भांगरभूंय | प्रतिनिधी
सद्याक जिल्हाे परिशदेच्या वेंचणुकेचें वाजप सुरू जालां. वेंचणूक जाहीर जाली आनी विरोधक युती करूंक मुखार सरले. तांकां युती जाय आसली ती भाजपाक सत्ते भायरो करूंक. सद्याक सगल्या विरोधकांक एकूच ध्यास लागला आनी तो म्हणल्यार भाजपाक सत्ते भायर धांवडावचेलो. आनी युती बगर तें शक्य जावचें ना हें तांच्या लक्षांत आयलां. भाजपा नाका जावंक कारणां खूब आसात, तांतलें एक मुखेल कारण म्हणल्यार गोंय गोंयकारां हातांत उरूंक ना. तशें गोंय पयलींचेंय उरूंक ना. आतां हाका जापसालदार कोण तें सांगूक जावचें ना. कोणाक म्हणून दोश दिवपाचो? कोणतरी जागे विकता म्हणून भायले येवन जागे घेतात. विकतल्याक चड पयशे जाय आसता जे दिवचेली गोंयाकांरांक तांक आसना. हाचो लाव भायले घेतात आनी ते हांगाचे भाटकार जातात. ते हांगा येतात ते गोंयच्या मोगान न्ही जाल्यार जोडपाच्या मोगान. ते धंदो करूंक येतात आनी जोडपा खातीर जें कितें करूंक जाता तितलेंय ते करतात. आमचे लोक तांकां जाय तें करूंक हात दितात. परिणाम हडफडेंचो उज्या लोळ. ही फक्त सुरवात म्हणची पडटली. अजून जायतें जावचें आसा.
विरोधकांक हातूंत सरकाराची चूक आसाशें दिसता आनी सरकार हटावची ते मागणी करतात. तांणी मागणी केली आनी सरकार गेलें अशें म्हणून जालां केन्ना? सरकाराक उडयतले आनी नव्या पक्षाचें सरकार घडयतले जाल्यार वेंचणुकांची वाट पळोवची पडटली. पूण वेंचणूक जाली म्हणून विरोधक भोवसंख्येन येतलेच हाची खात्री कोण दितलो? आनी आयलेच म्हणून ते एकठांय उरतले काय सत्ता मेळोवंक पक्षांतर करतले तेंय सांगप कठीण. तरी आसतना सत्ताधार्यांक भायर मारतले जाल्यार विरोधकांनी एकठांय येवचें पडटलें. तशे नरकासूरा निमतान सगल्यांनी एकठांय येवन हात मेळयिल्लेच पूण नरकासूर जालो आनी सगले फाफसले काय दिसता. युती युती म्हणटनाच सगलीच माती जाल्ली नदरेक येता.
खरें म्हणल्यार काँग्रेसीन फुडाकार घेवन युती करूंक जाय आसली. गोंयांत अजुनूय विरोधकांक संद आसा. जरी कांय आमदार फुटून सत्ते वटेन गेले तरी मतदार अजून आपल्या मताचेर ठाम आसात म्हणपाचें दिसता. लोकसभा वेंचणुके वेळार दक्षीण गोंयांत विरोधक एकठांय आयिल्ल्यान काँग्रेसीचो उमेदवार वेंचून आयलो. जर आप, काँग्रेस आनी गोवा फोरवर्ड एक जावंक नासली तर काँग्रेस जिखूंक पावपाची? काँग्रेसीच्या उमेदवाराक काँग्रेसीचेच लोक विरोध करताले. आदलो काँग्रेस खासदार आपणाक तिकेट मेळ्ळी ना म्हणून उक्तेपणान काँग्रेस उमेदवाराक विरोध करतालो. फक्त आपा कडेन युती आशिल्ल्यान काँग्रेस उमेदवार जिखलो हें मानून घेवचेंच पडटलें. आनी हाकाच लागून काँग्रेसीन मुखार सरून इल्ली तडजोड करून युती करूंक जाय आसली.
काँग्रेसीन एक गजाल मतींत घेवंक जाय ती म्हणल्यार आरजी, आप, गोवा फोरवर्ड ह्या सगल्या पक्षांक मतां पडटात तीं काँग्रेसचींच. कारणां कसलींय आसूं पूण काँग्रेसीक ह्याच पक्षां कडल्यान नकलामी जाता म्हणपाचें कोणूय मानतलो. काँग्रेसीचीं मतां वांटून वतात आनी सद्याचे सत्ताधारी ताचो लाव घेतात. हे घडयेक जर सगले विरोधक एकठांय आयले जाल्यार गोंयचें राजकारण बदलूंक शकता. पूण हांगा सगल्यांचोच सुवार्थ आड येता. दर एकल्याक सत्तेच्या कदेलीर बसूंक जाय. कशेय तरी करून सत्ता मेळोवंक जाय आनी सत्ते कडेन वचूंक वेंचणुकेक उबो रावंक जाय. हाकाच लागून विरोधी मतां फुट्टात. मागीर भाजपा हटाव म्हणून फायदो कितें?
जिल्हाे परिशदेच्यो वेंचणुको जाहीर जाल्यो आनी बेबकांच्यो उडयो सुरू जाल्ल्यो पळोवंक मेळ्ळ्यो. तिकेट म्हाकाच मेळूंक जाय ह्या हावेसान हाचे पयलीं पक्षान आपणाक कितें दिलें तें विसरून जो तिकेट दिता तेवटेन उडयो सुरू जाल्यो. फाल्यां वेंचून आयले जाल्यार दिल्ले तिकेटीक हे जागतले मूं? हाचोय तिकेट दिवप्यांनी विचार करूंक जाय. काँग्रेसी आड घराणेशायेच्या नांवांन बोवाळ घालपीच आयज घराणेशायेक बळ दितना दिसतात. काँग्रेसीचे कांय फुटून भाजपांत पावले आनी वतना ते काँग्रेस संस्कृतीय थंय घेवन गेले म्हणपाचें कळटा. भाजपाकूय आतां घराणेशायीचो वास लागिल्लो दिसता. जिल्हाे परिशदेचे वेंचणुकेंत हाचें चित्र नदरेक येता. मंत्री, आमदार, पंच हांचीच फॅमिली तिकेटी मेळोवपांत मुखार आसा. पूण विरोधक हें लोकां मुखार हाडूंक उणें पडटात काय दिसता.
विरोधक अजून युतीच्या जाळांतल्यान भायरूच सरना. एकेवटेन युती युती म्हणटनाच फोरवर्डान आपले उमेदवार जाहीर करून तांचो प्रचारूय सुरू केलो. आपान तर आपूण काँग्रेसी कडेन युती करचे नात म्हणून पयलींच सांगिल्लें. तांणी आपणालें वेगळें बिराड केलें. काँग्रेस आनी आरजी अजून चर्चा करीत आसा. एके वटेन दोगांयनीय एकमेकां आड उमेदवार दवरल्यात तरी युतीचें चाक घुंवत आसा. समजुंया युती जालीच जाल्यार ज्या उमेदवारांनी फॉर्म भरल्यात ते फाटीं सरतले? दुबाव. म्हणटकूच हे युतीचो फायदो कसलो? हें जालें विरोधकांचें, तेवटेन भाजप-मगो युती तरी सारकी आसा? वयलेचाराक सगलें बरें दिसता. मगोचे फुडारी युती धर्माच्यो खबरी सांगता पूण पिरवळांत कितें चित्र दिसता? गोविंद गावडेच्या समर्थकाक मगोचे वांगडी तेंको दितात? ताचो प्रचार करतात? भाजपाचे लोक मगोच्या प्रचाराक भोंवतले? सद्याक तरी मगो गोविंद गावडेक कसो सोंपोवप हाचीच रणनिती आंखता. जांचे कडेन युती केल्या त्या भाजपाकूच हे नकलामी करतात हाचें भानूय तांकां ना. आपल्याच साथिदाराक आड घालूंक सोदपी असल्या युतीचो कसलो फायदो?
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
