भांगरभूंय | प्रतिनिधी
दिवाळेचे सुटयेंत आमी म्हैसूराची भोंवडी करपाचें थारायलें. आमच्या घराब्यांतल्या चडशा लोकांक घेवन वचपाचें थारलें. आमी वट्ट धा लोक गेल्ले. तातूंत हांव आनी म्हजो भाव. आमी भुरगे. 27 आॅक्टोबराक आमी मुंबयच्यान केरळ वचपाचे डुरेंटो ट्रेनीक मडगांव स्टेशनाचेर चडलीं. ट्रेन मडगावांक दोन वरा वेळान म्हणल्यार सकाळी साडे आठांक पावली, म्हूण आमी सगलीं मंगळूर दनपारां अडेजांक पावलीं.
आमकां तीन दीस भोंवडावनन हाडपाची गाडी मंगळूर स्टेशनाचेर तयार आशिल्ली. मंगळूर एका हॉटेलात जेवण बी घेवन आमी कूर्ग ह्या दोंगर वाठारांत आशिल्ल्या सैमान नटिल्या सुंदर आनी थंड वाऱ्याच्या गांवांत वचपाक गेल्लीं. चार वरांचो प्रवास करून आमी सांजेच्या सात वरांचेर कूर्ग गांवांत पावलीं, तेन्ना रात जाल्ली. थंय ‘राहुल व्हीला’ ह्या होमस्टे बंगल्यार आमी रातीचीं रावलीं.
कूर्ग हो कॉफीच्या मळ्यांनी भरिल्लो गांव. दुसरे दिसा सकाळीं सगळीं तयार जालीं. नाश्तो घेवन गाडी सोडली. थंय अब्बी घसघसो पळयलो, मागीर आमी ‘मेजर थिमय्या’च्या राबित्या घरात आशिल्लो म्युझियम पळयलो. मेजर थिमय्या वापरताले त्यो साबार वस्तू आनी फोटो हांच्या मदतीन तांचो सगलो इतिहास उबो केला. तातूंत चडशी शस्त्रां आनी ल्हान, व्हड बंदुको, तोफो पळोवंक मेळटात. त्या म्युझियमाक ‘सौरक्षण संग्रहालय’ म्हणटात. फुडें आमी म्हैसूर वचपाचे वाटेर एक सुंदर व्हडलो ‘नामद्रोलिंग मॉनेस्ट्री गोल्डन टेंपल’ हो बौद्ध विहार पळयलो. दनपरां एका शिवराक हाॅटेलांत जेवलीं. मागीर गाडी म्हैसूर रस्त्याक लागली.
म्हैसूर चारांक पावलीं. म्हैसूरचे ‘श्री चामराजेंद्रा झुओलाॅजी गार्डन्स’ (म्हैसूर झू) पळोवपाक गेल्ली. थंय आमी गोरिला, वांशेल, मोर, तरतरेचे पोपट, हरण, कोले, मुंगुस, वाग, शींव, जिराफ, कांगारू, बदक, लांडगो अशें प्राणी आनी सोरोप, मानगें पळयलें. दुसरे दिसा आमी उंच डोंगरार आशिल्या चामुंडेश्वरी देवळांत गेलीं. थंय खूब गर्दी. देवीची भेट घेवन आमी वॅक्स म्युझियमाक गेली. थंय आमी शिवाजी महाराज, वडियार राजा प्रताप सिंह, महात्मा गांधी, विश्वेश्वरैय्या, अल्बर्ट आयन्स्टायन, श्री श्री रविशंकर, बाबा रामदेव, गुरू नानक, भगत सिंह, कल्पना चावला, नरेंद्र मोदी, मदर तेरेसा, खली, महेंद्र सिंह धोनी, मेस्सी, अजय देवगण, रजनीकांत, जेम्स बाँड हांचे मेणाचे पुतळे पळयले. आमी थंय होरर शोय बी पळयलो.
मागीर आमी म्हैसूर पॅलेस पळोवपाक गेलीं. थंयची नितळसाण आनी सैम पळोवन आमकां खूब बरें दिसलें. सांजवेळार आमी वृंदावन गार्डन पळयलें. थंयचे उदक खूब घाण आशिल्लें. ते गार्डन पळोवन येवजिल्ली तितली धादोसकाय फाव जालीना. 30 तारखेक सकाळीं आमी परत येवपाच्या प्रवासाक सुरवात केली. मंगळूर आमी साडेतीनांक पावली. आमी रेल्वेंत पांच वरांचेर बसलीं आनी मडगांवां रातीं बाराक पावली. आमची म्हैसूरची भोवंडी खूब बरी यादीन उरपा सारकी अशी जाली.
– आरव आशय फळदेसाय
यत्ता पांचवी, रवींद्र केळेकार ज्ञानमंदीर
मडगांव
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
