?

भांगरभूंय | प्रतिनिधी

आमच्या मतान तरी फोंडेंचो बळी दिवन मगो अध्यक्ष प्रियोळची तिकेट सुगूर करूंक सोदता. ताका तिकेट आनी भाजपाचो तेंको मेळत जाल्यार तो सगल्या कार्यकर्त्यांचो बळी दिवंक तयार जातलो काय दिसता.

जिल्हाे परिशदेच्या वेंचणुकांच्यो तारखो जाहीर जाल्यो आनी वेंचणुकेचे धोल वाजूंक लागले. आतां जिल्हाे परिशदेचें काम कितें आनी तांकां कसले अधिकार आसात हाचे विशीं आमकां तरी कांयच म्हायती ना. तरी वेंचणुको आयल्यो म्हणजे मत दिवंक जाय इतलेंच आमी जाणात. फाटले फावटूय मत दिल्लें आनी आमचें मत फुकट गेलें ना हाची खोशीय जाल्ली. पूण उपरांत वेंचून आयिल्ल्याचें तोंडूय केन्ना पळयलें ना. म्हणजे ताचे कडेन कसलें कामूच पडलें ना जाल्यार मेळपाचो प्रसंग तरी कित्याक येवपाचो? आमची धांव पंचायती मेरेन तीय बी वर्साक एकदां फक्त घरपटी भरचे खातीर. पंचायती कडेनूय केन्ना कसलें काम पडलें ना. आमी जनरल केटेगरीन पडिल्ल्यान ‘हो दाखलो, तो दाखलो’ केन्ना लागलोच ना. म्हणटकूच हांचीं तोंडां पळोवपाचो प्रसंग केन्ना आयलोच ना. आमचें एकूच काम कोणाक तरी मत दिवप आनी कुशीक सरप.
तर आतां जिल्हाे परिशदेच्यो वेंचणुको जाहीर जाल्यो आनी कोड ऑफ कंडक्ट लागलो. एकदां कोड लागलो म्हणजे सगलीं कामां ठप्प. आतां ह्या वेंचणुकांचो आनी कामांचो संबंद कितें तें कळप कठीण. विधानसभेच्यो वेंचणुको आसल्यार एक वेळ समजूं येतालें. सत्ताधारी पक्ष लोकांक भुलोवंक कसलीं तरी कामां काडटा आनी मतां आपले वटेन ओडटा देखून कामांक कोड लायतात. पूण जांचे कडेन कसले अधिकारूच ना ते जिल्हाे परिशदेच्या वेंचणुकांकूय हो कोड लावन कामां बंद कित्याक करूंक जाय आसलीं? केंद्रांतलें सरकार एक नेशन एक इलेक्शन करूंक सोदतालें. सगल्यो वेंचणुको एकाच वांगडा. कितलें बरें जावपाचें पळयात. एकदांच कोड लागपाचो आनी एकदांच सगलो सोक्षमोक्ष.
निकतोच पावस आयज वता फाल्यां वता करीत ना जाला, रस्त्याचे खड्डे काडपाचें काम चल्लां आनी अकस्मात हो कोड. जालें, हरवें सोदपी खात्याक पिकें मेळ्ळें. कांय तेंपान नगरपालिकांच्यो वेंचणुको येवच्यो आसात आनी त्यो सोंपता म्हणल्यार विधानसभेच्यो वेंचणुको दारार मारतल्यो. म्हणजेच परत कोड आनी परत एकदां कोड. कामां जातलीं पाड. आमकां खड्ड्यां वांगडाच जियेवचें पडटलें काय दिसता. तर धोलार तोणी पडली आनी ताचो पयलो आवाज काणकोणां आयकूंक आयलो. काणकोणां गोवा फोरवर्डाची मिटींग आसली. मिटींग म्हणली म्हणजे लावडस्पीकर आयलोच. ह्या लावडस्पिकराक लागून बोवाळ जालो. पुलीस आनी फोरवर्डाच्या लोकां मदीं मात्शें वाजलें. आनी वेंचणूक खंयचे दिकेन वता ताचो अदमास लागलो.
मिटिंगेक जमिल्ली गर्दी पळयल्यार फोरवर्ड बरेच फोरवर्ड पावल्यात म्हणपाचो अदमास मेळटा. जेन्ना विरोधक मुखार आसा म्हणपाचें कळटा तेन्ना सत्तेर आशिल्ल्यांचे तकलेक मिरयो पडटल्यो हें सांगची गरज ना. जरी अजून विरोधकांची युती जावची आसली तरी फोरवर्ड आमी युती करतले म्हणत फोरवर्ड वचत आसात. आपले उमेदवार जाहीर करून तांचो प्रचारूय सुरू केला. काँग्रेसीची आयज जातली फाल्यां जातली, जावन जायना हें सदचे वरीच चालू आसा. आरजी आयज एकल्या कडेन युती करतले म्हणटनाच दुसऱ्याच्या हाताक धरूंक पळयतात. आतां कोणाची युती जातली आनी कोण माती खातलो हें कळटलेंच, तो मेरेन आमी पळयत रावया.
सद्याक मगोची भाजपा कडेन युती आसा. मगोचे पदाधिकारी परत परत तशें सांगतना आयकूंक येता. फाटीं फोंडेंचो आमदार गेलो आनी फोंड्यां पोट वेंचणूक जातली म्हणपाचें जाहीर जालें तेन्ना मगोच्या अध्यक्षान हे वेंचणुकेंत भाजपाच्या उमेदवाराक विरोधाविणें वेंचून हाडपाची मागणी केली. मगो – भाजपा युती आशिल्ल्यान मगो आपलो उमेदवार दवरचो ना म्हणपाचेंय जाहीर केलें. फाटले फावट जेन्ना शिरोडेंच्या आमदारान पक्ष बदलचे खातीर राजिनामो दिल्लो तेन्नाय मगो – भाजपाची युती आसली. तरी तेन्ना भाजपा आड मगोन उमेदवार दवरिल्लो आनी तो मगोचो अध्यक्षूच आशिल्लो. जाका लागून युती तुटिल्ली आनी मगोच्या आमदाराचें मंत्री पदूय गेल्लें. म्हणटकूच आयज अशें कितें घडलां आनी मगोक युतीची याद जाता?
पयरूच म्हाड्डोळा देवी मुखार नाल्ल दवरून देवीचो आशिर्वाद घेवंक आयिल्ले कडेन मगोचे जाळवणदार हेंच उलयले. भाजपा कडेन युती आसा आनी ती युती सगल्या कार्यकर्त्यांनी मानची पडटली. जितले सीट वांट्याक येतले तितलेच मगो लडयतली आनी हेर कडेन भाजपाक तेंको दितली. मगो अध्यक्षान तर म्हणलें, आमी जिल्हाे परिशदेचेर तितलें लक्ष दवरूंक ना. आमी सत्ताविसांत जावपी वेंचणुकेचेर लक्ष दवरून आसात. जिल्हाे परिशदेचेर लक्ष ना, फोंडें पोट वेंचणुकेचेर लक्ष ना अशें कशें जावं येता?
तेवटेन मगोचे फोंडेंचे कार्यकर्ते म्हणटात वेंचणुकेंत मगोचें चिन्न आसूं वा नासूं, आमी अपक्ष रावन तरी आमचो उमेदवार वेंचून हाडटले. हाचोच अर्थ मगोचो हायकमांड जें कितें करता तें ह्या कार्यकर्त्यांक मान्य ना. मागीर मगोचो हायकमांड कार्यकर्त्यांक विस्वासांत घेनासतनाच निर्णय घेतात अशेंच जालें ना. हें कोणाक तरी म्हणजेच भाटिकाराक बी सोंपोवपाक करतात? काय आपलो कसलो तरी सुवार्थ सादोवन घेवपाक ही चाल खेळटात? आमच्या मतान तरी फोंडेंचो बळी दिवन मगो अध्यक्ष प्रियोळची तिकेट सुगूर करूंक सोदता. ताका तिकेट आनी भाजपाचो तेंको मेळत जाल्यार तो सगल्या कार्यकर्त्यांचो बळी दिवंक तयार जातलो काय दिसता. निमाणें राजकारणांत सगलें क्षम्य आसताच म्हणा.
नासल्यार फाटले वेंचणुके वेळार तृणमूलाक तेंको दिवन भाजपाक विरोध करपी वेंचणुकेचो निकाल लागना फुडें दिमी मारून भाजपाक तेंको दिवंक कशे आयले तें सगल्यांनी पळयलां. आनी आतांय कितें वेगळें जातलें हाची अपेक्षा ना. निमाणें सत्ता गरजेची. युती युती करून पक्षाची माती केली ना म्हणजें जालें.

अभयकुमार वेलींगकार
9423884687