भांगरभूंय | प्रतिनिधी
संवसारीक टी-20 क्रिकेट सर्तींतले णववे मॅचींत युगांडान पापुआ न्यू गिनी (पीएनजी) पंगडाक 3 विकेटींनी हारयलो. सर्तींतलें ताचें हें पयलें जैत थारलें. हांगाच्या प्रोव्हिडेन्स स्टेडियमाचेर युगांडान टॉस जिखून पीएनजीक पयलीं बॅटींग करपाचें आमंत्रण दिलें. युगांडाच्या बॉलरांनी मुखेली ब्रायन मसाबाचो निर्णय योग्य थारायतना पीएनजीच्या बॅट्समनांक तग धरपाक दिलो ना. ताचे बॅट्समन थारावीक अंतरान बाद जायत गेले. पीएनजीचो डाव 19.1 ओव्हरींनी 77 धांवड्यांचेर सोंपलो. युगांडा वतीन अल्पेश रामजनी, कॉसमास क्येवुता, जुमा मियाजी आनी फ्रॅंक नसुबुगा हाणें दरेकी दोन विकेटी घेतल्यो. ब्रायन मसाबाक एक विकेट फावो जाली.
स्लो खेळपट्टीचेर 78 धांवड्यांची उणी मोख लेगीत युगांडा खातीर सोंपी नाशिल्ली. ताणें पावर प्लेंत चार विकेटी व्हगडायल्यो. रियाजत अलीन डाव सांबाळपाचो यत्न केलो. ताणें जुमा मियागी वांगडा मेळून 35 धांवड्यांची म्हत्वाची भागिदारी केली. पंगडाक जैता खातीर 17 धांवड्यांची गरज आशिल्ली, त्या वेळार मियागी बाद जालो. पूण, रियाजत अलीन 33 धांवड्यांची म्हत्वाची खेळी करून युगांडाक जैत मेळोवन दिलें. युगांडान 18.2 ओव्हरींनी 7 विकेटी व्हगडावन 78 धांवड्यो करून जैत जोडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
