भांगरभूंय | प्रतिनिधी
पंचवाडीची उदका पुरवण बंद; आयच्यान टँकर
भांगरभूंय । प्रतिनिधी
फोंडें: म्हैसाळ प्रकल्पांत उदक नाशिल्ल्यान शुक्रारच्यान उदका पुरवण बंद केल्या. उदकाचो सांठो नाशिल्ल्यान पंचवाडी पंचायत वाठारांतल्या लोकांची उदक पुरवण बंद केल्या. शेनवारच्यान लोकांक टँकारांतल्यान उदक दिवपाचो यत्न भौशीक बांदकाम खात्यान सुरू केल्यात, अशी म्हायती बांदकाम खात्याचे सहाय्यक अभियंते काशीनाथ सराफ हांणी दिल्या.
शिरोडें आनी बोरी पंचायत वाठारांतल्या लोकांक साळावली आनी ओपा प्रकल्पांतल्यान रातच्या 10 ते 1 वरां मेरेन उदका पुरवण करतात. म्हैसाळ धरणा लागसार चलपी खडी क्रशराक लागून उदकाचो सांठो उणो जाला, असो आरोप थळावे लोक करतात.
म्हैसाळ धरणांत फाटल्या कांय दिसां आदीं म्हैसाळ धरणांत इल्लो उदकाचो सांठो आशिल्लो. आतां उदक पुराय सोंपिल्ल्यान बिरेस्तार पंप बंद केले. शुक्रारा राती उसरां मेरेन पंचवाडी पंचायत वाठारांतल्या लोकांक टांकयेचें उदक मेळटलें. मात ते उपरांत भौशीक बांदकाम खात्याक टँकरांची वेवस्था करची पडटली. हाका लागून अभियंत्यांची धांवपळ चल्ल्या.
धरणांतलो चिखल काडपाचो थाराव घेतिल्लो. त्या थारावाची दखल घेतिल्ली जाल्यार आयज उदकाचो उणाव जावचो नाशिल्लो. सरकारान खडी क्रशर बंद करून धरणाचें उदक नितळ दवरपाचो यत्न करपाक जाय, अशें आदले जिल्हो पंचायत वांगडी जयदीप शिरोडकार हांणी सांगलें. म्हैसाळ धरणांतल्या उदकाची पातळी उणी जाल्या. ताका लागून उदका पुरवण बंद केल्या. लोकांनी उदकाचो गैरवापर करचो न्हय. पावस ये मेरेन लोकांनी सांबाळून उदक वापरचें, अशी विनवणी शिरोडें भाजपा मंडळाचे अध्यक्ष सुरज नायक हांणी केल्या.
चिखल काडूंक नाशिल्ल्यान उदकाचो उणाव
म्हैसाळ धरणांत व्हड प्रमाणांत खडयेचो पिठो सांचून रावला. हे आदीं खूब जाणांनी खडी क्रशर बंद करपा खातीर यत्न केल्ले. पूण राजकी हस्तक्षेपाक लागून खडी क्रशर अजून चालू आसा. आदले जिल्हो पंचायत वांगडी जयदीप शिरोडकार हांणी 2017 त धरणांतलो खडयेचो चिखल काडपाचो थाराव घेतिल्लो, पूण सरकारान त्या थारावाची दखल घेवंक नाशिल्ल्यान अंदूं उदकाचो प्रस्न गंभीर जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
