भांगरभूंय | प्रतिनिधी
दरेकल्यान सपन पळोवपाक जाय. क्रिकेटर, गायक, अभिनेतो, फुडारी, मिडिया स्टार…… जावपाचे. पूण, तें साकार जावंक ना म्हूण निरशेवपाक जायना. यश मेळूंक नशिबाचो हात लागताच, पूण ताचे परस आत्मविस्वास, मेहनत, नमळाय, शिस्त, जिद्द आसप चड म्हत्वाचें, गरजेचें. अर्जूनाक किराचो दोळोच दिसतालो, तशें फक्त ध्येय सामकार दवरून कश्ट करपाक जाय. यश मेळटकच कानांत वारें भरपाक दिवंक उपकारना. सपनां पळयात, पूण शाॅर्टकट नाकात. सपन व्हडलें आसलें, तरी ते खातीरचो मार्ग वास्तववादी आसचो. शिक्षण, प्रशिक्षण, योग्य मार्गदर्शन नासतना घरांतल्यान पळून वचप धोक्याचें. कांय जाण पळून गेल्यात, पूण उपरांत तांणी खर कश्ट केल्यात. यश म्हणल्यार झाडा वयलें फूल न्हय, तोडलें आनी माळ्ळें! रातयां मेळटा ती प्रसिद्धीय फुला सारकीच. दीसभर टवटवीत, सांज जाली काय बावली. मागीर येता व्हड निरशेवणी. पालक, समाजाचेंय भुरग्यांचेर लक्ष जाय. मायणा कुडटरेचो एक भुरगो क्रिकेटर जावपाक दिल्ली क्रिकेट अकादमीचो पत्तो सोदीत थंय गेल्लो. उपरांत ताका पुलिसांनी घरा हाडलो.
अशे कितलेशेच भुरगे सपनां पोशेत मुंबय, दिल्ली, चेन्नय, बंगळूरू, कोलकातांत येतात. मुळांत पाटी कोरी आसल्यार तें सपन तुट्टा. चलयांक तर वायट मार्गार पावपाची भिरांत आसता. दरेकल्यान सादूर रावंक जाय. फिल्माच्या मळाचेर तर हे धोके चड. रातयां पयसो, प्रसिद्धी मेळटा, त्या मळांचेर तर तरणाट्यांच्यो रांको लागतात. संधी मेळटा, पूण कांय जाणांक धोके, आडमेळींय हुपचीं पडटात. सचिन, अक्षय, मिथून, धोनी, मेरी काॅम हांचे विशींची म्हायती वाच्ची. तांणी घेतिल्ले कश्ट पळोवचे. व्हडल्या मनशांची आपजीण वाच्ची. म्हणटकच जिवीत म्हणल्यार कितें तें कळटलें.
भुरगीं क्रिकेट, फुटबाॅल, सिनेमा कडेन चड आकर्शीत जातात. सोशल मिडियाचेंय पिशें तांकां लागलां. कारण? कलेची आवड आनी ताचे परस चड लाखांनी रुपया मेळटले, ही आस्त. कांय भुरगे लायक्स, शॅर मेळोवपाक धोकादायक स्टंट्स करतात. जखमी जातात, मरतातूय. कोलॅबोरेशनाच्या नांवा खाला कांय अनवळखी लोक तांचो गैरफायदो घेतात. सिनेमा, माॅडेलिंगाचें हांयस दाखोवन नाका जाल्लें करून घेतात. खेळांच्या मळाचेर फटीच्यो अकादमीय आयल्यात. सोशल मिडियाचेर आपलो एखादो व्हिडियो व्हायरल जालो काय आपूण स्टार जातलो असो गैरसमज बऱ्याच तरणाट्यां मदीं आसा. हेरांक मेळटा तें ग्लॅमर आपल्याक मेळत हे आशेन मागीर ते भरकटत वतात. सुशिक्षीत, विचारी लोकूय हाका आडवाद नात. गरिबी, संधींचो उणाव, घरांतले परिस्थितीक लागून आयज चले, चलयांक विचार करिनासतना शाॅर्टकट मारपाचो मोह जावंक लागला. समाजूय तांचे कडेन आडनदर करता.
भुरग्यांक शाळेंत, घरांत सोशल मिडिया वयले धोके, फट म्हायती विशीं जागृत करपाक जाय. जांणी मेहनत घेवन जिद्दीन करियर केलें, अशा आदर्श, प्रामाणीक व्यक्तींची म्हायती भुरग्यांक शाळेंत आसतनाच दिवंक जाय. थारावीक व्यक्तीं भोंवतणीच आमचे अभ्यासक्रम घुंवतात. आतां हेरांचीय म्हायती भुरग्यांक जावंदी. पालकांनी भुरग्यांची आवड जाणून घेवपाक जाय. प्रसिद्धी, पुरस्कार हें खरें करियर न्हय, तर प्रशिक्षण, कश्ट, सातत्य, खालतेंपण, प्रभुत्व हो यशस्वी करियराचो मार्ग हें समजावन दिवप सगल्यांत म्हत्वाचें. त्या भुरग्याक क्रिकेटर जावपाचें आसा. ताका प्रशिक्षण दियात, खेळयात. आपली कुशळटाय ताका विकसीत करुंदी. आयज सगले कडेन गंडभैरांव, लांगडे, कोले लिपून बशिल्ले दिसतात. तांकांय वळखुपाक शिकपाक जाय.
खूब खूब शिकात. वाचन करात. ताका लागून व्यक्तीमत्व सुदारतातच, पूण समाजांत कितें चल्लां तेंय कळटा. मार्गदर्शन घेयात. सवकाश उदरगत करात. एकदम व्हडल्याक हात घाल्यार पांयार फातर मारून घेवपा सारकें थारूं येता! तेन्ना सादूर!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
