भांगरभूंय | प्रतिनिधी
फोंडें: यशवंतनगर-फोंडेंच्या शालोम रेजिडेन्सी इमारतीच्या वीज मिटरा लागसार बिरेस्तारा दनपरां शॉर्ट सर्किटाक लागून उजो लागलो. धोको वळखून थळाव्यांनी उजो पालोवपी दळाचें वाहन घडणुके सुवातेर पावचे पयलीं उजो पालयलो. तशें मिटरा लागसारा पार्क केल्ली मारुती गाडी कुशीक काडिल्ल्यान व्हड घडणूक जावचे पसून वाटवली.
यशवंतनगर इमारतीचे तळ माळयेर आशिल्ल्या मिटरा लागसारा अचकीत उजो लागलो. हो उजो लागतांच थळाव्या लोकांनी ताचेर नियंत्रण मेळयलें. हे विशीं म्हायती मेळ्ळे उपरांत फोंडें उजो पालोवपी दळाचे जवान घडणुके सुवातेर पावले. मात तो मेरेन थळाव्यांनी हो उजो पालयिल्लो. ह्या वेळार मिटरा लागसारा आशिल्ले गाडयेक उज्याचो धग लागिल्ल्याचें पळोवन ती थळाव्यांनी कुशीक काडली.
नगरसेवक दादा उर्फ व्यंकटेश नायक आनी हेर थळाव्यांक उज्याचेर नियंत्रण मेळोवपाक येस आयलें. ह्या उज्यात इमारतीच्यो लायटीच्यो सरयो लासल्यो. हाका लागून इमारतीचें बरेंच लुकसाण जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
