भांगरभूंय | प्रतिनिधी
जिल्हो पंचायती खातीर शेनवार 20 डिसेंबराक मतदान जातलें. 22 तारखेक निकाल. सगल्यांत पयलीं उमेदवार जाहीर केले आम आदमी पक्षान, उपरांत गोवा फाॅरवर्ड, मागीर भाजपा. काल काँग्रेसीन उमेदवारांची एक वळेरी जाहीर केल्या. त्या निर्णयाक रिव्हाॅल्युशनरी गोवन्स पक्षान हरकत घेतल्या. ‘युती पक्षांक विचारांत घेनासतना उमेदवार जाहीर करप ही धक्को दिवपी गजाल. काँग्रेसीन आमचो विस्वासघात केला. युती पक्षांक विस्वासांत घेनासतना तांणी उमेदवार जाहीर केल्यात. आमी चर्चा करून फुडलें पावल उबारतले,’ अशें आरजीचे मनोज परब हांणी सांगलां. सध्या आरजी आनी गोवा फाॅरवर्ड हांची सोयरीक चलता. काँग्रेसूय ती करपाक तयार आशिल्ली. 1- 2 कार्यावळींनी हातांत हात घेवन युतीची तुतारीय वाजयिल्ली. मात, दीस मुखार सरतात, तसो तिचो आवाज चिरपूंक लागला. युतीक वेंरो वचपाचें मुखेल कारण म्हणल्यार जागे वाटपा विशीं एकमत जायना. युती जाल्यार आरजी आनी गोवा फाॅरवर्डाक चड लाव जातलो, अशें काँग्रेस वावुरप्यांक दिसता खंय. पक्षाच्या फुडाऱ्यांचेंय घडये तशेंच मत आसा, हें कालचे उमेदवार घोशणे वयल्यान जाणवलें. आतां बाटलेंतल्यान भायर सरून पळपाक सोदपी युतीचो जीन परत भितर घालपाचें काम गोवा फाॅरवर्ड फिशालकायेन करता काय फक्त दोनूच पक्षांची युती जाता, तें कळटलें. घडये सगलेच पक्ष स्वतंत्र वेंचणूक लडयत!
विरोधक एकठांय आयले बगर तांकां भाजपाक शह दिवप शक्यूच ना, अशें सगल्याच राजकी जाणकारांक दिसता. जमीन विक्री, कोळसो आनी हेर कांय प्रस्नांचो भाजपाक मार बसतलो, अशें विरोधकांक दिसता. पूण, निमाणें सगलें मतांचेर अवलंबून आसता. भाजपाची विचारसरणी मानप्यांचीं, मंत्र्यांचीं स्वताचीं मतां भाजपाक पडलीं जाल्यार तांचे उमेदवार सहज जिखून येवंक शकतात. उरफाटें काँग्रेस, आरजी, आप, गोवा फाॅरवर्ड हांकां मानपी मतदारांची विचारसरणी, कालेत सादारण एक सारकीच. म्हणटकच तांचीं मतां अपक्ष आनी चारूय पक्षां मदीं वांटून वतलीं, असो राजकी अभ्यासकांचो दावो. फाटले विधानसभा वेंचणुकेंत हें दिसलां. तरीय तांचे मदीं एकमत जायना. काँग्रेसींत तर इल्ली चडूच लोकशाय आशिल्ल्यान बंडां, वाद, मतभेद हो तांचो सभाव जावपाक लागला. चड जागे मेळूनय मुख्यमंत्री वेंचपाक उशीर जाल्ल्यान कितें जालें, ताचो अणभव कांय वर्सां पयलीं आयिल्लो. भाजप हो तळागाळांत संघटणा आशिल्लो पक्ष. हे वेंचणुकेंतूच तो फुडले विधानसभेची तयारी करतलो. सरकाराक तेंको दिवपी भायल्या आमदारांच्या मतदारसंघांतूय तांणी उमेदवार उबे केल्यात. विधानसभे खातीर सध्याचे आनी नवे इश्ट पक्ष घेवन भाजपा रिंगणांत देंवतलो काय ना, तें येवपी काळांत कळटलेंच. सद्या तरी तांणी मगो आनी कांय अपक्षांक, जागे, तेंको दिला. हालीं सगलेच पक्ष युतीचेर भर दिवपाक लागल्यात, म्हणटकच भाजपा इश्ट पक्षांक घेवनूय 2027 चे वेंचणुकेत देवंक शकता…. तो मेरेन विरोधकांक एकठांय येवपाचेर ‘चर्चा पे चर्चा’ करून युतीचेर निमाणी म्होर मारची पडटली.
2027 त विधानसभा वेंचणूक जावपाच्यो आशिल्ल्यान ही जिल्हो पंचायत वेंचणूक सेमी फायनल मानतात. सरकारी यंत्रणेन तर ती खरपणान घेतल्या. हालींच गोवा फाॅरवर्डान लावडस्पिकराची परवानगी घेवंक ना म्हूण बसका आडावपाक पुलीस पावले. ही तत्परताय तांणी फुडल्या 15 दिसांनीय दाखोवची पडटली. वेंचून येवपाक जाय म्हूण सगलेच उमेदवार जिखपाक परंपरीक रिती पाळटले, ताका आळाबंद हाडचो. कितें सांपडलें जाल्यार फक्त कागाळ नोंद करून घेनासतना कारवायूय करची. सध्या कोंकणांत रातच्या वेळार जें कितें वांटप चल्लां, ताच्यो खबरो येत आसात. देखून आचारसंहिता पारदर्शकपणान चालीक लागची. मार्गदर्शक तत्वां पाळून वेंचणूक सुरळीत जावपाचो यत्न करप, ही लोकशाय म्हूण सगल्यांचीच लागणूक.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
