भांगरभूंय | प्रतिनिधी
8 जून अर्ज करपाची निमाणी तारीख
पर्वरीः उच्च शिक्षण संचालनालयान शिक्षणीक वर्स 2025-26 खातीर म्हाविद्यालयाच्या पयल्या वर्सा खातीर ऑनलायन प्रवेशाची दुसरी आनी निमाणी फेरी जाहीर केल्या. विद्यार्थ्यांक उच्च शिक्षण संचालनालयाच्या समर्थ ऑनलायन संकेतथळा वरवीं 1 जून ते 8 जून 2025 मेरेन अर्ज करपाक मेळटा. ज्या विद्यार्थ्यांक अजून प्रवेश मेळूंक ना तांणी बी.ए., बी.एसस्सी., बी.कॉम., बीबीए., बीसीए. सयत वेगवेगळ्या पदवी कार्यावळीं सयत बी.एड., बॅचलर ऑफ परफॉर्मिंग आर्ट्स, बॅचलर ऑफ म्युझिक हे खातीरय गोंयच्या उच्च शिक्षण संचालनालयाच्या समर्थ संकेतथळा वरवीं अर्ज करचो. चड म्हायती खातीर उच्च शिक्षण संचालनालयाच्या https://dhe.goa.gov.in ह्या संकेतथळाक भेट दिवची अशें उच्च शिक्षण संचालनालयान कळीत केलां.
1300 सुवाती उपलब्ध
हातूंत सुमार 1300 सुवाती आसात. ऑनलायन अर्ज करपाची प्रक्रिया फुकट आसा, देखून सगल्या पात्र विद्यार्थ्यांनी कळाव करिनासतना अर्ज करचो असो उलो उच्च शिक्षण संचालनालयान केलां.
वैजकी आनी अभियांत्रिकी म्हाविद्यालयांत प्रवेश मेळोवप्यां खातीर आवाहन
चालू 2025-26 शिक्षणीक वर्साच्या पयल्या वर्सा प्रवेशा खतीर अर्ज करपाची ही निमाणी संद आसतली. वैजकी वा अभियांत्रिकी सारक्या वेवसायीक अभ्यासक्रमांत निकालाची वाट पळोवपी विद्यार्थ्यांनीय अर्ज करचो, कारण हे फेरये उपरांत विद्यार्थ्यांक अर्ज सादर करपाची दुसरी संद मेळची ना अशें उच्च शिक्षण संचालनालयान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
