यादी अटल

भांगरभूंय | प्रतिनिधी

भौ. दामू नाईक
प्रदेसाध्यक्ष, भाजपा
पणजी
रामनम जाली, गुड फ्रायडे, इस्टर लागीं आयला. धावेच्या रिजल्टाच्या वेळार जाण्ट्या युवांक एकठांय हाडपाची धिटाय तुमी दाखयली, अटल स्मृती संमेलनात. सुरवेक चार- पांच म्हण्टा म्हणसर मिनेझीस ब्रागांझा इमारतीचीं दोनय सभाघरां भरुन रकलीं. मनीस, मनीसपण, गोंयकारपण तेंच. डाॅ. बाबासाहेब आंबेडकर हांच्या संविधानांतलें.
कशे हाडले तुमी वितुश्ट घालपी आसतना आदले कला आनी संस्कृतीमंत्री दयानंद मांद्रेकार हांकां? तशे आदले मुखेलमंत्री लक्ष्मीकांत पार्सेकार समेस्तां मदीं बसले, घरचेच जावन. मांद्रें भाजपाचेंच अशें सांगत सगल्यांक धांवडायलें.
पर्यटनमंत्री रोहन खंवटे आनी भाजपाचे आदले सरचिटणीस गोविंदबाब पर्वतकार मेकळेपणान एकामेकां लागीं उलयले. आमदार देविया राणे ज्युनियर, सिनियरांच्यो प्रतिनिधी. सिरियस आदल्या कला आनी संस्कृतीमंत्र्यांक आमदार दिगंबर कामत हांणी हांसयलें. समेस्तां मदीं भोंवन सगल्यांची वासपूस करपाची कळाशी दिगंबरबाबां कडेन अजूनय आसा. मुख्यमंत्री डाॅ. प्रमोद सावंत अटल कविता, यादी जागयतना आधाराक आदले खासदार विनय तेंडुलकार आयले. तुमी तर 40 उमेदवार आमचेच, मोख 2027 त 27 ची सांगून मेकळे. मडकयचो प्रदीप शेट धांवन आयलो, आदले सभापती विश्वास सतरकार हांणी विश्वास दिलो. आदले पर्यटनमंत्री दिलीपबाब परुळेकार, आदली महिलाध्यक्ष कुंदाताई चोडणकार हांचे बराबरीन बसले. पणजेची आदली महापौर वैदेही नायक समेस्त आमचे वरींच.
केंद्रीयमंत्री श्रीपादबाब नाईक हांकां तुमीच जिखून हाडिल्लें, ते तर अटल. सगले आपले दिसले, कितलें उलोव, कितलें नाका तांकां जालें. कितें उलोवप, कितें नाका तें तुमकां सांगपाक प्रुडन्ट आसा. कोण ना तांचो हुस्को नाका. एक संमेलन करात घरच्यां सयत आदल्या आनी आतांच्या थळाव्या आमदार, मंत्र्यांचें. 27 क 27 मेळटलेच युवा, अस्तुरी बराबरीन. गेली म्हादय म्हणचे आदींच चार ल्हान धरणां गोंय सरकाराचीं जाय. पावसाचो आशिवार्द मेळ्ळो. वाट दिसल्या, शोर 27 चे 32 करपाक मुखार वचात. राजभासेंत मठग्राम, भतग्रामांतल्यान.
लक्षान दवरात, यादी अटल.

सुहासिनी प्रभुगांवकार