म्हाल दर्जेदार, आमचो अधिकार

भांगरभूंय | प्रतिनिधी

दर्जेदार म्हाल मेळप हो गिरायकांचो अधिकार हें कोणेंच विसरूंक फावना. ते खातीर एफडीएक आनी समाजाकूय जागो रावचो पडटलो.

भेसळ केल्यार कितें जाता हें आमी कोणाक सांगपाची गरज ना. फाटल्या 25 वर्सांच्या काळांत अत्याधुनीक उपचार, वखदां आसून लेगीत लोक दुयेंत पडत आसात. गोडेंमूत ना जाल्यार प्रेशराची पिडा 30 वर्सां पिराये वयल्या सगल्यांकूच सतायता. कॅन्सराचेंय प्रमाण वाडलां. बदलपी जिणेशैली हाका जापसालदार, पूण भेसळ जिनसांनी कॅन्सरा सयत सगल्याच दुयेसांच्या मळाचेर योगदान दिलां, अशें म्हणल्यार तें फट थारचें ना. हालींसराक बरेच जिनस भेसळ वा दर्जो नाशिल्ले मेळटात. ताका लागून भलायके विशीं जागृत आशिल्ल्यांनी घरांतलें खावप सुरू केलां. पयशे आशिल्ले ब्रँडेड जिनसांच्या मोगांत पडल्यात. कारण ‘सवाय खाण पोटफुगें’ हें तांकां बेसबरें खबर आसा. हालीं अन्न आनी वखदां प्रशासन (एफडीए) जागृत जालां. तशी तांकां केन्नाच झेम येवचीं ना, इतली भेसळ बाजारपेठेंत चलता. दर्जोहीन जिनसांची विक्री जाता. सगल्यांक कश्ट करिनासतना झटपट पयसो जाय. ताका लागून हें जाता. एफडीएचीं दोन मुखेल कार्यालयां आसात, तांणी आपलें समाजसेवेचें हें काम चालूच दवरचें. सप्तकाक एक तरी प्रकरण भायर सरुंदी. लोकांचीय मजत घेवची.
जिनसांचें उत्पादन करपी उद्देजक, ते विशींची सेवा दिवपी वेवसायीक हालींसराक भेसळ, उण्या दर्जाचो म्हाल वापरप, रांदचीकूड बुरशी दवरप, म्हाल बेगीन पिकोवपाक रसायनां वापरप अशा साबार गुन्यांवांनी आडकल्ले दिसतात. हातूंत फरसाण, मिठाय, चिप्स बी करपी तीन उत्पादक, एक केटरर आनी पांच फळ विक्रेते आसात. केटरर आनी एका उत्पादकाक काम बंद दवरपाक सांगलां. तर हेर दोगांक वेवसायांत सुदारणा करपाक सांगलां. हातूंत दर्जो नाशिल्लीं उत्पादनां करप, बुरशेंपणां करप, कृत्रिम पद्दतीन फळां पिकोवप अश्या बेकायदेशीर कामांचो आसपाव आसा. खरें म्हणल्यार तांकां जल्मभर याद उरता तितलो अर्थीक दंड दिवपाक जाय. आयचे घटकेक बाजारांनी फरसाण, मिठाय विकपी थोडेच गोंयकार उरल्यात. सगलो बाजार भायल्यांनी (तेय थारावीक राज्यांतले) काबीज केला. तातूंतले कांय जाण असल्यो भानगडी करतात. म्हालाचो दर्जो सारको नासप, हें गोंयकार उत्पादक आनी विक्रेत्यांचे बाबतींतूय घडटा. आपमजत गट, लघुउद्देग करपी नीज गोंयकार बायलांनी केल्ले जिनस पसून अशेच आसतात, हें पळोवन धपको बसता. म्हाल केलो काय तो चाखून पळयनासतना पाकिटांनी भरप जाता. सादारण दर्जाचो म्हाल बाजारपेठेंत येता. रुचीचें खावपी गोंयकार गिरायक आतां खूब उणें जालां. दर्जो बिर्जो पळयनासतना खाण- जेवण ताळ्या सकयल धुकलपी हजारांनी लोक सध्या गोंयांत दिसतात. एफडीएक रेस्टाॅरंण्टां, खाणावळींचेरूय नदर दवरची पडटली. जंय बायलो रांदतात, त्यो खाणावळी सोडल्यो जाल्यार हेर कडलें नुस्तें, हुमण, भाजी तोंडांत घालपा सारकी नासता. फळां विक्रेतेय कितें करतात, तें सांगपाचें ना. केळीं, आंबे पिकचे म्हूण रसायन लावप, रंगाचो वापर करप असली हातचलाखी करतना तांकां धरल्यात. वेवसाय करता तो जागो नितळ आसपाक जाय. मार्केंटां निवळ जाय. दर्जेदार उत्पादन, फळां आसल्यार गिरायक आपूण जावन वाट सोदीत येता, हें ह्या वेवसायिकांक केन्ना कळटलें. काय तांकां वर्सा भितर 7- 8 लाखांचो फायदो जाय? तेंय बी गिरायकांचे भलायकेचो सत्यनाश करून! दुदांत युरीया, शांपू घालपी उत्पादक आमच्या म्हान देशांत धरल्यात. चीनांत असलें कितें सांपडत जाल्यार तांकां जल्मठेप दितात. तें खावन कोण मेलो बी जाल्यार सरळ गोळाक लायतात. तसले कायदे करप आमकां शक्य ना?
जंय अन्न, जिनस तयार जातात, विकतात त्या जाग्याचे नितळसाणेची तपासणी करप, जिनसाचे नमुने घेवप, ते तपासप, भेसळ आसल्यार कारवाय करप, वखदां उत्पादन, विक्री हाचेर एफडीएक नदर दवरची पडटा. जर बाजारांत भेसळ वा दर्जो नाशिल्लें, लेबलां नाशिल्लें, एक्स्पायरी जाल्ले जिनस मेळटात, जाल्यार ताचो थपको एफडीएचेर येता. म्हणटकच तांणी कायम जागृत रावन बाजारांचेर, वेवसायिकांचेर लक्ष दवरपाक जाय. तांणी पोरूं बऱ्याच वखदांचें उत्पादन, विक्री, वितरणाचेर बंदी घाल्या. बसस्टॅण्डांचेर आयिल्लो मावा, मसाले, वाटाणे सारके पदार्थ जप्त केल्यात. राज्यांतल्या बायलां उद्देजकांक मार्गदर्शन केलां. तांकां एफएसएसएआय परवानेय दिल्यात. गोंयकारांक लागतात, त्या जिणेगरजेच्या हेर वस्तूंचेरूय एफडीआयन लक्ष दवरुंक फावो. खास करून पाव, दूद, नुस्तें, भाजी, कपडे…!! कारण हालींच्या तेंपार दरेका उत्पादनांत कितें ना कितें उणाव आसताच. भेसळ, पोंवटो, कुसको, वजनान उणो म्हाल सर्रास विकप चल्लां. दर्जेदार म्हाल मेळप हो गिरायकांचो अधिकार हें कोणेंच विसरूंक फावना. ते खातीर एफडीएक आनी समाजाकूय जागो रावचो पडटलो. कारण बरी भलायकी आसप हें वरदान कशें. पिरायेची साठी हुपता मेरेन तंदुरुस्त आसपी लोक तशे उणेच…. वयर म्हणलां ते प्रमाण, नाका जाल्लो म्हाल पोटांत वचप हेंय हाचे फाटलें एक कारण. ताका ‘फूल स्टाॅप’ जाय.