भांगरभूंय | प्रतिनिधी
लोकांक उदका पुरवण सुरू; खणिल्ले रस्ते जाल्यात घातक
भांगरभूंय । प्रतिनिधी
फोंडें: फोंडें वाठारांत पावसान हाजेरी लायिल्ल्यान म्हैसाळ धरणांत उदकाचो सांठो जावपाक इल्ली मजत जाली. ताका लागून आयतारा लोकांक उदका पुरवण सुरू केली.
म्हैसाळ धरणांतलो उदकाचो सांठो उणो जाल्ल्यान भौशीक बांदकाम खात्याच्या अभियंत्यां मुखार पेंच निर्माण जाल्लो. पूण शेनवारा पावस पडिल्ल्यान धरणांतल्या उदकाची पातळी 3 इंच वाडली. ताका लागून आयतारा पंप सुरू करून लोकांक उदका पुरवण केली. उदकाची पातळी उणी जाल्ल्यान फाटल्या कांय दिसां सावन पंप बंद दवरिल्लो. मजगतीं, तशेंच पावसाक लागून खूब कडेन भुंयगत वीज केबल घालपाक खणिल्ल्या फोंडकुलांनी उदक भरलें. वाहन चालकांक फोंडकुलांचो अदमास येनाशिल्ल्यान अपघाताची शक्यताय वाडल्या. वयल्या बाजारांत नुस्त्यां मार्केटा लागसार तळ माळ्यार सगळ्यांत चड उदक सांचिल्लें. ताका लागून लोकां उदकांतल्यान वाट काडची पडटाली. तशेंच पोरण्या बसस्टॅण्डा लागसार आशिल्ल्या पॅट्रॉल पंपा मुखा वयल्या रस्त्याचेर आयतारा दनपार मेरेन उदक सांचून उरिल्लें. वाहनचालकांक ह्या उदकांतल्यान वाट काडची पडटाली. दर वर्सां पावसाळ्यांत हे सुवातेर उदक सांचता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
