भांगरभूंय | प्रतिनिधी
भारताचो क्रिकेट पंगड फुडल्या म्हयन्यांत वॅस्ट इंडिजाचे भोंवडेर वतलो. भारत हे भोंवडेर दोन टॅस्ट मॅचींची माळ खेळटलो. निवड समिती अणभवी चेतेश्वर पुजारा आनी उमेश यादव हांकां भायर बसोवन यशस्वी जैसवाल आनी मुकेश कुमार ह्या नव्या चेऱ्यांक संद दिवपाक शकता.
भारताक फुडारांत बळिश्ट पंगडां आड खेळपाचो आसा. ताका लागून निवड समिती फुडारांतलो विचार करून नवी पिळगी तयार करपाक सोदता.
भारताची ही एका म्हयन्याची भोंवडी आसतली. भोंवडेची सुरवात 12 जुलयाक दोन टॅस्टींचे माळे वरवीं जातली. ते उपरांत तीन वन डे आनी पांच टी-20 मॅचींची माळ जातली.
टी-20 माळेंत हार्दिक पांड्याच्या फुडारपणाखाला युवा खेळगडे मैदानांत देंवतले. ह्या पंगडां आयपीएलांत बरें प्रदर्शन करप्या खेळगड्यांक संद मेळटली.
संवसारीक टॅस्ट वस्तादपण सर्तीची सेगीत दुसरे खेपे फायनल वगडायल्या उपरांत शिव सुंदर दासाच्या फुडारपणाखालची निवड समिती आनी मुखेल प्रशिक्षक राहुल द्रविड फुडले संवसारीक टॅस्ट वस्तादपण सर्ती खातीर कांय पर्यायांचेर विचार करपाक शकता.
पुजारा आनी यादव फॉर्मांत दिसनात. ताका लागून निवड समिती तांकां भायर बसोवपाक शकता.
यशस्वी जैसवाल आंतरराष्ट्रीय क्रिकेटींत खेळपाक सज्ज आसा. ताणें रणजी, इराणी आनी दलीप ट्रॉफींत शेंकडो मारला. तो मानसीक रितीन घटमूट आसा. ताका संद दिवन ताचो आत्मविस्वास वाडोवपाक शकता अशें निवड समितीचे आदले वांगडी देवांग गांधीन म्हणलें.
पोरूं डिसेंबरांत भारत अ पंगडान बांगलादेशाची भोंवडी केल्ली. तेन्ना सावन अजून मेरेन भारत अ पंगडान विदेश भोंवडी करूंक ना. उमेश यादवाची कारकिर्द सोंपपाचे वाटेर आसा. पूण, अ पंगडाची भोंवडी जावंक नाशिल्ल्यान ताची सुवात कोण घेतलो हें खबर ना अशें निवड समितीच्या आदल्या वांगड्यान सांगलें.
एका वेळार मयंक अग्रवाल, ऋषभ पंत, हनुमा विहारी, मोहम्मद सिराज, नवदीप सैनी लेगीत अ पंगडा वतीन खेळून राष्ट्रीय पंगडांत सुवात मेळोवपाक सज्ज आशिल्ले. सध्या प्रतिभावंत फास्ट बॉलर कोण आसात हे विशीं आपल्याक खबर ना. फकत मुकेश कुमारूच दिश्टी पडटा. ताचे कडेन गती ना पूण, स्विंग बॉलिंगेचेर ताचो विस्वास आसा अशें त्या निवड समितीच्या वांगड्यान मुखार म्हणलें.
लोकेश राहुल अजून पुर्णपणान बरो जावंक ना. तशेंच तो परतून मुखेली जावपाचे सर्तींत लेगीत ना. ताका लागून सध्याचो फॉर्म आनी तंदुरुस्तीच्या आदाराचेर रोहित शर्मा आनीक दोन वर्सां टॅस्ट मॅची खेळपाक शकतलो काय ना हो पळोवपा सारको विशय आसा. तो 38 वर्सां पिरायेचो जावपाचे वाटेर आसा. ताका लागून मुखेलपदाच्या दावेदारा विशीं लेगीत संभ्रम आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
