भांगरभूंय | प्रतिनिधी
अभियंत्यां मुखार उदका पुरवणेचें आव्हान; बुधवारच्यान शिरोड्यां, पंचवाडी मर्यादीत उदका पुरवण सुरू
भांगरभूंय । प्रतिनिधी
फोंडें: म्हैसाळ- पंचवाडी धरणाच्या उदकाची पयलेच खेपे सामकीच देंवल्या. ताका लागून फुडल्या 4-5 दिसां उपरांत बांदकाम खात्याच्या अभियंत्यां मुखार उदका पुरवण करपाचें व्हड आव्हान उबें रावपाची शक्यताय आसा. शिरोडें आनी पंचवाडी पंचायत वाठारांत बुधवारच्यान मर्यादीत उदका पुरवण सुरू केल्या.
म्हैसाळ धरणाचें उदक पंचवाडी आनी शिरोडें पंचायत वाठारांतल्या लोकांक दितात. पावस येवपाक कळाव जालो जाल्यार पियेवपाच्या उदकाची समस्या आनीक वाडटली.
पंचवाडी आनी शिरोडें पंचायत वाठारांत उदका पुरवण करपी म्हैसाळ प्रकल्पांत उदकाची पातळी पयलेच खेपे देंवल्या. ताका लागून बुधवार सावन दोनूय पंचायत वाठारांत मर्यादीत उदका पुरवण सुरू केल्या. पंचवाडी पंचायत वाठारांतली स्थिती अजून नियंत्रणांत आसा, पूण वेळार पावस आयलो ना जाल्यार फुडल्या कांय दिसांनी उदकाची समस्या अदीक गंभीर जातली. शिरोडें पंचायत वाठारांत फाटल्या कांय दिसां सावन खूबशा गांवांनी उदकाचो उणाव जाला. खूबशा गांवांतल्यो बांयो पुराय आंटपाक पावल्यात.
भौशीक बांदकाम मंत्री निलेश काब्राल आनी शिंपणावळ मंत्री सुभाष शिरोडकार हांणी अभियंत्यां सयत दोन दिसां आदीं म्हैसाळ प्रकल्पाची पळोवणी केल्ली. उदकाची पातळी देंविल्ल्यान फुडले कांय दीस मर्यादीत उदका पुरवण करपाची सुचोवणी दोनूय मंत्र्यांनी अभियंत्यांक केल्या. ते प्रमाण बुधवारच्यान शिरोडें आनी पंचवाडी पंचायत वाठारांत मर्यादीत उदका पुरवण सुरू केल्या. उदकाचो गैरवापर करिनासतना योग्य पद्दतीन उदकचो वापर करपाचो उलो भौशीक बांदकाम खात्या वतीन मारला.
म्हैसाळ प्रकल्पांत व्हड प्रमाणांत खडी क्रशरचो चिखल जाला. ह्या वाठारांत कितल्याशाच वर्सां सावन दोन खडी क्रशर सुरू आसात. थळाव्या लोकांनी ह्या खडी क्रशरा आड खूब खेपे कागाळी केल्यात, पूण राजकी हस्तक्षेप जाता म्हूण कागाळेची कोणूच दखल घेन, अशी प्रतिक्रिया थळाव्या लोकांनी उक्तायल्या.
खडी क्रशराक लागून म्हैसाळ प्रकल्पांत व्हड प्रमाणांत चिखल जाला. भौशीक बांदकाम खात्यान तो चिखल फुडल्या वर्सा काडपाची गरज आसा. तशेंच प्रकल्पा लागसार सांजे वेळार व्हड प्रमाणांत चले- चलयो वावुरतात. सुरक्षा रक्षक नाशिल्ल्यान थंय एकादी दुर्घटणां घडपाची शक्यताय थळाव्या लोकांनी उक्तायल्या. हे संबंदांत बांदकाम मंत्री निलेश काब्राल हांणी फोंड्यां एके कार्यावळी मजगतीं अदीक म्हायती दितना म्हैसाळ प्रकल्पांत उदकाची पांतळी पयलेच खेपे देंविल्ल्याची म्हायती दिल्ली. तशेंच स्थितीचेर बांदकाम खातें लक्ष दवरून आशिल्ल्याचेंय सांगिल्लें.
साळवली धरणाचें उदक घुंवडावपाचो निर्णय
म्हैसाळ प्रकल्पांत उदकाचो उणाव जाल्ल्यान भौशीक बांदकाम खात्यान बोरी वाठारांत पुरवण करता तें साळावली धरणाचें उदक घुंवडावपाचो निर्णय घेतला. प्रकल्पांतलें उदक फुडल्या 2- 3 दिसांनी सोंपपाची शक्यताय आसा. भौशीक बांदकाम खात्याचे अभियंते पावसाची वाट पळयतात. पावस ये मेरेन लोकांनी उदकाचो योग्य वापर करचो, अशी विनवणी भौशीक बांदकाम खात्या वतीन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
