भांगरभूंय | प्रतिनिधी
पर्वरी पुलिसांची कामगिरी, दुबावितांत एक खापो, दुसरो विद्यार्थी
भांगरभूंय । प्रतिनिधी
म्हापशें: पर्वरी पुलिसांनी म्होंवाळीं घालून घरां फोडपी संघटीत टोळयेक धरली. मारिया उर्फ मारियो सांताना बाप्तिस्ता उर्फ सांतान (44. रा. ग्रॅण्ड पेडे, बाणावली) आनी मोहम्मद सुफियान शेखमिया (20. रा. कालकोंडा- मडगांव) अशीं दुबावितांचीं नांवां आसात. सुसेगातीन जियेवपा खातीर ते चोरयो करताले.
हे टोळयेचो मुख्य सुत्रधार हो दुबावीत मारियो बाप्तिस्ता आसा. जाल्यार दुबावीत मोहम्मद हो म्हाविद्यालयीन विद्यार्थी आसा. तो वाणिज्य फांट्याच्या पयल्या वर्सांत शिक्षण घेता. पुलीस अधिक्षक अक्षत कौशल हांणी पत्रकार परिशदेंत हे कामगिरी विशीं म्हायती दिली. ह्या वेळार पुलीस निरिक्षक राहूल परब आनी सांगाती पंगड हाजीर आशिल्लो.
फाटल्या कांय म्हयन्यां सावन उत्तर गोंयांत चड करून तिसवाडी आनी बार्देस म्हालांत घरफोडीचें सत्र चालू आशिल्लें. लोक सुस्त न्हिदेंत आसतना मध्यानरातीर घराच्या जनेलांतल्यान ते चोर भितर घुसताले आनी पयसो तशेंच मोलादीक वस्तू फारायताले. आगशी, पणजी, पर्वरी, म्हापशें आनी हणजूणें पुलीस स्टेशनाचे हद्दींत घरफोडीचे णव प्रकार घडिल्ले. तातूंतल्यो तीन चोरयो पर्वरे जाल्ल्यो. ह्यो चोरयो म्होंवाळेंघातिल्ल्या चोरांनी केल्ल्याचें सीसीटीव्ही फुटेजींत दिशिल्लें. तशेंच ह्या सगळ्या चोरयांची पद्दत एकूच आशिल्ली. ते खातीर चोरांचो सोद लावचे खातीर पणजी आनी पर्वरी पुलिसांचे विशेश पंगड तयार केल्ले.
पर्वरी पुलिसांनी उत्कृश्ट कामगिरी करून मानवी तशेंच तंत्रज्ञानाच्या आदारान तपास करून दोनूय दुबावितांची वळख पटयली. ते उपरांत बुधवारा राती दोनूय दुबावितांक ताब्यांत घेवन अटक केली, अशें अधिक्षक कौशल हांणी सांगलें.
दुबावितां कडल्यान चोरयेचो म्हाल घेवपी दोगांची पुलिसांनी वळख पटयल्या. तांकांय अटक करतले. ते दोगूय दुबावितांक चोरयेच्यो वस्तू विकपाक मजत करताले.
चोरयो करचे खातीर दुबावीत भाड्याच्यो मोटारी वापरताले. म्हयन्याच्या कोताक मोटार भाड्याक घेवन ती चोरये खातीर वापरताले. ह्या चोरयां खातीर दुबावितांनी 4- 5 मोटारी वापरल्यात, अशी म्हायती चवकशेंतल्यान मेळ्ळ्या, अशें अधिक्षक कौशल हांणी सांगलें.
पुलीस उपअधिक्षक विश्वेश कर्पे, निरिक्षक राहूल परब हांच्या मार्गदर्शना खाला उपनिरिक्षक सीताराम मळीक, मंदार परब, मयूर सावंत, प्रतीक तुळसकार, आकाश चोडणकार, अरूण शिरोडकार, सचीन शिरोडकार, सहाय्यक उपनिरिक्षक उमेश पावसकार, हवालदार विनय श्रीवास्तव, कॉन्सटेबल नितेश गावडे, महादेव नायक, उत्कर्ष देसाय, आकाश नावेलकार आनी रामनाथ मडकयकार हांणी ही कामगिरी केली.
पाडेली जालो खापो चोर
दुबावीत मारियो बाप्तिस्त हो वेवसायान पाडेली. माड पाडपाचो वेवसाय करतना ताका चोरयो करपाचो नाद लागलो. ताचे आड 2015- 16 ह्या दोन वर्सांत कोलवा, मायणा कुडटरी आनी मडगांव पुलिशेंत वट्ट 14 चोरयेचे गुन्यांव नोंद आसात. तातूंतल्यो 12 चोरयो ताणें 2015 ह्या एकाच वर्सांत केल्यात.
मारियोचो आडसरां विकपाचो वेवसाय
2016 त जामिनाचेर सुटले उपरांत दुबावीत मारियो बाप्तिस्त हाणें चोरी करपाच्या आपल्या कारवायो बंद केल्यो आनी तो आडसरां विकपाचो वेवसाय करपाक लागलो. 7 – 8 वर्सां चोरया पसून पयस रावले उपरांत तो अंदूं 2024 त परतून सक्रीय जालो. ताक घरफोडींत दुबावीत मोहम्मद शेखमिया ह्या विद्यार्थ्याचो सांगात मेळ्ळो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
