भांगरभूंय | प्रतिनिधी
म्हाशिवरात हें एक व्रत. उपास, पुजा करून पुण्य मेळोवपाचें व्रत. दिसान दीस ताची महिमा वाडत आसा. आयज सगल्या पिराय गटांतले चले, चलयो, बायलो, दादले हे व्रत भक्तीभावान पाळटात. दरेका म्हयन्याचे वद्य चतुर्दशीक शिवरात्र येता, पूण माघ म्हयन्यांत येवपी चतुर्दशीक म्हाशिवरात म्हणटात.
गोंयांत साबार वाठारांनी शिवशंभुचीं ल्हान व्हड सुंदर देवळां आसात. थंय शिवरात्र व्हड प्रमाणांत मनयतात. अंत्रुज म्हालांत फोंड्यां, मंगेशी, नागेशी, नागझर, कुर्टी, तांबडी सुर्ल, खांडेपार, नार्वें, हरवळ्यां व्हड उमेदीन हजारांनी भावीक शिवरात्र मनयतात. शिवशंभूक महादेव, रुद्रेश्वर, भोलेनाथ, गिरीजाशंकर ह्या नांवांनीय वळखतात.
हरवळेंचें रुद्रेश्वराचें देवूळ खूब आदलें. व्हडलें पटांगण, पाचवींचार कुळागरां पळोवन तानभूक न्हिवता. लागींच दोंगरा वयल्यान कोसळपी घसघसो सगल्यांचें लक्ष वेधून घेता. पावसाच्या दिसांनी तर हो दुदाळ, फेसाळ घसघसो रुद्र रुप धारण करता. शिवरात्र हो हांगाचो व्हडलो उत्सव. हरवळेंचो पुराय वाठार भोलेनाथाच्या म्होंवाळ गितांनी, ओम नम: शिवाय, हर हर महादेवाच्या आवाजांत दुमदुमून वता. आदले रातीं भक्त व्रत धरतात. सोंवळें न्हेसतात. रातचे जेविनात. फांतोडेर उठून तिर्थार वचून न्हातात आनी ओले कपडे घालूनच देवाच्या नंदीक हळद कुकूम, फुलां ओंपतात, मागीर गर्भकुडींत वचून महादेवाच्या पाशाणी लिंगाक दुदान न्हाणयतात. रुद्राभिशेक करतात. बेलाचीं 108 पानां ओंपतात. ती ओंपल्यार मनशाक ह्याच जल्मांत पुण्य मेळटा, अशी श्रद्धा आसा.
हळवळेंचो घसघसो हो पवित्र तिर्थक्षेत्र. नवीं लग्न जाल्लीं जोडपीं शिवरात्रे दीस न्हंयेंत न्हातात. भटजींक सुपारी, वायन, दक्षिणा दितात. तांचो आशिर्वाद घेतात. हांगां जायते धर्मीक विधी वर्सभर चलतात. हरवळ्यां पांडवकालीन गुहा, होंवऱ्यो आसात. पांडवांनी हरवळ्यां आयिल्ले तेन्ना एके रातींत एके वातींत त्यो फातरांतल्यान कोंरातिल्ल्यो, अशी श्रद्धा आसा.
नार्वें गांव हो सप्तकोटेश्वराच्या देवळा खातीर प्रसिद्ध. हांगा शिवरात्र मोठ्या प्रमाणांत मनयतात. लोकांची खूब गर्दी आसता. छत्रपती शिवाजी महाराजान सतराव्या शेंकड्यांत सध्याचें हें देवूळ बांदिल्लें. गोंयच्या हेर ल्हान- व्हड देवळांनी हो उत्सव मनयतात. खरेंच भोलेनाथाचें शांत, निरागस रुप पळोवन मनाक थाकाय मेळटा. जटाधारी रुप, माथ्यार चंद्रकोर, तकलेर व्हांवपी गंगामाता, गळ्या भोंवतणी नाग, रुद्राक्षमाळा, सगल्या आंगार भस्म, हातांत त्रिशुळ, डमरू, आंगार वागाचें चामडें….. शंकराचें रुप पळोवन मनाक धादोसकाय भोगता. सगल्यांत शिवरात्रेचीं परबीं.
सिद्धी तिळवे
9158200956
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
