भांगरभूंय | प्रतिनिधी
बुंदीबाग्यो, खबरां संस्था ः भारता सावन साडेपांच हजार किलोमीटर अंतराचेर आशिल्ल्या आफ्रिका खंडांत एक देश आसा युगांडा. सध्या युगांडात ‘डिंगा डिंगा’ नांवाचें दुयेंस पातळ्ळां. थंयचे लोक ह्या व्हायरसाक सामान्य भाशेंत ‘डिंगा-डिंगा’ अशें म्हणटात. हो दुयेंस जाल्लो पिडेस्त मनीस नाच केल्ले सारको थरथरता आनी पळोवप्याक तो मनीस नाचता अशें दिसता. देखून थळाव्या लोकांनी ह्या दुयेंसाक ‘डिंगा डिंगा’ अशें नांव दिलें.
मेळिल्ले म्हायती प्रमाण, युगांडात ३०० परस चड लोकांक डिंगा डिंगा व्हायरसाची लागण जाल्या. तातूंत चडशी बायलो आनी चलयो आसात. युगांडांतल्या बुंदीबाग्यो जिल्ह्यांत ह्या दुयेंसाचो सगळ्यांत व्हड परिणाम जाला. ह्या व्हायरसाची लागण जाता तेन्ना कुडींत खर थरकाप जाता आनी तो मनीस थरथरता आनी नाच केल्ले सारको करता. पळोवप्याक अशें दिसता कि तो मनीस नाचता. हो संसर्ग खर आसल्यार अर्धांगवायू लेगीत जावंक शकता.
हो दुयेंस टाळपा खातीर लोकांक नितळसाण दवरपाचो सल्लो भलायकी खात्यान दिला. तशेंच तांकां खंयच्याय संसर्ग जाल्ल्या मनशाच्या संपर्कांत येवपाक बंदी घाल्या. तशेंच जायत्या दुबावितांचे नमुने भलायकी मंत्रालयाच्या पंगडा कडेन धाडल्यात. १५१८ वर्सा फ्रांसाक पातळिल्ल्या ‘डान्सिंग प्लेग’ कडेन ह्या व्हायरसाची तुळा केल्या.
मजगतीं, दुसरे वटेन काँगो (डेमोक्रेटिक रिपब्लिक ऑफ काँगो) हांगाय एक दुयेंस व्हड नेटान पातळत आसा. हाका लागून काँगोंत आतां मेरेन १४३ जाणांक मरण आयलां. तातूंत चडशी बायलो आनी ल्हान भुरगीं आसात. काँगोच्या भलायकी मंत्रालयाच्या म्हणण्या प्रमाण ह्या व्हायरसाच्या दुयेंतींक जोर, तकली दुखप, खोंकली, मलेरिया अशीं फ्लू सारकीं खर लक्षणां दिसतात.
अंदूं ऑक्टोबरांत पयलेच खेपे ५९२ दुयेंती सांपडले. संवसारीक भलायकी संघटनेन ह्या दुयेंसाक ‘डिजीज एक्स’ अशें नांव दिलां. कारण ताचो पुराय तपास जावंक ना. ह्या व्हायरसाक लागून जायत्या जाणांक मरण आयलां. तातूंतले चडशे भुरगे सुमार 5 वर्सां पिरायेचे आसात. संवसारीक भलायकी संघटना ह्या दुयेंसा विशीं चड म्हायती एकठांय करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
