भांगरभूंय | प्रतिनिधी
लंडन, खबरां संस्था: ब्रिटनांत आतांच वेंचणूक जाल्या. हे वेंचणुकेंत मजूर पक्षान व्हड जैत मेळयलां. मजूर पक्षाक ४०० वयर सुवाती मेळ्ळ्यात. ताका लागून ऋषी सुनक हांच्या फुडारपणा खाला सत्ताधारी हुजुर पक्षाक (कन्झर्व्हेटिव्ह) अपेस आयलां. ह्या अपेसा उपरांत भारतीय वंशाच्या ऋषी सुनक हांकां प्रधानमंत्रीपदाचो राजिनामो दिवचो पडलो. जाल्यार मजूर पक्षाचे फुडारी कीर स्टार्मर हांणी प्रधानमंत्रीपदाचो ताबो घेतलो.
हे वेंचणुकेंत मुळच्यो भारतीय शिवानी राज हांणी यूकेच्या लिसेस्टर पूर्व हांगाच्यान खासदार म्हणून जैत मेळयलां. शिवाणी हांणी मंगळारा खासदार म्हूण सोपूत घेतलो. तिणें हो सोपूत घेतिल्लो व्हिडियो भारतांत सोशल मिडियाचेर व्हायरल जावपाक लागला. कारण तांणी खासदार म्हूण सोपूत घेतना हातांत भगवद्गगीता घेतिल्ली.
यूकेंतल्या लीसेस्टर पूर्व हो मजूर पक्षाचो गड मानतात. मात, भारतीय वंशाची शिवानी राजा हांणी हांगाच्यान जैत मेळयलें. मजगतीं, शिवानी सोपूत घेतना एक व्हिडीओ एक्स अकावंटाचेर शेअर केला. तातूंत तिणें बरयलां, ‘लीसेस्टर पूर्वचें प्रतिनिधित्व करपा खातीर आयज संसदेंत सोपूत घेवप हो म्हजे खातीर व्हड सन्मान. तशेंच सोपूत घेतना म्हाका अभिमान दिसलो.’
मजगतीं, शिवाणी हांणी १४,५२६ मतां मेळयलीं आनी आपल्या विरोधी उमेदवाराक ४,४२६ मतांनी हारयलो. ब्रिटनांत ६५० मतदार वेंचून आयले. हे वेंचणुकेंत लेबर पक्षाक ४१२ सुवाती मेळ्ळ्यात. जाल्यार ऋषि सुनक हांच्या हुजूर पक्षाक (कन्झर्व्हेटिव्ह) फक्त १२१ जाग्यांचेर जैत मेळ्ळें. खासदार शिवानी राजाची आवय राजस्थानी आनी बापूय गुजराती. शिवानी हिचो जल्म, शिक्षण लेस्टरांत जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
