भांगरभूंय | प्रतिनिधी
सेगीत दुसरे खेपे ऑस्ट्रेलियन ओपन ग्रॅण्ड स्लॅम किताब जिखपी संवसारीक क्रमवारींत तिसरे सुवातेर आशिल्लो इटलीचो टॅनीस खेळगडो यानीक सिनराचेर तीन म्हयन्यांची बंदी घाल्या. डोपींग प्रकरणांत ताचेर ही कारवाय केल्या.
सिनरची बंदी घाल्ल्या पदार्था खातीर चांचणी जाल्ली. तातूंत ताची चांचणी पॉझिटिव्ह आयिल्ली. एप्रील 2025त सीएएस कडल्यान ह्या प्रकरणाची सुनावणी जावपाची आस्त आशिल्ली. पूण, ह्या प्रकरणांत काल संवसारीक उत्तेजक द्रव्य प्रतिबंधक संस्था (वाडा) आनी सिनर हांचे मदीं एकमत जालें. बंदी घाल्ले वखदांचे चांचणींत पॉझिटिव्ह आयल्या उपरांत बंदींतल्यान सुटिल्ल्या सिनरा आड वाडान कोर्ट ऑफ आर्बिट्रेशन फॉर स्पोर्ट (सीएएस) हातूंत अपील केल्लें. ह्या प्रकरणाची सुनावणी एप्रील 2025त जावपाची आशिल्ली. वाडा आनी सिनर हांणी तीन म्हयन्यांचे बंदी खातीर तोडगो काडलो.
सिनर हो 9 फेब्रुवारी 2025 ते 4 मे 2025 दिसा रातच्या 11.59 वरां मेरेन अपात्रेचो कालावधी पूर्ण जातलो अशें वाडान एका निवेदनांत म्हणलां. ताका लागून सिनर हो फ्रॅंच ओपना आदीं पुनरागमन करपाक पात्र थारतलो अशें लेगीत स्पश्ट केलें. कांय दिसां पयलीं ऑस्ट्रेलियन ओपन ग्रॅण्ड स्लॅम सर्तींत ताणें जर्मनीच्या अलेक्झांडर झ्वेरेव्हाक सरळ सेटांनी हारयिल्लो.
हे कारवाये विशीं सिनरा म्हणलें, आपले आडचो हो खटलो सुमार एक वर्सा सावन प्रलंबीत आसा. हे प्रक्रियेक अजून खूब वेळ लागपाची शक्यताय आसा. घडये ह्या वर्साचे अखेरेक निर्णय येवपाची शक्यताय आशिल्ली. आपूण आपल्या पंगडा खातीर जापसालदार आसा अशें सिनरान म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
