भांगरभूंय | प्रतिनिधी
भाजपाच्या हेर उमेदवारांची फाल्यां घोशणा
पणजी : जिल्लो पंचायत वेंचणुके खातीर भाजप – मगो युती जावन मगोक ३ मतदारसंघ मेळटले. भाजपच्या हेर मतदारसंघांतल्या उमेदवारांची वळेरी फाल्यां मंगळारा जाहीर जातली. कांय जाग्यांचेर अपक्षांक तेंको दितले, अशें मुख्यमंत्री डॉ. प्रमोद सावंत हांणी सांगलें.
भारतीय जनता पक्षाच्या फुडार्यांची पणजेत बसका जाली. हे बसके उपरांत मुख्यमंत्र्यांनी ही म्हायती दिली. भारतीय जनता पक्षान १९ मतदारसंघांतले उमेदवार जाहीर केल्यात. ह्या मतदारसंघांतल्या उमेदवारां सयत भाजप फुडार्यांची बसका जाली. वेंचणुकेचो प्रचार, रणनिती तशेंच फुडली वाटचाल हे विशी उमेदवारांक मार्गदर्शन केलें. मार्गदर्शन करपा खातीर आयची बसका आशिल्ली. फाल्यां मंगळारा पक्षाची बसका जातली. हे बसकेंत हेर उमेदवारांचेर चर्चा जावन उमेदवारांची घोशणा जातली, अशें डॉ. सावंत हांणी सांगलें.
मडकय २ आनी मांद्रेंचो जागो मगोक : दामू नायक
जिल्लो पंचायत वेंचणुके खातीर मगो कडेन आमची युती निश्चीतपणान जातली. मडकय २ आनी मांद्रेंचे जागे मगो पक्षाक दिवपाचो निर्णय जाला. हेर ४७ जाग्यांचेर पक्ष उमेदवार दवरचो ना. कांय मतदारसंघांत अपक्ष उमेदवाराक तेंको दितले.
फाल्यां मंगळारा हेर मतदारसंघातले उमेदवार निश्चीत करपा खातीर बसका जातली. चडान चड बुधवार मेरेन सगळ्या हेर मतदारसंघातले उमेदवार निश्चीत जातले. भारतीय जनता पक्षाचो वावर वर्सभर सुरू आसता. केंद्र तशेंच राज्य सरकारच्यो येवजण्यो लोकां मेरेन पावता. हाका लागून उमेदवारांक प्रचारा खातीर मजत जातली, अशें अध्यक्ष दामू नायक हांणी सांगलें.
कॉंग्रेस पक्षान सरकारांत आसतना जीं वायट कर्मां केल्यांत, ताचो परिणाम आतां पक्षाक भोगचे पडटात. दोनूय जिल्लो पंचायत वेंचणुकेंत भाजपाचें जैत निश्चीत आसा, असो विस्वास अध्यक्ष दामू नायक हांणी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
