भांगरभूंय | प्रतिनिधी
पणजीः गोंय शालान्त मंडळान यत्ता णववेच्या दुसरें सत्र परिक्षे संबंदी घेतिल्ल्या एका म्हत्वपूर्ण निर्णयात अचकित बदल केलां. हाचे आदीं शाळांक स्वता प्रस्नपत्रिका तयार करपाचें दिल्लें स्वातंत्र्य मंडळान काडून घेतलां आनी आतां मुखेल विशयांच्यो प्रस्नपत्रिका मंडळ स्वता तयार करून शाळांक दितलें. हो बदल फकत प्रशासकीय कारणांक लागून केलां अशें मंडळान आपल्या अधिकृत परिपत्रकांत स्पश्ट केलें.
हाचे आदीं डिसेंबर 2025त मंडळान शाळांक दुसऱ्या सत्राच्यो प्रस्नपत्रिका स्वता तयार करपाक सांगिल्लें. पूण फकत म्हयन्या भितर हो निर्णय फाटीं घेतलो. नव्या आदेशा प्रमाण भास, गणित, विज्ञान आनी समाजीक शास्त्र ह्या सारक्या कोअर विशयांच्यो प्रस्नपत्रिका आतां मंडळ स्वता तयार करतले. तांच्या वांटपा संबंदी म्हायती बेगीनूच जारी करतले अशेंय परिपत्रकांत म्हणलां. हाका लागून पुराय गोंय राज्यांतल्या यत्ता णवेच्या विद्यार्थ्यां खातीर एकूच दर्जाची आनी समान प्रस्नपत्रिका आसतली. आतां शाळांक फकत कुशळटाय आदारीत आनी शालेय पांवड्यावेल्या अंतर्गत मुल्यांकन विशयांचे पेपर काडपाचे मर्यादीत अधिकार उरल्यात.
दुसरे वटेन ज्या विशयांनी शाळांक स्वातंत्र्य मेळ्ळां ताचेर मंडळाची बारीक नदर आसतली. शाळांनी तयार केल्ल्यो प्रस्नपत्रिका मंडळाच्या ‘ब्लू प्रिंट’ आनी मानकां प्रमाण आसपाक जाय अशी खर शिटकावणी दिल्या. परिक्षेचो दर्जो तिगोवन दवरपा खातीर मंडळान एक खाशेली समिती तयार केल्या. ही समीती शाळांनी तयार केल्ल्या प्रस्नपत्रिकांची पुराय तपासणी करतले. ह्यो प्रस्नपत्रिका येवजणे प्रमाण नासल्यार संबंदीत शिक्षक आनी मुख्याध्यापकांचेर खर कारवाय जातली.
दरेक शाळेन परिक्षा सोंपतकच पांच दिसां भितर सगले प्रस्नपत्रिकांचे संच सीलबंद पॅकेटांत मंडळाक सादर करप सक्तीचें केलां. यत्ता णवेची परिक्षा 4 मार्च ते 12 मार्च 2026 मेरेन जातली. परिक्षेचें वेळापत्रक पयलींच जाहीर केलां आनी तातूंत कसलोच बदल जावंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
