म्हाविद्यालयीन भोवभाशीक  कविता सर्तींत दिया, शबिना, आकृती, शुभवी हांका इनामां

भांगरभूंय | प्रतिनिधी

भांगरभूंय । प्रतिनिधी
कुंकळ्ळीः कुंकळ्ळी एज्युकेशनल सोसायटीच्या कला आनी वाणिज्य म्हाविद्यालयान घडोनव हाडिल्ल्या काव्यरंग 2024 हें आंतर म्हाविद्यालयीन भोवभाशीक कविता सर्तींत दया सावंत, शबिना डंबल, आकृती नायक आनी शुभवी फळदेसाय हांणी दरेकी कोंकणी, हिंदी, मराठी आनी इंग्लिश भाशा गटांत पयलीं इनामां मेळयलीं. म्हाविद्यालयाचो   अंतर्गत गुणवत्ता आश्वासन कक्ष, ‘संगम’ साहित्यीक मंडळ आनी इंग्लीश विभाग हांच्या जोड पालवान ही  कविता वाचन सर्त घडोवन हाडली.
सर्तींत गोंयांतल्या वेगवेगळ्या म्हाविद्यालयांतल्या विद्यार्थ्यांनी वांटो घेतिल्लो. तिचें उक्तावण   कोंकणी भाशा मंडळाची अध्यक्ष ॲड. अन्वेषा सिंगबाळ हांचे हस्तुकी जालें तशेंच सी. ई. एस. म्हाविद्यालयाचें प्रभारी प्राचार्य प्रा. अविनाश रायकार, ‘संगम’ साहित्यीक मंडळाची अध्यक्ष सहयोगी प्रा. चतुरा साकोर्डेकार आनी कोंकणी विभाग प्रभारी सहाय्यक प्रा. अश्विनी च्यारी ह्या वेळार हाजीर आशिल्ली.
विद्यार्थ्यांनी वाचन आनी लेखनांत सातत्य बाळगूंक जाय जाल्यारूच कविता रचनेचो दर्जो वाडटलो अशें अन्वेषा सिंगबाळान सांगलें. . हें सर्तींत नवोदीत कविंनी वेगवेगळ्या विशयांचेर कविता सादर केल्यो. कोंकणी गटांत पयलें इनाम दिया सावंत (सरकारी म्हाविद्यालय, केपें), दुसरें इनाम जोस्मिता फर्नांडीस (डॉ. दादा वैद्य शिक्षणशास्त्र म्हाविद्यालय, फार्मागुडी-फोंडे), हिंदी गटांत शबिना बानू डंबल (रोझरी म्हाविद्यालय, नावेली), दुसरें इनाम प्रिती हळदणकार (धेंपे म्हाविद्यालय, मिरामार) मराठी गटांत पयलें इनाम आकृती अशोक नाईक  (डॉ. दादा वैद्य शिक्षणशास्त्र म्हाविद्यालय, फार्मागुडी- फोंडे), दुसरें इनाम वंशिका मांद्रेकर (सरकारी म्हाविद्यालय, केपें) आनी इंग्लीश गटांत पयलें इनाम शुभवी फळदेसाय (डॉ. दादा वैद्य शिक्षणशास्त्र म्हाविद्यालय, फार्मागुडी- फोंडे), दुसरें इनाम डेल लुईस (सरकारी म्हाविद्यालय, केपें) हांकां फावो जालें. नसरीन खान, सलोनी फळदेसाय, अनामिका सावंत, सहाय्यक प्रा. शुभलक्ष्मी नायक गांवकर हांणी सूत्रसंचालन केलें, सहाय्यक प्रा. जयेश अर्जून राऊत हांणी मुखेल सोयऱ्यांची वळख केली जाल्यार कार्यावळीची संयोजक  सहाय्यक प्रा. अश्विनी च्यारी हांणी उपकाराचें उलोवप केलें.