भांगरभूंय | प्रतिनिधी
हिंदु धर्मांत सण, परबो, व्रतां सुरू जातात वडा पुनवेक आनी व्हडली दिवाळी जायसर तीं चालू आसतात. त्रिपुरारी पुनवेक तीं सोंपतात. दर एकलो हे सण, परबो भक्तीभावान, उमेदीन मनयता. मागीर रोखडेच सुरू जातात, काले, जात्रा, दिवजां. ह्या सणां निमतान आमचीं आकर्शन देवळांक आनीक सजून वतात. अंत्रुज म्हालांत जात्रा म्हणल्यार पर्वणीच. लोक जात, धर्म विसरून ह्या जात्रांनी वांटेकार जातात. आपल्यो मागण्यो देवा कडेन पावयतात. जात्रा म्हणली काय देवळाची सजावट, लायटीच्यो माळो, रोशणाय… देवूळ सामकें झगमगून वता. गर्भकुडींतली देव, देवतेची मुर्ती पळोवन मन प्रसन्न जाता.
देवळाचो वाठार तरेकवार दुकानांनी भरिल्लो आसता. मिठाय, चणे, फुटाणे, रेवडी, खाजें, आयदनां, आयस्क्रीम, थंड पेयाचीं दुकानां, खेळणी, बॅगां अशी तरेकवार सामानांची दुकानां एकाच जाग्यार मेळपाचें ठिकाण म्हणल्यार जात्रा. बायलांचे लक्ष वीस रुपयांत खंयचीय वस्त काडात, अशी आरड मारपी दुकानदाराचेर आसता. बायलो मॅचिंग कांकणां, क्लिपां, जोतीं, नेलपाॅलीश घेवपाक गुंग जाल्लीं आसतात. बायलां जोडपी आसल्यार बरें, नाजाल्यार घोवाच्या बोल्साक खार. गरीब, गिरेस्त सगले जात्रेची मजा लुट्टात. ऐपती प्रमाण खर्च करतात.
देवाच्या दरबारांत भेदभाव नासता. ताच्या पांयां कडेन सगले येतात. जात्रेचो एक फायदो म्हणल्यार नात्यागोत्यांतलीं सगलीं मेळटात. विचारांची देवाणघेवाण जाता. खबर कळटा. हालीं मोबायलाक लागून संवसार एकठांय आयला तरी प्रत्यक्ष गांठभेट जावप हें भाग्यूच. जात्रेक लाखांनी रुपयांची उलाढाल जाता. देवाच्या पांया कडले म्हूण लोक कितें ना कितें विकत घेतातूच. चणे- भिकणां पसून खूब खपतात. जात्रांक लागून कलेक वाव मेळटा. मामा मोचेमाडकारांचें नाटक, बायल वेशांतले दादले, तरसाद, गदा घेवन केल्लें झूज, पदां, शारदा, संकासूर, पेटी- तबल्याचो, झांजेचो विशिश्ट आवाज. रसिक प्रेक्षक सामको पिसो जाता. हीं दशावतारी नाटकां लोकांक अजून आवडटात. आयच्या भुरग्यांक तीं घडये आवडना आसत, पूण आमचें भावविश्व ह्या नाटकांनी गिरेस्त केलां. हीं नाटकां म्हणल्यार मनोरंजनाचें साधन. भुरग्यांनी हीं नाटकां पळोवपाक जाय. तातूंत पुराण, रामायण, महाभारताचें गिन्यान मेळटा. ज्ञानांत भर पडटा. खरेंच जात्रा म्हणजे मजा, मस्ती करप, खावप, पिवप, देवीचें रुप दोळ्यांत साठोवन दवरप. जात्रा म्हणजे एक अणभव.
– सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
