म्हावळींग्यां आंतरराष्ट्रीय क्रिकेट स्टेडियमाक प्राधान्य

भांगरभूंय | प्रतिनिधी

रोहन देसाय : परिवर्तन पॅनलाचो वेंचणूक जाहीरनामो उजवाडाक

भांगरभूंय । प्रतिनिधी

पणजी : गोंयात आंतरराष्ट्रीय क्रिकेट स्टेडियम उबारपा खातीर दिवचल म्हालांतल्या म्हावळींगेंक आमी प्राधान्य दितले. म्हावळींगे गोंय क्रिकेट संघटनेची (जीसीए) स्वताचे मालकीची जमीन आसा, ते भायर आमकां धारगळे स्टेडियम व्हरपाक अडचणीक तोंड दिवचें पडटा. आमचें परिवर्तन पॅनल वेंचून आयलें जाल्यार 2027 पयली क्रिकेट स्टेडियम गोंया तयार जातलो, अशें आस्वासन बीसीसीआयचे जोड सचीव रोहन देसाय हांणी दिलें.

जीसीए वेंचणुकेक उबें केल्ल्या परिवर्तन पॅनालाचो जाहीरनामो शेनवारा सांजे जाहीर केलो. ह्या वेळार रोहन देसाय उलयताले. तांचे वांगडा परिवर्तन पेनलाचे अध्यक्षपदाचे उमेदवार महेश कांदोळकार, उपाध्यक्षपदाचे उमेदवार राजेश पाटणेकार, सचीवपदाचे उमेदवार दया पागी, जोडसचीवपदाचे उमेदवार सुशांत नायक आनी रुपेश नायक तशेंच वांगडीपदाचे उमेदवार मेघनाथ शिरोडकार हजर आसले.

गोंयचे क्रिकेटीचे व्हिजन मुखार दवरून आमी हो जाहीरनामो उजवाडाक हाडला. आमी जीसीएंत चडाव उतार खूब पळयले. पूण गोंयचो क्रिकेट संवसार देश पांवड्यार व्हरपा खातीर आमी मुखार सरल्यात, अशें देसाय हांणी म्हणलें.

गोंयांत अजून मेरेन आंतरराष्ट्रीय क्रिकेट स्टेडियम ना हें आमचें दुर्भाग्य. 2010 त थियें 1.96 लाख. चौ. मि. सुवात लीजार घेवन बांदकाम शुल्क भरलें, 2012- 2015 मजगती मांवळींगे 1.98 लाख चौ. मि. सुवात 45 कोटी रुपयांनी विकती घेतली आनी 2018 त धारगळे 1.89 लाख चौ. मि. सुवात लिजार घेवन 10 कोटी रुपया मोडले. आतां मेरेन स्टेडियमा खातीर 60 कोटी मोडल्यात, पूण स्टेडियम फक्त सपन जावन उरला, अशें देसाय हांणी म्हणलें.

गोंय सोडून देशभर मॅची जातात, ते खातीर आतां एक निर्णय घेवपाचो वेळ आयला. येता त्या तीन वर्सां भितर क्रिकेट स्टेडियम उबरपाचें आमचें मुखेल व्हिजन आसा. आमचें पॅनल वेंचून येतकच हें काम पयलीं हातांत घेतले. हे विशीं सरकारा कडेन आमची उलोवणी जाल्या. हे खातीर पुराय पॅनल येवप गरजेचें आसा. जर अर्दकुटें येत जाल्यार ताचो कांयच फायदो ना, अशें देसाय हांणी सांगलें.

हें पॅनल कल्बांचें आसा आनी सगळ्या 107 क्लबांक आमी घेवन फुडें वतले, अशें अध्यक्षपदाचे उमेदवार महेश कांदोळकार हांणी सांगलें.

फाटलीं 15 वर्सां पळयलीं जाल्यार क्रिकेट आनी भुरगे फुडें वचनात. राष्ट्रीय पांवड्या वयले खेळगडे तयार करपा खातीर आमी पांच वर्सांचे व्हिजन दवरलां. नवें तंत्रज्ञान आनी सुविधा हाडून बरें कोचींग आमकां दिवपाक जाय. तशेंच सरकारान स्टेडियमा खातीर पुराय सहकार्य दिवन हाच्या बांदकामा खातीर सिंगल विंडो मान्यताय दिवपाचें आस्वासन दिलां, अशी म्हायती कांदोळकार हांणी दिली.

रोहन देसाय हांचो अर्ज प्रतिनिधी खातीर बीसीसीआयन मान्य केला आनी हो अर्ज मान्य करपा खातीर कसल्यो खटपटी करच्यो पडल्यो त्यो देसाय हांणी सांगल्यो. बीसीसीआयची 6 सप्टेंबराक ईमेल आयले उपरांत आमी 7- 8 फावटीं उगडास करून दिलो, पूण बसका घेवपाचो कसलोच हेतू नासलो. उच्च न्यायालयांत गेले उपरांत न्यायालयान दनपारां 2 वरांचेर बसका घेवन सांजेच्या 8 वरां पयलीं थाराव धाडपाचो आदेश काडलो. उपरांत हे विशींची बसका घेवन जीसीएच्या पांच कार्यकारी वांगड्यांनी आपलें नांव निश्चीत केलें. पूण हो थाराव बीसीसीयाक धाडपा खातीर अडचणी तयार करपाचो यत्न जालो. ह्या थारावेचेर सय करपाचें काम ही जीसीएच्या मुखेल कार्यकारी अधिकाऱ्याची आसता. पूण हो अधिकारी एकाच मनशाच्या आदेशाचेर चलता. उपरांत आमी अर्ज भरलो आनी ह्या अर्जाक उच्च न्यायालयाच्या आदेशाची प्रत जोडून बीसीसीआयक धाडली, अशें देसाय हांणी सांगलें.